كيىكتى قورعاۋ: تاعى ءبىر ينسپەكتور براكونەر قولىنان مەرت بولدى

None
None
نۇر-سۇلتان. قازاقپارات - اقمولا وبلىسىندا براكونەرلەرمەن كۇرەسكەن تابيعاتتى قورعاۋ ينسپەكتورى اۋرۋحانادا قايتىس بولدى، دەپ حابارلايدى قازاقپارات.

«دەرجاۆينسك قالاسىنىڭ اۋداندىق اۋرۋحاناسىنا جەتكىزىلگەن «وحوتزووپروم «ءو ب» ر م ق ك ينسپەكتورى وق جاراقاتىنان قايتىس بولدى. ەكىنشى ينسپەكتورعا سول اۋرۋحانادا وتا جاسالىپ جاتىر»، - دەپ جازدى ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت.

ايتا كەتەيىك، ينسپەكتورلار اقمولا وبلىسى جارقايىڭ اۋدانىندا تابيعاتتى قورعاۋ زاڭناماسىن بۇزعانداردىڭ الدىن الۋ شاراسىن جۇرگىزگەن جانە كيىك اتۋ فاكتىسىن انىقتاعان. زاڭ بۇزۋشىلاردىڭ ىزىنە تۇسكەندە 10 وڭىرگە - قوستاناي وبلىسىنا تيەسىلى اق ءتۇستى «نيۆا» ماركالى اۆتوكولىكتەن (مەملەكەتتىك ءنومىرى بەلگىسىز) وق اتىلىپ، ەكى ينسپەكتور جاراقات العان.

اقمولا وبلىسى جارقايىڭ اۋدانىنىڭ پوليتسيا ءبولىمى كۇدىكتىلەردى ىزدەپ جاتىر.

ەسكە سالا كەتسەك، جىل باسىندا قاراعاندى وبلىسى نۇرا اۋدانىنىڭ اۋماعىندا كيىك اتقان براكونەرلەر ەكى ينسپەكتوردى جارالاعان ەدى. اۋىر جاراقات العان ەرلان نۇرعاليەۆ 15 -قاڭتاردا استانانىڭ №1-اۋرۋحاناسىندا كوز جۇمدى.

اۆتور: ايجان سەرىكجان قىزى

سوڭعى جاڭالىقتار