الاكولدە دەمالۋشىلار بالالارمەن بىرگە ارالدا قالىپ قويدى

وسكەمەن. قازاقپارات - شىعىس قازاقستان وبلىسىندا الاكول جاعالاۋىنا دەمالۋعا كەلگەن ادامدار ارالتوبە ارالىندا تۇنەۋگە ءماجبۇر بولدى، دەپ حابارلايدى قازاقپارات ءتىلشىسى.

ش ق و توتەنشە جاعدايلار دەپارتامەنتىنىڭ حابارلاۋىنشا، تۇنگى ۋاقىتتا موتورلى قايىقپەن سەرۋەنگە شىققان توپ جاعادان 18 شاقىرىم جەردەگى ارالدا قالىپ قويعان. كول بەتىندە داۋىل تۇرىپ، كەرى قايتۋ قاۋىپتى بولعاندىقتان، دەمالۋشى توپ قۇتقارۋشىلارعا حابارلاسىپ، كەڭەس سۇراعان.

«حابار بىزگە تۇنگى ساعات 22.00 شاماسىندا كەلىپ ءتۇستى. بۇل كەزدە كول بەتى ءالى تىنىشتالماعان بولاتىن. سوندىقتان، كەرى قايتۋ قاۋىپتى ەدى. جەل باسىلعان ساتتە-اق ءبىز ارالعا جول تارتتىق. تاڭعى ساعات 5.00 كەزىندە 10 ادامدى ارالدان تاپتىق. اراسىندا بالالار دا بار. ابىروي بولعاندا، ەشقايسىسىنا مەديتسينالىق جاردەم قاجەت بولمادى»، - دەدى دەپارتامەنتكە قاراستى 6№ قۇتقارۋ جاساعىنىڭ باسشىسى نۇرجان باجاقوۆ.

قۇتقارۋشىلار ارالدا قالعان ادامداردى ەكى قايىقپەن كەرى الىپ قايتقان. شومىلۋ ماۋسىمى باستالعاننان بەرى ت ج د ماماندارى وبلىس بويىنشا 23 ادامنىڭ ءومىرىن امان الىپ قالعان.