قاراعاندىلىق جۇرگىزۋشىلەردىڭ قانداي ءتارتىپتى ءجيى بۇزاتىنى انىقتالدى

قاراعاندى. قازاقپارات - رەسپۋبليكالىق ماڭىزى بار «قىزىلوردا- پاۆلودار» اۆتوجولىنىڭ بولىگىندەگى ساران تاس جولىندا «ۋراگان» اۆتوكەشەنىنىڭ ۋاقىتشا پوليتسيا بەكەتى ورناتىلدى، دەپ حابارلايدى قازاقپارات ءتىلشىسى.

رەسپۋبليكالىق «قاۋىپسىز جول» جەدەل-الدىن الۋ ءىس-شاراسى اياسىندا موبيلدىك توپ قۇرامى قاراعاندى قالاسىندا جۇمىس ىستەدى.

ءىس-شارانىڭ ءبىرىنشى كۇنى جول قوزعالىسى ەرەجەسىن بۇزۋعا قاتىستى 540 فاكتى انىقتالدى. ءتارتىپ بۇزۋشى جۇرگىزۋشىلەر نەگىزىنەن جىلدامدىقتى اسىرعان. سونىمەن قاتار، جالعان ءنومىرى بار اۆتوكولىكتى باسقارۋ، ءاۆتوموبيلدى زاڭسىز جابدىقتاۋ، قاراما-قارسى جولاققا شىعىپ كەتۋ، باعدارشامنىڭ تىيىم سالاتىن بەلگىسىنە ءوتۋ جانە كولىكتى ماس كۇيدە جۇرگىزۋگە قاتىستى فاكتىلەر تىركەلدى.

ءبىر جىل بۇرىن، 2018 -جىلعى 27 -شىلدەدە ۆەدومستۆوارالىق جەدەل كەڭەستە وبلىس اۋماعىندا جولاۋشىلاردى، باگاجدى زاڭسىز تاسىمالداۋدىڭ جولىن كەسۋ جانە ستيحيالىق تۇراقتاردى جويۋ ماسەلەسى قارالعان. اتالعان كەڭەستە ءبىرقاتار تاپسىرما بەرىلدى. وسىعان بايلانىستى، قاراعاندى وبلىسى پد جەرگىلىكتى پوليتسيا قىزمەتى باسقارماسى جولاۋشىلار مەن باگاجدى زاڭسىز تاسىمالداۋدىڭ جولىن كەسۋ بويىنشا بىرلەسكەن ءىس- شارالار جوسپارىن ازىرلەدى.

اتالعان جوسپاردى كولىكتىك باقىلاۋ ينسپەكسياسى، قاراعاندى وبلىسىنىڭ اۆتوموبيل جولدارى جانە جولاۋشىلار كولىگى باسقارماسى، قاراعاندى وبلىسىنىڭ مەملەكەتتىك كىرىستەر دەپارتامەنتى، قاراعاندى وبلىسىنىڭ پد اكىمشىلىك پوليتسيا باسقارماسى جانە قاراعاندى كولىك پروكۋراتۋرالارى كەلىسىپ جانە بەكىتتى.

اتالعان جوسپاردىڭ ءىس-شارالارىن ىسكە اسىرۋ ءۇشىن موبيلدىك توپ قۇرىلدى. قازىرگى ۋاقىتتا توپ مۇشەلەرى جولداعى كەمشىلىكتەر مەن زاڭ بۇزۋشىلاردى انىقتاۋدى جالعاستىرۋدا.

اۆتور: اگاتا مۋحامەدجانوۆا