استاناداعى بارلاردا تۇندە ىشىمدىك ساتۋعا شەكتەۋ قويىلۋى مۇمكىن
«بۇل سۇراق ءبىرشاما تالقىعا ءتۇستى. راسىندا دا، مۇنداي باستامانى كوتەردىك. جۇمىس بۇگىننەن باستالعان جوق، تالداۋ ۇدايى جۇرگىزىلىپ وتىرادى. سايىپ كەلگەندە كوڭىل كوتەرۋگە ارنالعان ورىنداردا ساعات 00.00-دەن كەيىن ىشىمدىك ىشكەندەر كوشەگە جانە قوعامدىق ورىندارعا شىعىپ الىپ، قىلمىس جاسايدى»، - دەدى ول پوليتسيا دەپارتامەنتىندە وتكەن باسپا ءسوز ءماسليحاتىندا.
باسقارما باسشىسىنىڭ ايتۋىنا قاراعاندا، ءتيىستى باستاما زاڭنامالىق نەگىزدە ۇسىنىلىپ وتىر.
«دەپارتامەنت باستىعى ۇسىنىستى زاڭنامالىق نەگىزدە جولدادى. مۇنداي سۇراقتى پوليتسيانىڭ وزدىگىنەن شەشە المايتىنى بەلگىلى. زاڭنامالىق نەگىز كەرەك. وسى ۇسىنىسپەن بۇرىن اكىمدىككە دە، ىشكى ىستەر مينيسترلىگىنە دە شىققانبىز»، - دەدى عۇسمان جاكين.
ونىڭ ايتۋىنا قاراعاندا، مەرەكە جانە دەمالىس كۇندەرى ءتارتىپ بۇزۋشىلىقتار ءجيى تىركەلەتىندىكتەن، پوليتسيا امالسىز اتالمىش ورىندارعا پوليتسيا جاساعىن قوياتىن كورىنەدى. سول سەبەپتى، ىشىمدىكتى ساعات 23.00-دەن كەيىن ساتۋعا شەكتەۋ قويۋ باستاماسى ءالى كۇشىن جويماعان. دەسە دە، باسقارما باسشىسى وسىناۋ قاتاڭ شارا بارلىق بارلار مەن رەستوراندارعا، كلۋبتارعا قاتىستى بولمايتىنىن ايتىپ وتىر.
«ءبىز تولىقتاي شەكتەۋ قويۋ كەرەك دەمەيمىز. ءبىراق، ءتارتىپ بۇزۋشىلىق ءجيى بولاتىن ءارى بىلىكتى كۇزەت قىزمەتى جوق، دابىل ورناتىلماعان، بەينەباقىلاۋ كامەراسى جوق ورىندارمەن جەكە جۇمىس جۇرگىزۋ كەرەك دەپ ەسەپتەيمىز. ال «تىنىش» ورىنداردا باسقاشا جۇمىس جۇرگىزىلەدى»، - دەدى ول.
ايتا كەتسەك، وسى جىلدىڭ ءساۋىر ايىندا نۇر- سۇلتان قالالىق پوليتسيا دەپارتامەنتىنىڭ جەرگىلىكتى پوليتسيا باسقارماسى ەلوردانىڭ كوڭىل كوتەرەتىن ورىندارىندا ساعات 23.00-دەن كەيىن ىشىمدىك ساتپاۋ باستاماسىن كوتەرگەن بولاتىن.
اۆتور ايان بەكەن ۇلى