سيريادان ەلگە ورالعان اقتوبەلىك ايەل سوتتالدى

اقتوبە. قازاقپارات - سيريادان ەلگە ورالعان زارينا اقمالايەۆا قىلمىستىق كودەكستىڭ «تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ»، «الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە دىني الاۋىزدىقتى قوزدىرۋ» باپتارى بويىنشا ايىپتالدى، دەپ حابارلايدى قازاقپارات ءتىلشىسى.

اقتوبە قالالىق №2-سوتىندا «جۋسان» وپەراتسياسى اياسىندا ەلگە جەتكىزىلگەن سوتتالۋشى زارينا اقماليەۆاعا قاتىستى قىلمىستىق ءىس قارالدى. 30 جاستاعى كەلىنشەكتىڭ ەكى بالاسى بار. ءبىرى اقتوبەدە، ەكىنشىسى سيريا ەلىندە ومىرگە كەلگەن.

«2011 -جىلى اجىراسقانمىن. ەكى بالام بار. ءبىرى 11، ەكىنشىسى 2 جاستا. سيرياعا كەتكەندە ۇلكەن قىزىمدى وزىممەن بىرگە الىپ كەتتىم. قازىر ەكى قىزىم دا انامنىڭ تاربيەسىندە. ولاردىڭ ناعاشى اجەسىنىڭ تاربيەسىندە بولعانىن قالايمىن. ءوزىم مەكتەپ بىتىرگەن سوڭ تۇرمىسقا شىقتىم، ساتۋشى بولىپ جۇمىس ىستەدىم، جوعارى ءبىلىم المادىم»، - دەدى سوتتالۋشى ز. اقمالايەۆا.

سوت وتىرىسى كەزىندە اۋديو، ۆيدەو ءتۇسىرىلىم جاساۋعا تىيىم سالىندى. پروكۋرور باۋىرجان قالي دا ءوزىن فوتوعا تۇسىرۋگە قارسىلىق تانىتتى.

«زارينا اقمالايەۆاعا قىلمىستىق كودەكستىڭ «تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ»، «الەۋمەتتىك، ۇلتتىق، رۋلىق، ناسىلدىك، تەكتىك- توپتىق نەمەسە ءدىني الاۋىزدىقتى قوزدىرۋ» باپتارى بويىنشا ايىپ تاعىلدى. ول 2014 -جىلدىڭ 23 -ماۋسىمدا استانا قالاسىنان «استانا - ىستانبۇل» اۋە رەيسىمەن تۇركياعا ۇشىپ كەتتى. ءارى قاراي سيرياعا باردى. 2015 -جىلدىڭ 15 -قاراشاسى كۇنى ساعات 18:30-دا تەرروريزمدى ناسيحاتتايتىن، ءدىني الاۋىزدىق تۋدىراتىن ءماتىندى «WhadsApp» مەسسەندجەرى ارقىلى جىبەردى. ءماتىنى «حيترىي پلان»، «نوۆىە مەتودى» «سۆەجيە رانى» دەپ باستالىپ، «نا دجيھاد ۆىحوديتە» دەپ اياقتالعان. 2015 -جىلدىڭ 27 -قاراشاسىندا ساعات 22:58-دە ءوز تەلەفونىنان اناسىنا حات جىبەردى. وندا دا «يا سوۆەتۋيۋ ۆام يدتي نا دجيھاد» دەگەن ءسوز جازىلعان. 2016 -جىلدىڭ 22-قاڭتارىندا اناسىنا تەرروريزمدى ناسيحاتتاعان اۋديو جازبا جولداعان. حابارلامالار ساادا قالاسىنان جىبەرىلگەن»، - دەدى پروكۋرور باۋىرجان قالي.

ايىپتاۋ قورىتىندىسىنا سۇيەنسەك، ماتىنگە ساراپتاما جاسالىپ، تەرروريزمدى ناسيحاتتاعانى دالەلدەندى.

ايتا كەتەيىك، پروكۋرور مەن سوتتالۋشى زارينا اقمالايەۆا پروتسەسۋالدىق كەلىسىمگە كەلدى. پروكۋرور سوتتالۋشىنى 5 جىل باس بوستاندىعىنان ايىرىپ، قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەسىندە جازاسىن وتەۋ ۇكىمىن تاعايىنداۋدى سۇرادى.

«زارينا اقمالايەۆا ايىپتى دەپ تانىلىپ، 5 جىلعا باس بوستاندىعىنان ايىرۋ جازاسى تاعايىندالسىن. جازاسىن قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەسىن»، - دەدى سۋديا اليما ءادىلوۆا. ەكى بالانى ناعاشى اناسىنا قالدىرۋ ءىسى 29-شىلدە كۇنى يۋۆەنالدى سوتتا قارالادى. بالالاردىڭ كىمدە قالاتىنىن قورعانشىلىق ورگاندارى شەشەدى.

ەسكە سالساق، بۇعان دەيىن «جۋسان» وپەراتسياسى اياسىندا ەلگە جەتكىزىلگەن اقمارال الماعامبەتوۆامەن جاڭا پروتسەسۋالدىق كەلىسىم جاساۋ ءۇشىن ءىس پروكۋراتۋراعا قايتا جىبەرىلگەن بولاتىن.

اۆتور: التىناي ساعىندىقوۆا