كوپتەگەن ەلدەر بالانىڭ جەكە ءتولقۇجاتى بولۋىن تالاپ ەتەدى – ءى ءى م
سوندىقتان، شەتەلگە شىعار الدىندا ءار بالادا جەكە قۇجاتىنىڭ بولۋىن پىسىقتاپ الۋ قاجەت، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.
ەلدەن تىسقارى شىققان جاعدايدا بالالاردىڭ سۋرەتىن اتا-اناسىنىڭ پاسپورتىنا جەلىمدەۋدى الىپ تاستاۋ بويىنشا زاڭناماعا تۇزەتۋ ەنگىزىلەدى. بالادا جەكە پاسپورت بولۋىن كوپتەگەن ەلدەر تالاپ ەتەدى، وسىعان بايلانىستى كوميتەت الداعى وزگەرىستەر وتە وزەكتى ەكەنىن ەسكە سالدى.
«قازىر بۇل زاڭ جوباسى پارلامەنت قاراۋىندا جاتىر. جەكە پاسپورت - كوپتەگەن ەلدەردىڭ تالابى ەكەنىن ەسكەرە وتىرىپ، بالالارىمەن شەتەلگە شىعۋدى جوسپارلاعان اتا-انالارعا باسقا ەلدىڭ شەكاراسىن كەسىپ ءوتۋ ءۇشىن ەرتەرەك پاسپورت راسىمدەۋ كەرەكتىگى ەسكەرتىلدى. سونىمەن قاتار، بۇل تۇزەتۋ مەملەكەت باسشىسى زاڭعا قول قويعاننان كەيىن عانا ەنگىزىلەتىنىن تۇسىندىردىك» دەلىنگەن حابارلامادا.
وسىنداي تۇسىندىرمەلەر ۇ ق ك شەكارا قىزمەتىنە جانە سىرتقى ىستەر مينيسترلىگىنە جولداندى.
ح ق و- دا اتا-انالاردىڭ پاسپورتىنا بالاسىنىڭ سۋرەتىن جەلىمدەۋ ماسەلەسىمەن قابىلداۋ توقتاتىلعان جوق جانە سول قالىپتا جۇرگىزىلىپ جاتىر.
«اتا-اناسىنىڭ پاسپورتىنا جاپسىرىلعان سۋرەتپەن كىرگىزەتىن جانە كىرگىزبەيتىن مەملەكەتتەر تۋرالى ادەتتە سىرتقى ىستەر مينيسترلىگى حاباردار ەتەدى. سوندىقتان قانداي دا ءبىر ەلگە جول جۇرەر الدىندا ول ەلگە كىرۋ ءتارتىبىن ديپلوماتيالىق وكىلدىكتەردەن الدىن الا ءبىلىپ الۋ كەرەك» دەيدى كوميتەت.
سونداي-اق، قازىر ءى ءى م بالالارعا ءتولقۇجات بەرۋ ءۇشىن مەملەكەتتىك باجدى ازايتۋ ماسەلەسىن پىسىقتاپ جاتىر.