ديماشتىڭ ەلورداداعى كونسەرتىندە بولعان شەتەلدىكتەر قازاقستانعا قايتا كەلمەك
شەتەلدىك جانكۇيەرلەر ءانشىنىڭ كونسەرتىنەن كەيىن الماتى قالاسىندا بولىپ، ونىڭ كورىكتى جەرلەرىن تاماشالاپ قايتقان. فرانسۋزدار اسىرەسە قازاقستاندىقتاردىڭ اقپەيىلدىلىگى مەن ەلىمىزدىڭ اسەم تابيعاتى ۇلكەن اسەر ەتكەنىن ايتادى. فان-كلۋبتىڭ بارلىق دەرلىك مۇشەلەرى كەلەسى ەڭبەك دەمالىستارىندا ەلىمىزگە قايتا كەلۋدى شەشىپ وتىر.
«قازاقستاندا ءوز ەلىمىزدە جۇرگەندەي سەزىندىك. ءبىزدى وتە جاقسى قارسى الدى. قازاق ەلى اسەم تابيعاتىمەن جانە حالقىنىڭ قوناقجايلىعىمەن ەستە قالدى. سوندىقتان قازاقستاندى قايتا بارىپ كورگىمىز كەلەدى»، - دەيدى ديماشتىڭ جانكۇيەرلەرى كلۋبىنىڭ اكىمشىسى ساندرا سكاماروني.
«مەن ءسىزدىڭ ەلىڭىزدى ديماش ارقىلى تانىدىم. ونىڭ قازاقستاندى كەلىپ كورۋگە شاقىرۋى وتە دۇرىس. سەبەبى، ءسىزدىڭ ەلدىڭ تاريحى، مادەنيەتى باي. باتىستا ءوزىمىزدىڭ تامىرىمىزبەن بايلانىستى جوعالتىپ الدىق دەسەك بولادى. ال قازاقستاندا ۇلتتىق كيىم كيىپ، ات ءمىنىپ جۇرگەن ادامداردى كوردىك. مۇنى ساقتاۋ كەرەك»، - دەدى جانكۇيەرلەر كلۋبىنىڭ مۇشەسى سيلۆي گالدەانو.