تۇتىنۋشىلاردىڭ قۇقىعىن قورعاۋ دەپارتامەنتى باسشىسىنىڭ ورىنباسارى سوتتالدى

نۇر-سۇلتان. قازاقپارات - قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىستىق دەپارتامەنتى تۇتىنۋشىلاردىڭ قۇقىعىن قورعاۋ دەپارتامەنتى باسشىسىنىڭ ورىنباسارى ا. تۇرعانبايەۆقا قاتىستى سوتقا دەيىنگى تەرگەۋ جۇمىستارى اياقتالدى، دەپ حابارلايدى قازاقپارات.

تۇرعانبايەۆ قول استىنداعى قىزمەتكەرلەردەن جۇمىستا «قامقورلىق» جاساۋ ءۇشىن 100 مىڭ تەڭگە كولەمىندە پارا العان. سونداي-اق، سانيتارلىق تۇجىرىم ۇسىنعانى ءۇشىن جەكە بالاباقشا وكىلىنىڭ 200 مىڭ تەڭگەسىن الاياقتىق جولمەن يەمدەنگەن.

بيىل 22 -شىلدەدە №2-قىزىلوردا قالالىق سوتىنىڭ ۇكىمىمەن تۇرعانبايەۆقا 3 ميلليون تەڭگە كولەمىندە ايىپپۇل سالىندى.

سوت وعان ايىپپۇلدى تولەۋ ءۇشىن 1 اي ۋاقىت بەردى. تولەمەگەن جاعدايدا باس بوستاندىعىنان ايىرىلادى.

سوتتالۋشى ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى.