گەپاتيتتى جۇقتىرماۋ جولدارى قانداي؟
ۆيرۋستىق گەپاتيت - باۋىردى قابىندىراتىن جۇقپالى اۋرۋ. بۇل ۆيرۋستار ءتۇرلى جولمەن بەرىلەدى: ا جانە ە گەپاتيتى - ۆيرۋسپەن لاستانعان ازىق-تۇلىك پەن سۋ ارقىلى جانە تۇرمىستىق بايلانىس كەزىندە ادامنان ادامعا جۇعادى. ۆ جانە س گەپاتيتى - قان ارقىلى، جىنىستىق قاتىناس كەزىندە جانە جۇكتىلىك كەزىندە انادان بالاعا جۇعادى. D گەپاتيتى - جەكە جۇقپايدى، ول تەك ۆ گەپاتيتىمەن بىرگە داميدى.
«اتالعان بارلىق ۆيرۋستار گەپاتيتتى تۋدىرادى، سالدارىنان ادامنىڭ تابەتى جوعالادى، دەنە قىزۋى كوتەرىلىپ، تەرى سارعايىپ، شەل پايدا بولۋى مۇمكىن. ۆ جانە س گەپاتيتتەرى سوزىلمالى تۇرگە اۋىسىپ، باۋىر تسيرروزىنا (%57 جاعدايدا) نەمەسە باستاپقى باۋىر وبىرىنا (%78 جاعدايدا) اكەپ سوعۋى مۇمكىن. قازاقستاندا سوڭعى 20 جىلدا ءجىتى ۆيرۋستىق گەپاتيتتەرمەن سىرقاتتانۋ كولەمى ازايىپ كەلەدى. رەسپۋبليكا بويىنشا جىل سايىن ءجىتى ۆيرۋستىق گەپاتيتتىڭ شامامەن 1 مىڭ جاعدايى، سوزىلمالى ۆيرۋستىق گەپاتيتتىڭ 5-6 مىڭ جاعدايى تىركەلەدى. سىرقات تانۋ رەسپۋبليكانىڭ بارلىق وڭىرلەرىندە تىركەلگەن»، - دەپ حابارلادى ورتالىقتان.
سونىمەن بىرگە، ۇلتتىق ورتالىق گەپاتيتتى جۇقتىرماۋدىڭ نەگىزگى قاعيدالارىن ۇسىندى.
ەڭ الدىمەن، ا جانە ۆ گەپاتيتىنە قارسى ەگىلۋ قاجەت. ساپالى تازا سۋ ءىشىپ، كوكونىستەر مەن جەمىس- جيدەكتەردى مۇقيات جۋىپ، تەرميالىق وڭدەۋدەن وتكىزۋ قاجەت. وسىلايشا ۆ گەپاتيتىنەن ساقتانۋعا بولادى.
ميكروسكوپيالىق مولشەردەگى قان ۇستارادا، ءتىس شەتكاسىندا، تىرناق الاتىن قايشىدا قالىپ كەتۋى مۇمكىن. بۇل زاتتاردى باسقالارمەن ورتاق قولدانباۋ كەرەك. ستەريلدەنبەگەن قۇرالدارمەن پيرسينگ جانە تاتۋيروۆكا جاساتپاعان ءجون. جىنىستىق قاتىناس كەزىندە ساقتانۋ شارالارىن قابىلداۋ قاجەت.
حالىققا ۆاكتسيناتسيا جۇرگىزۋ ارقىلى ا، ۆ جانە ە گەپاتيتىنىڭ الدىن الۋعا بولادى. ۆ جانە س گەپاتيتىمەن كۇرەستە - دونورلىق قاندى تەكسەرۋ، ستەريلدىك ينەكتسيالىق جابدىقتار جانە ينفەكتسيالىق باقىلاۋ بولعانى ءجون.
ايتا كەتەيىك، جىل سايىن، 28- شىلدەدە دۇنيەجۇزىلىك گەپاتيتپەن كۇرەس كۇنى اتالىپ وتتى.