اۋستراليادا ءبىلىم الۋدىڭ ارتىقشىلىقتارى
ءبىلىم ساپاسى مەن شەتەل ستۋدەنتتەرىنىڭ سەنىمدىلىگىن جوعارىلاتۋ ماقساتىندا اۋستراليا ۇكىمەتى حالىقارالىق ءبىلىم بەرۋ مەكەمەلەرىنە تالاپتى كۇشەيتكەن. سونىمەن بىرگە ەل ۇكىمەتى وقۋ مەن وقىتۋ جۇيەسىنىڭ تۇراقتىلىعىن رەتتەپ وتىرۋ ءۇشىن ءتيىستى زاڭنامالىق كودەكستەر مەن نورماتيۆتىك قۇجاتتاردى ازىرلەگەن. ناتيجەسىندە اۋستراليالىق ديپلوم الەم بويىنشا بەدەلگە يە.
اۋستراليا ءبىلىم جۇيەسىنىڭ سيپاتتاماسى
1. ەلدەگى 10 مىڭ مەكتەپ، 660 كاسىبي- تەحنيكالىق وقۋ ورنى مەن 39 ۋنيۆەرسيتەت جوعارى ساپالى ءبىلىم بەرۋ باعدارلامالارىمەن جۇمىس جاسايدى. كوپتەگەن ج و و- دارى ارنايى مامانداندىرىلعان سالالاردا جەتىستىككە جەتكەن، اتاپ ايتساق اقپاراتتىق تەحنولوگيا جانە تەلەكوممۋنيكاتسيا بويىنشا الەم مويىنداعان. بۇدان بولەك ەرەسەك ادامدارعا (جاسىنا قاراي) ارنالعان قوعامدىق كوللەدجدەر جەلىسى جۇمىس جاسايدى.
2. ۋنيۆەرسيتەت دەڭگەيىندە ءتۇرلى پاندەر بويىنشا گۋمانيتارلىق باعىتتان جاراتىلىستانۋ، جارناما، ماركەتينگ بويىنشا ءبىلىم الۋعا مۇمكىندىك جاسالعان.
3. مەملەكەتتىك جانە جەكەمەنشىك وندىرىستىك- تەحنيكالىق وقۋ ورىندارى قولدانبالى باعدارلاما: بۋحگالتەريا، بيزنەستى جۇرگىزۋ، ماركەتينگتىك زەرتتەۋ، تۋريزم جانە قوناق ءۇي، سونداي-اق ارنايى كۋرستار (ماسەلەن، سلەسارلىق، ەلەكتريكتەردى دايىنداپ شىعارۋ) بويىنشا وقىتادى.
4. اۋستراليانىڭ وقۋ ورىندارى ءبىرىڭعاي ۇلتتىق ۇلگىدە ديپلوم بەرەدى جانە ءبىر ءبىلىم سەكتورىن ەكىنشىسىمەن كەدەرگىسىز اۋىستىرۋعا بولادى (ماسەلەن، وندىرىستىك- تەحنيكالىق كۋرستان ۋنيۆەرسيتەت باعدارلاماسىنا ەركىن اۋىسىپ كەتۋگە مۇمكىندىك بەرىلگەن).
5. وقۋ ورىندارىندا زاماناۋي تەحنولوگيالار مەن وقىتۋدىڭ وزىق ادىستەرى پايدالانىلادى. بەرىلگەن ماتەريالدار مەن اقپاراتتاردى يگەرۋدىڭ ىڭعايلى، ءتيىمدى تاسىلدەرى ۇسىنىلادى. اۋستراليادا قاشىقتان وقىتۋ جۇيەسى ءبىر جولعا قويىلعان، اسىرەسە ونلاين تەحنولوگياسىنىڭ ارتىقشىلىقتارى كەڭ كولەمدە قولدانىلادى.
6. كوپتەگەن اۋستراليالىق ءبىلىم باعدارلامالارى ەلدەن تىس اۋماقتا ۆيرتۋالدى تۇردە وقۋعا مۇمكىندىك بەرەدى. ماسەلەن، ستۋدەنتتەر ءوز ەلىنەن ەشقايدا بارماي- اق اۋستراليانىڭ وقۋ ورنىندا وقىپ، ونىڭ ديپلومىن الا الادى.
7. اۋستراليادا ءبىلىم الۋ قۇنى ونىڭ ساپاسىنا بايلانىستى. زەرتتەۋ قورىتىندىسى بويىنشا، اۋستراليادا ءبىلىم الۋ قۇنى امەريكا مەن ۇلىبريتانيادا وقۋ شىعىندارىمەن سالىستىرعاندا ايتارلىقتاي تومەن.
