يزرايلدە مەدۋزالاردىڭ كەسىرىنەن جاعاجايلار قاڭىراپ قالدى
مەدۋزالار بىرنەشە ادامدى شاققاننان كەيىن جۇرت سۋعا شومىلۋدان اۋلاق. وسى ەلگە دەمالۋدى جوسپارلاعاندار وسى جاعدايدى ەسكەرۋى ءتيىس. شىلدەنىڭ مي قايناتار ىستىعىنا قاراماستان، حايفا جاعاجايلارىندا حالىق سانى تىم ازايىپ كەتتى. بۇرىنعىداي ەمەس. ءتىپتى تولقىن سوقپاسا دا، سۋ جىلىسا دا، دەمالۋشىلار تەڭىزگە جولاعىسى كەلمەيدى. ماسەلە - مەدۋزادا بولىپ تۇر.
«دەنەسى ىركىلدەگەن ءمولدىر ءتۇستى تەڭىز جاندىگىنىڭ كەيبىر ءتۇرى ادامعا قاۋىپتى»، - دەيدى ماماندار.
دور ەدەليست، تەڭىز ەكولوگى:
- بيىل مەدۋزالار ءۇيىرى ارالاس. دەگەنمەن كوبىسى – شامامەن % 90- ءى ەڭ تاراعان روپيلەما نوماديكا تۇرىنە جاتادى. ول ادامعا قاۋىپتى. كولەمى جاعىنان ءىرى، كەيدە ديامەترى ءبىر مەترگە دەيىن جەتەدى.
ايتا كەتەر ءبىر جايت، مەدۋزانىڭ تىكەلەي شاعۋى عانا ەمەس، ۇلكەن مولشەردە سۋعا شاشاتىن جاسۋشالارى دا قاۋىپتى. ادامعا تيسە، قاتتى كۇيدىرىپ جىبەرۋى مۇمكىن.
بۇل جىلدا قايتالاناتىن قۇبىلىس. ادەتتە مەدۋزالار شىلدە ايىندا جاعاعا جاقىندايدى. تەڭىزدىڭ ءبىر تەكشە مەترىندە وسىنداي 10 جاندىك بولۋى مۇمكىن. سۋ ىشىندە دەنەڭە تيگەندە توكتىڭ شاعىن رازريادى ۇرعانداي سەزەسىڭ. ال مەدۋزانىڭ ءوزى شاقسا، دەنساۋلىققا ءبىرشاما زيان كەلۋى عاجاپ ەمەس.
عالىمداردىڭ ايتۋىنشا، بيىلعى جىلدىڭ اسەرى بولەك. مەدۋزالار ادەتتەگىدەن دە كوبەيىپ، ۋى دا كۇشەيگەن. دارىگەرلەر مەدۋزا شاققان جەردى بىردەن جۋىپ، ۋلى جاسۋشالارىنان تازارۋ كەرەك دەيدى. سوسىن ءتيىستى دارىلەردى جاعىپ تۇرعان ابزال. بيىل مەدۋزا شاققان بىرنەشە ادام اۋرۋحاناعا اۋىر حالدە تۇسكەن. ەكولوگتار بۇل قاۋىپ تامىز ايىنىڭ ورتاسىنا دەيىن ساقتالادى دەپ وتىر.
www.24.kz