ق ر ءى ءى م قورىقشىنى ولتىرگەن كۇدىكتىلەردى قالاي تاپقانىن ايتىپ بەردى

نۇر- سۇلتان. قازاقپارات - ءتارتىپ ساقشىلارى اقمولا وبلىسىنىڭ اۋماعىندا قورىقشىنى ولتىرگەندەردى اۋەدەن جانە ءۇش وبلىس اۋماعىنداعى جولداردان ىزدەستىرگەن، دەپ حابارلايدى قازاقپارات ق ر ءى ءى م باسپا ءسوز قىزمەتىنە سىلتەمە جاساپ.

ىشكى ىستەر ءمينيسترى ەرلان تۇرعىمبايەۆتىڭ مالىمدەۋىنشە، ينسپەكتورلارعا شابۋىل جاساعان قىلمىسكەرلەردى انىقتاۋ جانە ۇستاۋ ءۇشىن رەسپۋبليكا بويىنشا «ۇستاۋ» وپەراتسياسى جۇرگىزىلگەن. قولداعى دەرەكتەر بارلىق ايماقتارعا جونەلتىلگەن.

«وقيعا ورنىنا جاقىن ورنالاسقان اقمولا، قوستاناي جانە سولتۇستىك قازاقستان وبلىستارىنىڭ جەكە قۇرامى دەرەۋ كۇشەيتىلگەن قىزمەتكە كوشتى. وبلىستىق جانە رەسپۋبليكالىق ماڭىزى بار اۆتوجولدارعا بلوك- بەكەتتەر قويىلدى، ءۇش وبلىستىڭ جولدارى بويىمەن جەدەل- ىزدەستىرۋ توپتارى جىبەرىلدى. ىزدەستىرۋ جۇمىستارىنا ءى ءى م ت ج ك تىكۇشاقتارى، ءى ءى م كريمينالدىق پوليتسيا دەپارتامەنتىنىڭ جانە «ارلان» ارنايى بولىمشەسىنىڭ قىزمەتكەرلەرى قاتىستى»، - دەدى ىشكى ىستەر ءمينيسترى ەرلان تۇرعىمبايەۆ.

جوسپارلانعان ءىس- شارالاردىڭ ناتيجەسىندە كۇدىكتى انىقتالىپ، قاماۋعا الىنعان.

«جەدەل- ىزدەستىرۋ شارالارىنىڭ ناتيجەسىندە ارقالىق قالاسىنىڭ تۇرعىنى كۇدىكتى رەتىندە انىقتالىپ ۇستالدى. سونداي- اق، قىلمىس بولعان تۇستان 20 شاقىرىمداي جەردەن «نيۆا» ماركالى اۆتوكولىك تابىلدى. قازىرگى ۋاقىتتا كۇدىكتىگە قاتىستى تەرگەۋ امالدارى جۇرگىزىلۋدە. قىلمىس قۇرالى مەن وق- دارىلەر تاركىلەندى. ءبىرقاتار كريميناليستىك ساراپتامالار تاعايىندالدى. بۇل قىلمىسقا باسقا دا قاتىسۋشىلاردىڭ بار- جوعى تەكسەرىلۋدە»، دەدى ىشكى ىستەر ءمينيسترى ەرلان تۇرعىمبايەۆ.

قورىقشى ق. س. نۇرتازينوۆتىڭ ولىمىنە جانە قورىقشى س. ك. وسپانوۆتى ءولتىرۋ ارەكەتىنە بايلانىستى ق ر ق ك- ءنىڭ 99-بابى، 2- ءبولىمى بويىنشا قىلمىستىق ءىس قوزعالعان.

سونىمەن بىرگە ىشكى ىستەر ءمينيسترى ەرلان تۇرعىمبايەۆ ىشكى ىستەر ورگاندارىنىڭ براكونەرلىكتىڭ الدىن الۋ جانە جولىن كەسۋ بويىنشا اتقارىپ جاتقان جۇمىستارى تۋرالى حابارلادى.

جىل باسىنان بەرى كيىكتەردى براكونەرلىك جولمەن اۋلاۋ فاكتىسى بويىنشا 37 قىلمىستىق ءىس قوزعالدى، 32 ادام ۇستالدى، 634 كيىك ءمۇيىزى، قىلمىس قۇرالدارى، سونداي- اق، 13 ءبىرلى اۆتوكولىك جانە 19 اتىس قارۋى الىندى. كەلتىرىلگەن شىعىن كولەمى 1,3 ميلليارد تەڭگەدەن استى.

«براكونەرلىك ءۇشىن اكىمشىلىك جانە قىلمىستىق جاۋاپكەرشىلىكتى كۇشەيتۋ، ونىڭ ىشىندە مۇلىك پەن قىلمىس قۇرالىن تاركىلەۋ تۋرالى ۇسىنىستار ەنگىزىلدى. تابيعات جانە جان- جانۋارلار الەمىنە قاتىستى زاڭداردى بۇزۋشىلار كەلتىرگەن زيان ءۇشىن وندىرىلەتىن وتەماقى مولشەرىن ارتتىرۋ ماسەلە دە پىسىقتالۋدا. ورمان شارۋاشىلىعى جانە جان- جانۋارلار الەمىن قورعاۋ بولىمشەلەرىنىڭ كولىكتەرىن ارنايى جارىق جانە دىبىس سيگنالدارىمەن جابدىقتاپ، بىلگىلى ءبىر تۇسكە بوياۋ ماسەلەسى ازىرلەندى»، دەلىنگەن حابارلامادا.

ەسكە سالا كەتسەك، كەشە اقمولا وبلىسىنىڭ جارقايىڭ اۋدانىندا كيىك اۋلاعاندار ىزىنە تۇسكەن ەكى ينسپەكتوردى اتىپ جاراقاتتاعان. كەيىنىرەك جاراقات العان قورىقشىنىڭ ءبىرى قايتىس بولعانى حابارلاندى.

مەملەكەت باسشىسى قاسىم- جومارت توقايەۆ براكونەرلەردىڭ قولىنان قازا تاپقان ازاماتتىڭ وتباسىنا كوڭىل ايتا وتىرىپ كيىكتەردى اتقانى ءۇشىن جازانى كۇشەيتۋدى تاپسىردى. ال ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ پرەزيدەنت تاپسىرماسىنا سايكەس قىلمىستىق زاڭناما كۇشەيتىلەتىنىن ءمالىم ەتتى.