ءبىز ديماشتى ماقتان تۇتامىز - قاسىم-جومارت توقايەۆ

نۇر-سۇلتان. قازاقپارات - ءبىز ديماشتى ماقتان تۇتامىز. بۇل تۋرالى مەملەكەت باسشىسى قاسىم-جومارت توقايەۆ «31- ارنادا» كورسەتىلگەن «پرەزيدەنت 2.0» دەرەكتى فيلمىندە ايتتى، دەپ حابارلايدى قازاقپارات ءتىلشىسى.

رەسەيلىك جۋرناليست الەكسەي پيۆوۆاروۆ قازاقستان پرەزيدەنتىنەن بۇگىندە رەسەيدە تانىمال قازاقستاندىق رەپ- ورىنداۋشى ءادىل «سكريپتونيت» جالەلوۆ شىعارماشىلىعى تۋرالى سۇرادى.

«ونى بىرنەشە رەت تىڭداپ كوردىم. الايدا ۇيىپ تىڭدادىم، ءبارىن ءتۇسىندىم دەپ ايتا المايمىن. ءبىراق تۇسىنۋگە تىرىسىپ كورەمىن»، - دەدى مەملەكەت باسشىسى.

سونىمەن قاتار، پرەزيدەنت تانىمال ءانشى ديماشتى ماقتان تۇتاتىنىن اتاپ ءوتتى.

«ول ءوزىنىڭ ونەرىمەن اۋەلى قىتايلىق تىڭدارماندارىن، كەيىن رەسەيدى ءتانتى ەتتى. كرەملدەگى سەزدەر سارايىندا بىرنەشە كونسەرت بەردى. كونسەرتتەرىنىڭ بارلىعى انشلاگپەن ءوتتى»، - دەدى قاسىم-جومارت توقايەۆ.

ايتا كەتەيىك، «31- ارنادا» كورسەتىلگەن «پرەزيدەنت 2.0» دەرەكتى فيلمىندە وتاندىق تاۋار وندىرۋشىلەرگە قولداۋ كورسەتۋدىڭ ماڭىزدىلىعى تۋرالى ايتىپ بەردى.