8. شەتەل ستۋدەنتتەرى اراسىندا جۇرگىزىلگەن ساۋالناما ناتيجەسىنە قاراعاندا، اۋستراليادا ءبىلىم الۋ ايتارلىقتاي تانىمالدىققا يە. وسى مەملەكەتتەن ءبىلىم الىپ، ەلدەرىنە ورالعان شەتەل ستۋدەنتتەرى جوعارى قىزمەتكە ورنالاسا الادى. اۋستراليانىڭ حالىقارالىق ءبىلىم بەرۋ سالاسى ۇكىمەت پەن ءبىلىم بەرۋ قۇرىلىمدارىمەن تىعىز بايلانىستا جۇمىس جاسايدى.
2000 -جىلى اۋستراليادا ءبىلىم العان شەتەلدىك ستۋدەنتتەر، سونداي-اق شەتەلدە اۋستراليالىق ءبىلىم بەرۋ باعدارلامالارىنا قاتىسقاندار سانى %15 عا وسكەن. بۇل كورسەتكىش اۋستراليانىڭ شەتەلدىك ستۋدەنتتەر سانىمەن الدىڭعى ورىنداردان كورسەتتى. ويتكەنى شەتەلدىك ستۋدەنتتەر اراسىندا تانىمال ا ق ش پەن ۇلى بريتانيادا بۇل ستاتيستيكا نەبارى %5 عا وسكەن. وسىلايشا اۋستراليا باسقا ەلدەرمەن سالىستىرعاندا، جوعارى وقۋ ورنىنداعى ستۋدەنتتەر سانى بويىنشا كوش باستاپ وتىر (%12,6).
ۇكىمەت جۇرگىزگەن زەرتتەۋ قورىتىندىسىنا سايكەس، ەلدە ءبىلىم العان ستۋدەنتتەردىڭ %89 ى ءبىلىم ساپاسىنا قاناعاتتاناتىندىعىن بىلدىرگەن. بۇدان بولەك، اۋستراليا شەتەل ستۋدەنتتەرىنىڭ قۇقىقتارىن قامتاماسىز ەتۋ بويىنشا الدىڭعى قاتارلى ەل. ونىڭ ۇستىنە اۋستراليادا تابىستى وففشورلىق باعدارلامالار قۇرۋ، جەرگىلىكتى وقۋ ورىندارىمەن سەرىكتەستىك باعدارلامالار، ونلايندىق باعدارلاما، ءتۇرلى فرانچايزينگتىك كەلىسىمدەر جاساۋ جولعا قويىلعان. مۇنداي وففشورلىق ىنتىماقتاستىق مەملەكەتتىك جانە جەكەمەنشىك سەكتورلارداعى ءتۇرلى حالىقارالىق ۇيىمدارمەن بايلانىس پەن سەرىكتەستىك قارىم-قاتىناس ورناتۋداعى زور تاجىريبە ايقىندايدى.
اۋستراليانىڭ ۋنيۆەرسيتەتتەرى الەم بويىنشا كومپانيالاردا، ۇكىمەتتىك دەپارتامەنتتەر مەن ورتالىقتاردا ءبىلىم بەرۋ مەن وقۋ باعدارلامالارىن ازىرلەۋ مەن ىلگەرلەتۋدە دە كوشباسشى. قاشىقتان ونلاين ادىسىمەن وقىتاتىن ماماندار الەۋەتتى كليەنتتەردىڭ بىلىكتىلىگىن ارتتىرۋعا مۇمكىندىك جاسايتىن باعدارلامالاردى جاقسى مەڭگەرگەن. سونىمەن بىرگە ولار «اعىلشىن ءتىلى ەكىنشى ءتىل» (English as a Second Language (ESL)» باعدارلاماسىنىڭ بارلىق دەڭگەيلەرىن، سونداي-اق تەحنيكالىق مامانداردى كورپوراتيۆتىك وقىتۋعا ماماندانعان.
اۋستراليالىق ءبىلىم بەرۋ ادىستەرى الەمدىك قاۋىمداستىقتا ءوزىنىڭ ورنى بار جانە ول كوپشىلىكتى قىزىقتىرادى. اۋستراليالىق ديپلومى بار زاماناۋي ماماندارعا سۇرانىس ارتقان. سونىمەن قاتار، حالىقارالىق قايتا قۇرۋ جانە دامۋ بانكى مەن ازيا دامۋ بانكى قارجىلاندىراتىن جوبالاردى ازىرلەۋگە اۋستريالىق تاجىريبە قولدانىلعان.