ستاليندىك قۋعىن-سۇرگىندى كەشىرۋ مۇمكىن ەمەس - مەملەكەت باسشىسى
دەرەكتى فيلم بارىسىندا قازاقستان پرەزيدەنتى اكەسى كەمەل جايىندا ءسوز قوزعايدى.
«ول ءومىرىنىڭ سوڭىنا دەيىن، سوعىستا جەڭگەنى ءۇشىن ستالينگە ريزا بولىپ ءوتتى. بۇل جەردە ۇلكەن قاراما-قايشىلىق تۋىنداپ تۇر. ءبىر جاعىنان الىپ قاراعاندا، ول ستاليننىڭ كەسىرىنەن جەتىم قالدى. ال ەكىنشى جاعىنان الىپ قاراساق، ول ستاليندى كەڭەس وداعى قارۋلى كۇشتەرىنىڭ ۇلى قولباسشىسى دەپ سانادى»، - دەدى مەملەكەت باسشىسى.
وسى ورايدا، قاسىم-جومارت توقايەۆ جۋرناليستىڭ «ءسىز ءۇشىن ستالين كىم؟» دەگەن ساۋالىنا جاۋاپ بەردى.
«مەن ءۇشىن ستالين، ارينە ءىرى تاريحي تۇلعا. ءبىراق، كەز كەلگەن ءىرى تاريحي تۇلعا سياقتى ستاليننىڭ دە قاراما-قايشى جاقتارى بولدى. جاپپاي قۋعىن-سۇرگىن، سونىڭ ىشىندە قازاقستان جەرىندەگى قۋعىن-سۇرگىندى كەشىرۋ مۇمكىن ەمەس. ستاليننىڭ سويىلىن سوققان شولاق بەلسەندىلەردىڭ قولىنان كوپتەگەن قازاقتىڭ زيالى قاۋىم وكىلى تۇرمەدە جازىقسىزدان جازىقسىز قازا تاپتى. ەكىنشى جاعىنان اكەممەن دە كەلىسەمىن. ەل باسىنا كۇن تۋعان كەزدە كەڭەس وداعىن باسقارىپ، ەلدى جەڭىسكە جەتكىزدى»، - دەدى قازاقستان پرەزيدەنتى.