الماتى زووباعىنداعى ەڭ قارتاڭ اق ايۋدىڭ قازىرگى جاعدايى قانداي

الماتى. قازاقپارات- الكور نەمەسە كوليا ەسىمدى اق ايۋ - الماتى زووباعىنىڭ بايىرعى تۇرعىنى. قارت ايۋدىڭ تىنىس- تىرشىلىگى تۋرالى ونىڭ قامقورشىسى سەرگەي سپيتسىن مەن الماتى زووباعىنىڭ ديرەكتورى ۆياچەسلاۆ بانشيكوۆ ايتىپ بەردى، دەپ حابارلايدى قازاقپارات ءتىلشىسى.

بۇعان دەيىن الەۋمەتتىك جەلىلەردە الكوردىڭ دەنساۋلىعى سىر بەرگەنى جايىندا بەلسەندىلەر جارىسا جازىپ، اق ايۋدىڭ سۋرەتى مەن بەينەجازباسىن تاراتقان بولاتىن. جانۋاردىڭ دەنساۋلىعى مەن تۇراتىن جەرى كوپشىلىكتتىڭ نازارىن اۋداردى.

«دۇيسەنبى كۇنى تاڭەرتەڭ ماعان كوپ حابارلاما ءتۇستى. وندا ءبارى «اق ايۋدىڭ دەنساۋلىعى ناشارلاپ كەتىپتى، حايۋاناتتار باعىندا وعان ەشقانداي جاعداي جاسالماعان» دەگەن. مەن بىردەن وسى جەرگە كەلىپ، ونىڭ دەنساۋلىعىنىڭ جاقسى ەكەنىنە كوز جەتكىزدىم. قازىر ول ويناپ، تاماقتانىپ جاتىر. ونىڭ جۇمىس كۇنى تاڭعى 5-6-دا باستالادى. ول نەگىزىنەن تەڭىز بالىقتارىمەن قورەكتەنەدى. 2017 -جىلدان بەرى الماتى حايۋاناتتار باعىندا وڭ وزگەرىستەر بايقالادى. مۇندا ايۋلار عانا ەمەس، باسقا دا جانۋارلارعا جاقسى قارايدى»، - دەيدى اق ايۋدىڭ قامقورشىسى سەرگەي سپيتسىن.

سەرگەيدىڭ ايتۋىنشا، الكور 1990 -جىلدان بەرى الماتى زووباعىندا ءومىر ءسۇرىپ كەلەدى. 1989 -جىلى كالينينگراد زووباعىندا تۋعان. سەرگەي بالا كۇنىندە وسى جەرگە ءجيى كەلەتىن، اق ايۋعا باۋىر باسىپ قالعانى سونشا، الكوردىڭ قامقورشىسى بولۋدى ۇيعارىپتى.

«7 - جەلتوقسان كۇنى ول 30 جاسقا تولادى. ادام ومىرىمەن ولشەيتىن بولساق، 100-گە كەلەدى. ولار بوستاندىقتا ورتا ەسەپپەن 20-25 جىل ءومىر سۇرەدى. ءدال وسى اق ايۋلار وتە سيرەك كەزدەسەدى. سولاردىڭ ءبىرى - ءبىزدىڭ الكور. زووباقتا ۇزاق جاسايتىندار از. الكوردىڭ جۇبايى مەن ۇلى بار. ولار باسقا حايۋاناتتار باعىندا تۇرىپ جاتىر. جالپى، جاسى ەڭ ۇلكەن ايۋ گەرمانيادا تۇرادى. ول 39 جاستا»، - دەيدى سەرگەي.

الماتى زووباعىنىڭ ديرەكتورى ۆياچەسلاۆ بانشيكوۆتىڭ ايتۋىنشا، پوليار ايۋىنان باسقا، مۇندا 7 گيمالاي جانە قوڭىر ايۋ تۇرادى. ولار تولىقتاي جابدىقتالعان تورلار مەن ءجۇزۋ باسسەيندەرىندە ءومىر سۇرەدى.

«2017 - جىلى سەرگەي سپيتسىننىڭ دەمەۋشىلىگىمەن اق ايۋدىڭ ءۇيى قايتا قالپىنا كەلتىرىلدى. كوليانىڭ ءجۇزۋ باسسەينى جوندەۋدەن ءوتتى. ۇيىقتايتىن بولمەسىندەگى سالقىنداتقىش جابدىقتارى جاڭارتىلدى. پوليارلى ايۋلار سۋىق جاقتا ءومىر سۇرەدى، سوندىقتان ولارعا سۋىق اۋاداي قاجەت. بۇرىن جاز مەزگىلىندە الكور كوپ سالماق جوعالتاتىن. كوپ قوناقتار اق ايۋدى كۇندىزگى ۋاقىتتا ويىن الاڭىندا كورگىسى كەلەتىن. كوليا ىستىق كۇنى سىرتقا شىقپايتىن. قازىر ءبارى باسقاشا»، - دەدى ۆياچەسلاۆ بانشيكوۆ.

اق ايۋدىڭ قامقورشىسى سەرگەي سپيتسىن مەن الماتى زووباعىنىڭ ديرەكتورى ۆياچەسلاۆ بانشيكوۆ الەۋمەتتىك جەلىلەردە جالعان اقپارات تاراتپاۋدى سۇرادى. جانۋارلاردىڭ ومىرىنە الاڭدايتىن بارلىق جانداردى ولاردىڭ تىنىس- تىرشىلىگىن ءوز كوزىمەن كورۋگە شاقىردى.

اۆتور: الما مۇقانوۆا