بەيجىڭدە قازاق ءتىلىنىڭ مارتەبەسىن كوتەرگەن بايقاۋ ءوتتى - شەتەلدەگى قازاق ءتىلدى ب ا ق-قا شولۋ

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

بەيجىڭدە قازاق ءتىلىنىڭ مارتەبەسىن كوتەرگەن بايقاۋ ءوتتى - «جەنمين جيباو» (People Daily)

بەيجىڭ قالاسىنداعى ورتالىق ۇلتتار ۋنيۆەرسيتەتىندە، قىتايدىڭ جوعارى وقۋ ورىندارىندا وقىپ جاتقان وزگە ۇلت ستۋدەنتتەرى اراسىندا قازاق تىلىنەن رەسپۋبليكالىق بايقاۋ ءوتتى، دەپ حابارلايدى kazakh.people.com.cn سايتى.

«قىتايدا قازىرگى كۇنى وزگە ۇلت وكىلدەرىنىڭ اراسىندا قازاق ءتىلىن ۇيرەنۋگە دەگەن قۇلشىنىس ارتىپ كەلەدى. سوندىقتان دا قىتايدىڭ ورتالىق ۇلتتار ۋنيۆەرسيتەتى، شىڭجاڭ ۋنيۆەرسيتەتى، ىلە پەداگوگيكالىق ۋنيۆەرسيتەتى سەكىلدى تانىمالى ءبىلىم وردالارىندا وزگە ۇلت ستۋدەنتتەرىنە ارنالعان قازاق ءتىلىن ۇيرەتەتىن سىنىپتار اشىلعان. مىنە وسى وقۋ ورىندارىنىڭ ستۋدەنتتەرىنىڭ ءبىلىم دەڭگەيىن سىناۋعا ارنالعان، 2019 -جىلعى رەسپۋبليكالىق قازاق ءتىلى بايقاۋىن بەيجىڭدەگى ورتالىق ۇلتتار ۋنيۆەرسيتەتىنىڭ قازاق ءتىلى جانە ادەبيەتى فاكۋلتەتى ۇيىمداستىرعان. بۇل اتالعان جارىقسا بەيجىڭ شەتەل ءتىلى ۋنيۆەرسيتەتى، شىڭجان ۋنيۆەرسيتەتى، ىلە پەداگوگيكالىق ۋنيۆەرسيتەتى جانە ورتالىق ۇلتتار ۋنيۆەرسيتەتىنىڭ 26 ستۋدەنتى قاتىستى»، - دەپ جازادى People Daily.

اتالعان اقپارات كوزىنىڭ جازۋىنشا، قاتىسۋشىلاردىڭ دەڭگەيىن ءار قىرىنان سىناعان بايقاۋ بىرنەشە كەزەڭگە بولىنگەن. ولار جازباشا، اۋىزشا سىناق تاپسىرىپ، قىتاي، قازاق تىلدەرىندە اۋىزەكى اۋدارما جاساۋ، بەرىلگەن قازاقشا ءماتىندى جاتىق وقىپ، مازمۇنداپ بەرۋ، جاڭىلتپاش ايتۋ، ماقال- ماتەلدەردى اۋدارۋ، بەرىلگەن تاقىرىپ اياسىندا ماقالا جازۋ تۇرلەرى بويىنشا سىناقتاردان وتكەن.

«...وسىلايشا، ەكى كۇنگە جالعاسقان ءىس-شارا سوڭعى مارەسىنە جەتىپ، قازىلار القاسى قازاقتىڭ ءتىلىن جاقسى مەڭگەرىپ، شىن جۇيرىك ەكەندىگىن دالەلدەگەن جەڭىمپازداردى انىقتادى. بايقاۋدىڭ باس جۇلدەسىن شىڭجاڭ ۋنيۆەرسيتەتىنىڭ ستۋدەنتى ۋاڭ زىلي مەن ىلە پەداگوگيكالىق ۋنيۆەرسيتەتىنىڭ ستۋدەنتى فىڭ ليلي قانجىعالادى»، - دەپ جازادى قىتايلىق باق.

قازاقستاننىڭ «ەل ارنا» تەلەارناسىندا تۇرىك فيلمدەرى كورسەتىلە باستادى - TRT

تۇركيا مەن قازاقستان اراسىندا فيلم سالاسىندا كەلىسىم جاسالدى. قازاقستاننىڭ «ەل ارنا» تەلەارناسىندا تۇرىك فيلمدەرى كورسەتىلە باستادى، دەپ جازادى تۇركيا راديو تەلەۆيزيا پورتالى.

