ايۋان ءۇشىن ادام قۇربان بولۋدا

نۇر-سۇلتان. قازاقپارات - جانۋارلاردى قورعاۋ كەرەك... تابيعاتتى ايالاپ، كوزدىڭ قاراشىعىنداي ساقتاۋ كەرەك. وعان ءسوز بار ما.

الايدا، ەڭ الدىمەن ادامنىڭ اماندىعى كەرەك. اينالىپ كەلگەندە، ءبارى ادام ءۇشىن ەمەس پە؟! قۇرىپ بارا جاتقان اڭداردى قورعاۋدىڭ ءجونى وسى ەكەن دەپ، ادامنىڭ ءومىرى مەن تاعدىرىن، دەنساۋلىعىن قاتەرگە تىگىپ، «قۇرباندىققا شالۋ»... كوڭىلگە قونبايدى، اقىلعا سىيمايدى.

افريكا قۇرلىعىندا ورىن تەپكەن تانزانيا اۋماعىنداعى باستى قورىقتا اۆتوكولىك پەن موتوسيكل قوزعالىسىنا قاتاڭ تىيىم سالىنعان. جانۋارلاردى قورعاۋ ءۇشىن. براكونەرلەردەن. الايدا، تاياقتىڭ ەكى ۇشى بولاتىنى سەكىلدى، اتالعان وڭىردە تۇراتىندار ءۇشىن بۇل تىيىم ولاردى الەمنەن وقشاۋلاپ تاستاعانمەن بىردەي بولىپ وتىر.

دەرتى جانىنا باتقان ناۋقاستار ەمحاناعا جەتكەنشە دەمى ءۇزىلىپ كەتەدى. بۇل جايىندا Nipashe مەرزىمدى باسىلىمى ارۋشا وبلىسىندا ورنالاسقان نگورونگوروت قورىعىنىڭ تۇرعىندارىنىڭ ارىز- شاعىمىنا، تالاپ- تىلەگىنە، مۇڭ-زارىنا سىلتەمە جاساي وتىرىپ، حابار تاراتتى.

دالىرەگى، اتالمىش اقپارات كوزىنىڭ تىلشىسىنە سۇحبات بەرگەن كيمانگاتي تايپاسىنىڭ وكىلى ماريا گۋتۋمۋحوگا وسى زامانعى وركەنيەتتىڭ ەڭ قاجەتتى يگىلىگىنەن (اۆتوكولىك پەن موتوتسيكلدى ايتىپ وتىر) قاعىلعاندارىن اشىنا جەتكىزدى.

وسىلاي دەي كەلە ول اياعى اۋىر ايەلدەر ءۇشىن بۇرىن موتوتسيكلدى پايدالانۋعا رۇقسات ەتىلگەنىن تىلگە تيەك ەتتى. كەيىن اتالعان قورىق اۋماعىنداعى موتوتسيكلدەردىڭ ءبارىن تاركىلەپ الىپ كەتكەن. جەرگىلىكتى بيلىك وكىلدەرى.

ايتا كەتۋ كەرەك، اتالمىش قورىق اۋماعى ەندۋلەن اۋدانىندا 25 اۋىل ورىن تەپكەن. وسى 25 ەلدى-مەكەن ءۇشىن تەك ءبىر-اق مەديتسينالىق پۋنكت جۇمىس ىستەيدى. وسى وڭىردەگى جالعىز مەديتسينالىق مەكەمە ءجۇز مىڭعا تارتا ادامعا، دالىرەگى، 93136 نان اسا ادامعا قىزمەت كورسەتۋگە ءماجبۇر. كۇن سايىن سوعىسسىز، تابيعي اپاتسىز بۇل وڭىردە كەم دەگەندە ءبىر ادام باقيلىق بولىپ جاتادى.

islam.kz