الماتى مەن شىمكەنتتە ارنايى وپەراتسيا كەزىندە كىمدەر ۇستالدى؟

نۇر-سۇلتان - قازاقپارات - ۇلتتىق قاۋىپسىزدىك كوميتەتى اتىس قارۋىن ساتۋمەن اينالىسقانداردى قولعا تۇسىرگەن، - دەپ حابارلايدى «ك ت ك» ءتىلشىسى.

قىلمىستىق توپقا قاتىسى بار الماتى جانە شىمكەنت قالالارىنىڭ تۇرعىندارى ۇستالدى. ارنايى وپەراتسيا بارىسىندا 8 كالاشنيكوۆ اۆتوماتى مەن 2 تاپانشا تاركىلەنگەن. كۇدىكتىلەر قارۋ- جاراقتار مەن وق-دارىلەردى ەل اۋماعىندا زاڭسىز الىپ ءجۇرىپتى.

ەلگە قاۋىپ توندىرگەندەردىڭ تاعى قانداي جوسپارى بولعان؟ اپتا ورتاسىندا عالامتوردا تارالعان ۆيدەو كوپتىڭ قىزىعۋشىلىعىن تۋدىردى. ۆيدەوجازباعا قاتىستى ءتۇرلى پايىم جاساعاندار كوپ.

وسىدان ءبىراز جىل بۇرىن «سىرا پاتشاسى» اتانعان توقتار تولەشوۆتى قۇرىقتاۋ وپەراتسياسىنىڭ قالاي جۇرگىزىلگەنىن شىمكەنتتىكتەر ءالى ۇمىتپادى.

بۇل جولى دا كەزەكتى وپەراتسيا جۇرتتى ەلەڭ ەتكىزدى. سان ساۋال مەن كۇماندى ويلارعا قاتىستى ناقتى جاۋاپتى ۇلتتىق قاۋىپسىزدىك كوميتەتى بەردى.

قۇپيا قىزمەت وكىلدەرى وڭتۇستىكتە زاڭسىز قارۋ ساۋداسىمەن اينالىسقانداردى ۇستاعانىن مالىمدەدى.

تاپا-تال تۇستە قارۋ-جاراق ساۋداسىنا قاتىستى ۇستالعان ەر ادامنىڭ اتى-ءجونى - كونستانتين درەيلينگ. جاسى 33 تە. بۇزاقىلىق جاساعانى ءۇشىن بۇرىن ەكى رەت سوتتالعان. ول ارام ويىن جۇزەگە اسىرۋ كەزىندە ۇنەمى قارۋ-جاراق اسىنىپ جۇرەدى ەكەن.

مۇنىسى پوليتسەيلەرگە اۋەلدەن ايان. سوندىقتان تۇرمەدەن شىقسا دا كوزدەن تاسا قالدىرماپتى. بەكەر قاۋىپتەنبەگەن ەكەن.

«اك-47 اۆتوماتىنىڭ جاڭا مودەلىن ساتامىن. وعان سۇرانىس كوپ. اسىرەسە، پلاستيكتەن جاسالعان نۇسقاسى ىڭعايلى»، - دەدى كۇدىكتى كونستانتين درەيلينگ.

ۇلتتىق قاۋىپسىزدىك كوميتەتى قارۋ-جاراق كونترابانداسىمەن اينالىساتىنداردى تىڭعىلىقتى زەرتتەگەن. كونستانتين درەيلينگ ۇيىمداسقان قىلمىستىق توپتىڭ بەلدى مۇشەسى.

باسقاشا ايتقاندا، شىمكەنتتە وتىرىپ قارۋ-جاراق ساتىپ الۋشىلارمەن بايلانىسقا شىققان. اۆتومات، تاپانشا ىزدەگەندەرمەن تىكەلەي كەلىسسوز جۇرگىزىپتى. ءدال وسىعان ۇقساس وپەراتسيا الماتىدا پرەزيدەنت سايلاۋىنىڭ الدىندا ءوتتى.

ماۋسىمدا جۇمايەۆقا سوققى بەرىلىپ، گراناتالار، وق-دارىلەر مەن پۋلەمەتتەر تاركىلەندى. قارۋ-جاراق ساتۋشى 1 تاپانشانى 600 دوللارعا باعالاعان. بۇل كۇددى ءبىر بويەۆيك فيلمدەردەگى كورىنىستى ەسكە تۇسىرەدى.

