مۇعالىمنىڭ مارتەبەسىنەن بۇرىن ايلىعىن كوتەرۋ كەرەك - راحىم وشاقبايەۆ

None
None
نۇر-سۇلتان. قازاقپارات - راحىم وشاقبايەۆ ەلدەگى ءبىلىم سالاسىنا ۇلتتىق قوردان جىل سايىن قوسىمشا قارجى ءبولۋدى ۇسىندى، دەپ حابارلايدى قازاقپارات ءتىلشىسى.

ۇلتتىق قوعامدىق سەنىم كەڭەسىنىڭ قىزمەتىنە ارنالعان دوڭگەلەك ۇستەل بارىسىندا ساراپشى راحىم وشاقبايەۆ ءبىلىم سالاسىنىڭ قوردالانعان ماسەلەلەرىن قوزعادى.

«ءسوز جوق، ءبىلىم بەرۋ سالاسىنداعى جاڭارتىلعان باعدارلاما مەن كوپتەگەن يننوۆاتسيالار وتە دۇرىس. ءبىراق، بارلىعى جەتكىلىكسىز قارجىلاندىرۋعا كەلىپ تىرەلەدى. قازىر پەداگوگتاردىڭ جالاقىسى بارلىق سالالاردىڭ ىشىندە ەڭ تومەنى ەكەنىن بىلەمىز. مۇعالىمنىڭ مارتەبەسى مەن بەدەلىنە قاتىستى قانشاما زاڭدار قابىلداساق تا، نەگىزگى ماسەلە ەڭبەكاقى بولىپ قالاتىنىن ۇمىتپاۋ كەرەك. قازىر مەكتەپ تۇلەكتەرىنىڭ اراسىندا پەداگوگيكالىق ماماندىق تاڭداۋ ەڭ سوڭعى ورىندا. بىلتىر 8 مىڭنان استام گرانت بولىنسە، سونىڭ 4 مىڭنان استامىنا 50-51 بالل جيناعان تالاپكەرلەر يە بولعان. ءبىز بولاشاق بالالارعا زاماناۋي قۇندىلىقتار ءسىڭىرۋ ءىسىن وسىنداي دەڭگەيدەگى تالاپكەرلەردىڭ قولىنا تاپسىرىپ وتىرمىز دەگەن ءسوز. بۇل ماسەلەنى تەك ەڭبەكاقىنى كوتەرۋ ارقىلى عانا رەتكە كەلتىرۋگە بولادى»، - دەگەن راحىم وشاقبايەۆ ۇستازداردىڭ ايلىعىن وسىرۋگە كەلەر جىلدان باستاپ ناقتى كىرىسۋدى ۇسىندى.

«2020-2021 جىدلان باستاپ بارلىق مۇعالىمدەردىڭ ەڭبەكاقىسىن كوتەرۋ قاجەت دەپ سانايمىز. ونىڭ كولەمى وڭىردەگى ورتاشا ەڭبەكاقىدان از بولماۋى كەرەك. مۇعالىمدىككە تۇسكەن ستۋدەنتتەردىڭ شاكىرتاقىسىن كوتەرۋ ارقىلى بۇل ماماندىقتى تاڭداۋعا ەكونوميكالىق ستيمۋل قالىپتاستىرۋ كەرەك. پرەزيدەنت قاسىم- جومارت توقايەۆ بىلىمگە بولىنەتىن شىعىن كولەمىن جالپى ىشكى ءونىمنىڭ 5 پايىز دەڭگەيىنە كوتەرۋ كەرەكتىگىن ايتتى. ءبىزدىڭ ويىمىزشا، بۇل 5 پايىزدى مەملەكەت موينىنا الۋى كەرەك. بۇل رەتتە ۇلتتىق قوردىڭ قارجىسىن ىسكە قوسۋعا بولادى. ويتكەنى ۇلتتىق قور - ەرتەڭگى ۇرپاقتىڭ قورى. قازىر قولدا بار بيۋدجەتتىك شىعىندارعا قوسىمشا ۇلتتىق قوردان جىل سايىن 2 ميلليارد دوللار قاراجات ءبىلىم سالاسىنا ءبولىنۋى كەرەك»، - دەدى ۇلتتىق قوعامدىق سەنىم كەڭەسىنىڭ مۇشەسى.

اتالمىش دوڭگەلەك ۇستەلدەن كەيىن ەرلان سايروۆ جۋرناليستەرگە ۇلتتىق قوعامدىق سەنىم كەڭەسىنە قالا مۇشە بولعانىن ايتىپ بەردى.

ەرلان سايروۆتىڭ پىكىرىنشە، ۇلتتىق كەڭەستىڭ قۇرامى وزگەرىپ تۇرۋ كەرەك.

سونداي-اق، ساياساتتانۋشى الۋا جولدىبالينا ۇلتتىق قوعامدىق سەنىم كەڭەسىنىڭ وزىنە ەلدىڭ سەنىمى قالىپتاسىپ بولماعانىن ايتقان بولاتىن.

اۆتور: ەسىمجان ناقتىباي

سوڭعى جاڭالىقتار