قالىڭدىققا ارنالعان كەڭەستەر

نۇر-سۇلتان. قازاقپارات - تۇرمىسقا شىعىپ، اق كويلەك كيۋ ءاربىر قىزدىڭ ارمانى ەكەنى بەلگىلى.

كەز كەلگەن قالىڭدىق ۇيلەنۋ تويىنا ىجداعاتتىلىقپەن دايىندالىپ، ەرەكشە سۇلۋ بولىپ، يبالى كەلىن اتانۋدى قالايدى.

دەگەنمەن سول ارماندارى ورىندالۋ ءۇشىن ولار ءبىراز كۇش جۇمسايدى. ماسەلەن، ءوز- وزىنە قاراپ، تەرى كۇتىمىنە كوپ ءمان بەرەدى، ياعني نازىك، ادەمى كورىنۋ ءۇشىن. سونىمەن قاتار، تويعا دەيىن ارتىق سالماق تاستاپ، سپورت زالىنان شىقپايتىندار دا بار. كەيبىرى ديەات ۇستاپ، تابيعات اياسىندا، تازا اۋادا قىدىرعاندى ادەتكە اينالدىرادى. ءبىر سوزبەن ايتقاندا باسىنان اياعىنا دەيىن نازارىندا ۇستايدى. الدىن الا بىرەۋلەرى ستيليستەرمەن كەلىسىپ، شاش، تىرناقتارىن ساندەيدى.

تاعى ءبىر تويعا دايىندىق كەزەڭى - ول كويلەك تاڭداۋ. سوندىقتان قالىڭدىقتارعا ايتارىمىز، توي كويلەگىن تاڭداۋ كەزىندە ەش ەرىنبەستەن بىرنەشە سالونعا بارۋ كەرەك. ۇناتقان كويلەگىڭىزبەن شىققان كەزدە عانا، ءوزىڭىزدى ەركىن، ءارى ىڭعايلى سەزىنەتىن بولاسىز. سونىمەن قاتار، پسيحولوگيالىق دايىندىقتان ءوتۋ كەرەك. ول ءۇشىن وزىڭىزگە سەنسەڭىز بولعانى. وسى اتالعان امالداردى ورىنداساڭىز ءسىز ءۇشىن توي ەستەن كەتپەس عاجاپقا اينالاتىنى ءسوزسىز.

توي ەرەكشە ءوتۋ ءۇشىن قالىڭدىقتار بىرنەشە كەڭەسكە جۇگىنۋگە تۋرا كەلەدى.

1. قالىڭدىققا كومەكتەسىپ جۇرەتىن جانىندا جاقىن قۇربىسى بولۋ كەرەك. ول قالىڭدىقتىڭ بەت- الپەتىنە قاراپ، باقىلاپ ءجۇرۋى ءتيىس.

2. قالىڭدىق ەكى ءتۇرلى اياق كيىم تاڭداعانى دۇرىس. بىرەۋ بيىك وكشەلى بولسا، ەندى ءبىرى تابانى الاسا. ولاردى ءار ەكى- ءۇش ساعات سايىن اۋىستىرىپ كيىپ وتىرسا، شارشاماستان اياعىنان تىك تۇرىپ، تويدى وتكىزۋگە شاماسى جەتەتىن بولادى.

3. توي الدىندا ۇيقىنى قاندىرۋ كەرەك. ارينە، ءدارى- دارمەكتىڭ كومەگىنسىز. ەگەر ىشەتىن بولساڭىز، ەرتەڭىنە باس اۋىرىپ ەشتەڭەگە جارامسىز بولىپ قالاسىز.

4. تويعا ءبىر كۇن قالعاندا قىزدارمەن باس قوسىپ كەش ۇيىمداستىرۋدىڭ قاجەتى جوق. ەڭ دۇرىسى ءبىر اپتا نەمەسە بىرنەشە كۇن قالعاندا عانا وتكىزۋ ءتيىمدى. سەبەبى، جاقسى دەمالىپ، تويعا دايىندالۋ قاجەت.

5. بولاشاق جارىڭنىڭ اتا-اناسىنا العىس سوزدەردى الدىن الا دايىنداپ قويعانىڭىز دۇرىس. ارينە، ولار جۇرەكتەن شىققان، شىنايى بولۋى كەرەك.

6. قانداي جاعداي بولماسىن قالىڭدىق جىلاماۋ كەرەك. ول تەك قانا بويالعان بەتىڭىزدى قۇرتىپ قويماي، كوزىڭىز بەن مۇرنىڭىز قىزارىپ، سۋرەتتەردە ادەمى كورىنبەي قالۋىڭىز ىقتيمال. سوندىقتان ەموتسياعا بەرىلمەي، بۇل ومىرىڭىزدەگى باقىتتى كەزەڭ دەپ جۇباتىڭىز.

ۇمىتپاڭىز! وسى جازىلعان كەڭەستەرگە كوز جۇگىرتسەڭىز، وندا تويىڭىز جەڭىل، ءارى قىزىقتى وتەتىنە كەپىلدىك بەرەمىز.