فۋتبول: «استانا» ەۋروپا ليگاسىندا «سانتا-كولومامەن» تەڭ ءتۇستى
ەلوردالىق «استانا» سىرت الاڭدا اندوررانىڭ «سانتا-كولوما» كومانداسىمەن كەزدەستى، دەپ حابارلايدى قازاقپارات ءتىلشىسى.
«سانتا-كولوما» جارىستى اتالمىش ءتۋرنيردىڭ الدىن الا ىرىكتەۋ ساتىسىنان باستادى. الدىمەن، الدىن الا ىرىكتەۋدىڭ جارتىلاي فينالىندا سان-مارينونىڭ «تيرە پەننە» كومانداسىن 1:0 ەسەبىمەن جەڭىپ، ودان كەيىن فينالدا كوسوۆونىڭ «فەررونيكەلي» كلۋبىنا 1:2 ەسەبىمەن جول بەردى. وسىلايشا، ەۋروپا ليگاسى ەكىنشى ىرىكتەۋ ساتىسىنا قاتىساتىن بولدى.
بۇگىنگى «استانا» - «سانتا-كولوما» ماتچى اندوررا-لا-ۆەليا ەلدى مەكەنىندەگى 1600 ادام سياتىن «كومۋنال» ستاديونىندا ءوتتى. بۇل ەلدى مەكەندە 3 مىڭعا تارتا ادام تۇرادى.
«سانتا-كولوما» «استاناعا» لايىقتى قارسىلىق كورسەتە الدى. ءبىرىنشى كەزەڭدە ويىن تىزگىنى نەگىزىنەن ەلوردالىق فۋتبولشىلار قولىندا بولدى. دەسە دە، الاڭ يەلەرى قارسى شابۋىل ۇيىمداستىردى. بۇل كەزەڭدە «استانانىڭ» گول سوعاتىن ەكى مۇمكىندىگى بولعان ەدى. دەگەنمەن، ونى ەلوردالىق فۋتبولشىلار ورىنداي العان جوق. ونىڭ بىرىندە دوپ قاقپا باعاناسىنا ءتيىپ، كەيىن سەرپىلدى. ەكىنشىسىندە الاڭ يەلەرىنىڭ قاقپاشىسى ابجىلدىك تانىتتى. كەزدەسۋ 0:0 ەسەبىمەن تەڭ اياقتالدى.
ەندى ەكى كوماندا 1- تامىزدا قارىمتا ويىن وتكىزەدى. بۇل كەزدەسۋ نۇر-سۇلتان قالاسىندا وتەدى. جەڭىمپاز كوماندا جارىستىڭ كەلەسى ساتىسىندا بۇگىنگى تاڭدا چەمپيوندار ليگاسى ەكىنشى ساتىسىندا سىنعا ءتۇسىپ جاتقان «فەرەنتسۆاروش» (ۆەنگريا) جانە «ۆاللەتتا» (مالتا) جۇبىنىڭ جەڭىلگەن كومانداسىمەن شەبەرلىك بايقاسادى.
سونداي-اق، ەۋروپا ليگاسى ەكىنشى ىرىكتەۋ كەزەڭىندە 25- شىلدەدە سىرت الاڭدا الماتىنىڭ «قايراتى» «حاپوەل» (بەزر-شيەۆا)، شىمكەنتتىڭ «ورداباسى» كلۋبى چەحيانىڭ «ملادا-بولەسلاۆ» كومانداسىمەن كەزدەسەدى.