«حابار اگەنتتىگى» ا ق- نىڭ قۇرامىنداعى رەسپۋبليكالىق تەلەارنالاردىڭ ءبىرى «ەل ارنا» ۇيىمداستىرعان «تۇرىك فيلمدەرى اپتالىعى» اياسىندا 10 تۇرىك فيلمى قازاق كورەرمەندەرىنە ۇسىنىلادى.

قازاق كورەرمەندەرى ارالارىندا «ماحاببات پەن ءولىم ۋاقىتى» ، «سۋىق، جاڭبىر جاۋىپ تۇردى»، «120» جانە «موممو - قارىنداسىم» سياقتى تۋىندىلار بار فيلمدەردى قازاقشا دۋبلياجىمەن تاماشالايدى.

تۇرىك فيلم اپتالىعى كورسەتىلىمى تۇركيانىڭ قازاقستانداعى وكىلەتتى ەلشىلىگىنىڭ قولداۋىمەن جۇزەگە اسۋدا. تۇركيانىڭ قازاقستان ەلشىسى نيەۆزات ۋيانىك «ماقساتىمىز بۇل ءىس-شارامەن ەكى ەل اراسىنداعى مىقتى مادەني بايلانىسقا ۇلەس قوسپاق» دەدى.

قازاقستاننىڭ فيلم تەلەارناسى «ەل ارنا» تەلەديدارى تاراپىنان جۇزەگە اسىرىلاتىن تۇرىك فيلمدەرى اپتالىعى 10 كۇنگە جالعاسادى. اتالمىش فيلمدەر قازاقستان تەلەكانالىندا قازاق تىلىندە دۋبلياجبەن كورسەتىلەتىن العاشقى فيلمدەر بولۋ ەرەكشەلىگىنە يە.

قىتاي ەلى توكيو وليمپياداسىندا بوكسشى توقتاربەك تاڭاتقان ۇلىنا ءۇمىت ارتادى - قىتايدىڭ «ورتالىق حالىق راديوسى» (CNR)

قىتاي ەلى سەنىم ارتىپ، تاڭداۋ جاساعان بوكسشى توقتاربەك تاڭاتقان ۇلى توكيو-2020 وليمپيادا ويىندارىنا ىرىكتەۋ كەزەڭدەرىنەن سۇرىنبەي وتۋگە تىڭعىلىقتى دايىندالىپ جاتىر، دەپ حابارلايدى قىتايلىق kazakcnr.com سايتى.

اتالعان دەرەككوزىنىڭ جازۋىنشا، قىتاي مەملەكەتى الەمدىك دوداعا ۇكىلەپ قوسقالى وتىرعان، ەلدىڭ ۇزدىك بوكسشىسى، قانداسىمىز توقتاربەك تاڭاتقان ۇلى 1996 -جىلى قىتاي حالىق رەسپۋبليكاسىنىڭ التاي قالاسىندا تۋعان. توقتاربەك 10 جاسىنان باستاپ، قىتايداعى بەلگىلى باپكەر مۇرات بوشاي ۇلىنىڭ شاكىرتى اتانىپ، بوكستىڭ قىر-سىرىن مەڭگەرەدى.

«...توقتاربەك تاڭاتقان ۇلى 2011 -جىلى شىنجاڭ قۇراما كومانداسىنا قابىلدانعان. ول شىنجاڭ ولكەسىنىڭ ءۇش دۇركىن چەمپيونى، ق ح ر-دىڭ جاستار اراسىنداعى بىرىنشىلىگىندە باس جۇلدەنى دە قانجىعالاعان. سونداي-اق، 2017 -جىلى قىتاي چەمپيوناتىندا 75 كەلى سالماقتا قارسىلاسىن باسىمدىقپەن ۇتىپ، ەل چەمپيونى اتانعان. توقتاربەك تاڭاتقان ۇلى وسى جەڭىسىنەن كەيىن، 2017 -جىلى بوكستان قىتاي ۇلتتىق قۇراما كومانداسىنا قابىلدانادى. بۇگىنگى كۇنى ول قىتاي ۇلتتىق قۇراماسىنداعى 75 ك گ سالماق دارەجەسىندەگى ەڭ ۇزدىك بىلعارى قولعاپ شەبەرى اتانعان. سوندىقتاندا، توقتاربەك تاڭاتقان ۇلى قىتايدىڭ توكيو-2020 وليمپيادا ويىندارىنا جولداما جەڭىپ الۋىنا سەنىم ارتىپ، ۇكىلەپ قوساتىن بوكسشىسى مارتەبەسىن يەلەنىپ وتىر»، - دەپ جازادى CNR.

نۇر-سۇلتاندا جاڭارتىلاتىن قۋات كوزدەرى تۋرالى ءۇشىنشى وتىرىس وتەدى - «فارس» اقپارات اگەنتتىگى

قازاقستاننىڭ ەنەرگەتيكا مينيسترلىگى نۇر-سۇلتان قالاسىندا ءارتۇرلى ەلدەردەن 300 وكىلدىڭ قاتىسۋىمەن جاڭارتىلاتىن قۋات كوزدەرى تۋرالى ءۇشىنشى وتىرىس (Renewable Energy Summit 2019) وتەتىنىن حابارلادى، دەپ جازادى parstoday اقپارات اگەنتتىگى.

Fars اقپارات اگەنتتىگىنىڭ حابارلاۋىنشا، قازاقستاننىڭ ەنەرگەتيكا مينيسترلىگى بۇل وتىرىستى وتكىزۋدەگى ماقساتتىڭ قايتا قالپىنا كەلەتىن قۋات كوزدەرىن پايدالانۋ ماسەلەلەرىن تالقىلاۋ جانە ءوز ەلى مەن الەمدىك قاۋىمداستىقتىڭ جاسىل بولاشاعىن جاساۋعا ايتارلىقتاي ۇلەس قوسۋ ءۇشىن ەڭ ۇزدىك ءارى ءتيىمدى شەشىمدەر قابىلداۋ ەكەنىن مالىمدەدى.

بۇل جوبادا، سونداي-اق، قالپىنا كەلەتىن قۋات كوزدەرى سالاسىندا تاجىريبەمەن الماسۋ ءۇشىن ساراپشىلار، ينۆەستورلار مەن بىلىكتى مامانداردى قازاقستانعا تارتۋ قاراستىرىلعان.

بۇل وتىرىس قازاقستاننىڭ ەنەرگەتيكا اپتالىعى (Kazakhstan Energy Week 2019 (KEW-2019) اياسىندا وتەدى.

وزبەكستان موڭعوليامەن ەكونوميكالىق بايلانىستاردى نىعايتپاق - «ءوزا» اقپاراتتىق اگەنتتىگى

وزبەكستان موڭعوليامەن ەكونوميكالىق بايلانىستاردى نىعايتپاق. بۇل جايىندا وزبەكستان رەسپۋبليكاسى پرەزيدەنتىنىڭ جارلىعى جاريالاندى، دەپ حابارلايدى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

اتالعان اقپارات كوزىنىڭ جازۋىنشا، جارلىقتا، وزبەكستان رەسپۋبليكاسى موڭعوليا رەسپۋبليكاسىمەن ەكونوميكالىق بايلانىستاردى نىعايتۋعا قاراتىلعان نەگىزگى باعىتتار كورسەتىلگەن. وندا،

- وزبەكستان مەن موڭعوليا اراسىندا اۋە جولدارى مەن ترانسپورت قاتىناسىن اشۋ؛

- وزبەكستاننان موڭعولياعا كوكەنىس جانە داقىلدار، قاۋىن، ءجۇزىم جانە باسقا دا ونىمدەردى جەتكىزۋ؛

- موڭعوليادان وزبەكستانعا ەت جانە ەت ونىمدەرى مەن باسقا قاجەتتى زاتتاردا اكەلۋ كوزدەلگەن.

قۇجاتتا، «وزبەكستان اۋە جولدارى» ۇلتتىق اۆياكومپانياسى تاراپىنان موڭعوليا رەسپۋبليكاسىنا باعىتتالعان اۋە جولدار ءدالىزى ءبىر اي ىشىندە اشىلسىن. سونداي-اق تاۋارلاردى تاسۋ جانە ول مەملەكەتتەن اكەلىنەتىن ەت جانە ەت ونىمدەرىن اكەلۋدە كورسەتىلەتىن قىزمەتتەرى قولايلى باعادى جۇزەگە اسىرىلسىن»، - دەپ كورسەتىلگەن.

اۆتور: باقىتجول كاكەش