ارتىنشا مافيانىڭ باسشىسى مىنگەن كولىك دەرەۋ توقتاتىلىپ، ءوزى تەرگەۋ يزولياتورىنا توعىتىلدى. ال شىمكەنتتە اق ماشينادا وتىرعاندار وزدەرىنىڭ ىزىنە ۇلتتىق قاۋىپسىزدىك كوميتەتى تۇسكەنىنەن بەيحابار. قىلمىس الەمىنىڭ سەركەسى رۋسلان يبراگيموۆ تىرپ ەتپەستەن ۇستالدى.

ال ونىڭ ەسكا ەسىمدى دوسى تۇرمەدە وتىر. بۇرىن ەكەۋى وڭتۇستىكتەگى بيزنەسمەندەردى قورقىتىپ-ۇركىتىپ اقشا الىپ، كەيبىرىنە «قارىزىن قايتارۋعا» كومەكتەسكەن.

سالافيتتەرگە قوسىلعان يبراگيموۆ قارۋ-جاراق ساۋداسىن قىزدىرعان. ونى اڭدۋ ءىسى ۇزاق جۇرگىزىلىپتى. ءتىپتى ونى ءوزى سەزبەدى. جان-جاقتان جيناستىرىلعان ايعاقتار وعان اۋىر جازاعا تاعايىنداۋى مۇمكىن.

ۆيدەودا ول كليەنتكە كالاشنيكوۆ اۆتوماتىن 3000 دوللارعا ساتىپ وتىر. گراناتانىڭ قۇنى - 50 مىڭ تەڭگە. وعان قوسا اتىس-شابىستى ۇيرەتۋ تەگىن. اقشانى قالتاعا باسقان يبراگيموۆ كليەنتكە بارلىعىن تاپتىشتەپ ءتۇسىندىرىپ الەك.

ءتىپتى گراناتانى قالاي لاقتىراتىنىن دا قولىمەن كورسەتىپ ءوتتى. مۇنىڭ ءبارى جاسىرىن كامەراعا جازۋلى. ال، ساقالدى يۋري رازين دە قارۋ ساتاتىنداردىڭ ءبىرى. 31 جاستاعى شىمكەنتتىك تۇرعىن قالانىڭ قاق ورتاسىندا ساتقان اۆتوماتتاردىڭ جارتى اقشاسىن الىپ جاتقان جەرىندە ۇستالدى.

وعان دەيىن تاپسىرىس بەرۋشىمەن جارىلعىش زاتتاردى جەتكىزەتىنىن تالقىلادى. سۇرانىسقا يە كالاشنيكوۆ اۆتوماتىن اكەلۋگە 3 اپتا كەتەتىن دە جاسىرمادى.

«زاڭسىز قارۋ-جاراق جيناۋمەن اينالىستىم. كوبىنە رۋسلان يبراگيموۆكە كالاشنيكوۆ اۆتوماتىن ساتتىم. كىنامدى مويىندايمىن. بۇل ىسىمە شىن وكىنەمىن»، - دەدى كۇدىكتى يۋري رازين.

زاڭسىز قارۋ ساتۋمەن اينالىساتىندار ساتقان قۇرالداردا ەسەپ جوق. تارالىپ كەتكەن ارسەنالمەن ەلدە سوعىس اشۋعا بولادى. بۇل جاعداي ءبارىن الاڭداتادى. سوندىقتان ەلىمىزدەگى بارلىق قالادا ۇلتتىق قاۋىپسىزدىك كوميتەتى كۇنى-ءتۇنى جەدەل وپەراتسيا جۇرگىزىپ جاتىر.

شىمكەنتتە ۇيىمداسقان قىلمىستىق توپ پەن الماتىدا يسمايل جۇمايەۆتىڭ تاعى ءبىر سىبايلاسى قولعا ءتۇستى.

«ساكەن بورانوۆقا قارۋ-جاراقتى تاسىمالداپ وتىردىم. يسمايل جۇمايەۆقا 13 تاپانشا ساتتىم. كىنامدى تولىق مويىندايمىن»، - دەدى كۇدىكتى نازير بەكيروۆ.

بەيبىت ەلدە جاپپاي قارۋلانعانداردىڭ تۇپكى پيعىلى قانداي؟ ونى ساتىپ العاندار قىلمىستىق، ءدىني نەمەسە ساياسي توپتىڭ سەركەلەرى مە؟ بىرنەشە قالاداعى جەدەل وپەراتسيادان كەيىن تۋىنداعان باستى سۇراق وسى. ازىرگە ونى ۇلتتىق قاۋىپسىزدىك كوميتەتى قۇپيا ۇستاپ وتىر.