مۇسىلمان ەلدەرى اراسىندا اجىراسۋدان الدىنا «جان» سالماعان ەل انىقتالدى

نۇر-سۇلتان. قازاقپارات - سوڭعى جىلدارى اراب الەمىندە اجىراسۋ ەپيدەميالىق سيپات الىپ بارادى.

ونىڭ ەپيسەنترى - ساۋديا بولىپ تۇر. ياعني، وزگە مۇسىلمان ەلدەرىنە قاراعاندا اجىراسۋ وقيعالارى ساۋديادا الەۋمەتتىك سيپات العان. اتالعان اراب ەلىنىڭ نەكە جانە اجىراسۋ جونىندەگى ادىلەت مينيسترلىگى كەلتىرگەن ستاتيستيكالىق مالىمەتكە قاراعاندا، وسى جىلدىڭ مامىر ايىندا ەل اۋماعىندا 711 جۇپ نەكە قيدىرعان ەكەن، ال اجىراسۋ كورسەتكىشى نەكە قيدىرعانداردان اسىپ كەتكەن - 900 ەرلى-زايىپتى اجىراسقان.

بۇل جايىندا Saudi Gazette مەرزىمدى باسىلىمى حابارلادى. ءبىر قىزىعى، اجىراسقان ەرلى- زايىپتىلار اراسىندا بولماشى نارسەلەر ءۇشىن اجىراسقاندار قاراسى كوپ.

ماسەلەن، ايەلى فۋتبول كورگىسى كەلەدى، ال ەرى زايىبىنىڭ بۇل ەرمەگىن قۇپتامايدى. يا بولماسا استى ءدامدى ەتىپ دايىنداماعانى دا اجىراسۋعا سەبەپ بولاپ جاتادى. بۇل ارابتار اراسىندا وتباسىلىق ومىرگە دايىن ەمەستەردىڭ قاراسى كوپ ەكەنىنەن حابار بەرەدى.

بۇدان بولەك، سوڭعى جىلدارى تاق مۇراگەرى جۇرگىزگەن الەۋمەتتىك-ەكونوميكالىق رەفورما دا ءوز اسەرىن تيگىزۋدە، ايەلدەردىڭ قۇقىعىن كەڭەيتۋ باعىتىندا قولعا الىنعان شارالار عاسىرلار بويى قالىپتاسقان پاتريارحالدىق ءتارتىپتىڭ ىرگەسىن شايقاۋدا.

سونداي-اق، اراب الەمىندە بىرىككەن اراب امىرلىگىندە دە اجىراسۋ بەلەڭ الىپ كەتكەن: ءابۋ- دابي ستاتيستيكا ورتالىعى (ADSC) جاريالاعان باياندامادا كەلتىرىلگەن دەرەككە سايكەس اتالعان اراب ەلىندە وتكەن جىلى اجىراسقانداردىڭ %30 عا جۋىعى وتباسىن قۇرعان العاشقى جىلدا اجىراسقان. سونىمەن قاتار، اجىراسقانداردىڭ اراسىندا شاڭىراق كوتەرىپ، وتاۋ قۇرعاندارىنا 4 جىل تولماعاندار سانى كوپ - %62,2.

اتالعان ەل تۇرعىندارىنىڭ شەتەلدىك ازاماتتارمەن كوڭىل جاراستىرىپ، وتباسىن قۇرعاندار سانى ارتىپ كەلەدى: وتكەن جىلعى تىركەلگەن نەكەنىڭ %21,7 ىن قۇرايدى. اتالعان ەل تۇرعىندارىمەن نەكە قيدىرعاندار اراسىندا پارسى شىعاناعى ەلدەرىنىڭ ازاماتتارىنىڭ قاراسى كوپ. بۇل ەلدە ەرلەردىڭ كوبىسى 27 جاستان اسقان سوڭ ۇيلەنىپ، ءۇي بولىپ جاتادى. ال ايەلدەر اراسىندا 24 جاستان اسقان سوڭ تۇرمىسقا شىعاتىندار قاراسى كوپ. سويتسە دە ءابۋ-دابي تۇرعىندارىنىڭ جارتىسىنان كوبىسى (%59) 15 جاستان اسقان سوڭ نەكە قيدىرعان.

اتالعان ەل تۇرعىندارىنىڭ %35 ى مۇلدەم نەكە قيدىرماعان بويداقتار مەن وڭ جاقتا وتىرىپ قالعان قىزدار قۇرايدى.

islam.kz