تەرگەۋگە كەلمەگەن اتامبايەۆقا ىشكى ىستەر ۆيتسە-ءمينيسترى باردى

نۇر-سۇلتان. قازاقپارات - قىرعىزستان ىشكى ىستەر ءمينيسترىنىڭ ورىنباسارى ميرلان كانيمەتوۆ ايقىندالماعان قىلمىستىق ءىس اياسىندا ءۇش مارتە تەرگەۋگە شاقىرۋدى ەلەڭ قىلماعان بۇرىنعى پرەزيدەنت المازبەك اتامبايەۆتىڭ رەزيدەنتسياسىنا باردى.

اتامبايەۆتىڭ كومەكشىسى كۋندۋز جولدۋبايەۆا ازاتتىققا ميرلان كانيمەتوۆ پەن ىشكى ىستەر مينيسترلىگىنىڭ بىرنەشە وكىلى 22- شىلدە كۇنى بۇرىنعى پرەزيدەنتتىڭ كوي-تاش اۋىلىنداعى رەزيدەنتسياسىنا كەلىپ-كەتكەنىن ايتتى.

جولدۋبايەۆانىڭ سوزىنشە، اتامبايەۆ كانيمەتوۆپەن سويلەسۋگە شىقپاي قويعان، ونىڭ ورنىنا كومەكشىسى شىعىپ سويلەسكەن.

- ادۆوكاتىمىز بۇعان دەيىن جاريالاعان پوزيتسيامىزدى قايتالاپ ايتتىم. مينيسترلىككە دە حابارلاعانبىز. 27- ماۋسىم كۇنگى المازبەك اتامبايەۆتى پرەزيدەنتتىك تيىسپەۋشىلىك حاقىنان ايىرۋعا داۋىس بەرگەن پارلامەنت شەشىمىن زاڭسىز دەپ سانايمىز، - دەدى جولدۋبايەۆا.

ونىڭ سوزىنشە، كانيمەتوۆ كومەكشىنىڭ مالىمدەمەسىن تۇسىنگەنىن ايتىپ، رەزيدەنتسيادان كەتىپ قالعان.

22- شىلدە كۇنى ىلە-شالا اتامبايەۆ اتى-ءجونى اتالماعان ادامداردىڭ شاقىرۋىمەن 2-4 شىلدەدە رەسەيگە ەكى كۇنگە بارا جاتقانىن مالىمدەدى.

وتكەن اپتادا اتامبايەۆ ءۇشىنشى مارتە ىشكى ىستەر مينيسترلىگىنىڭ تەرگەۋگە شاقىرۋىن ەلەمەي قويعان. وسىدان كەيىن وعان تەرگەۋ امالدارى ءۇشىن قامالۋ قاۋپى تونگەن.

قىرعىزستاننىڭ بۇرىنعى پرەزيدەنتىنە قىزمەتتە ءجۇرىپ جەمقورلىققا جول بەردى، وكىلەتىن اسىرا پايدالاندى جانە زاڭسىز تۇردە بايىدى دەگەن سياقتى جالپى سانى بەس ايىپ تاعىلعان.

اتامبايەۆ بۇل ايىپتاردىڭ ءبارىن جوققا شىعارىپ، ۇستىنەن اشىلعان ءىستىڭ ساياسي استارى بار دەپ مالىمدەگەن.

قىرعىزستان زاڭى بويىنشا ەكى مارتە تەرگەۋگە شاقىرۋدى ەلەڭ قىلماعان ادام جاۋاپتاۋعا كۇشپەن اكەلىنەدى. ءبىراق بىشكەك ازىرشە اتامبايەۆتى قاماۋعا الۋ ارەكەتىنە بارماي تۇر.

اتامبايەۆتىڭ ادۆوكاتى سەرگەي سلەساريەۆ بيىلعى مامىردا پرەزيدەنتتىڭ تيىسپەۋشىلىك حاقى تۋرالى قىرعىزستان زاڭىنا ەنگىزىلگەن وزگەرىس كونستيتۋتسياعا قايشى دەپ مالىمدەگەن.

قىرعىزستان پارلامەنتى دەپۋتاتتارىنىڭ باسىم كوپشىلىگى بۇرىنعى پرەزيدەنت المازبەك اتامبايەۆتى تيىسپەۋشىلىك حاقىنان ايىرۋدى جاقتاپ داۋىس بەرگەن ەدى.

27- ماۋسىم كۇنگى داۋىس بەرۋدەن سوڭ اتامبايەۆ كوي-تاشتاعى رەزيدەنتسياسىنان كوپ شىقپاعان. ول قارۋى بار ەكەنىن ەسكەرتكەن.

3- شىلدە كۇنى اتامبايەۆ بىشكەكتە مىڭعا جۋىق جاقتاسى ۇيىمداستىرعان شەرۋ الدىندا ءسوز سويلەپ، ىشكى ىستەر مينيسترلىگى تاققان ايىپتاردى الىپ تاستاۋدى تالاپ ەتكەن.