ق ر پرەزيدەنتى ينتەرنەتتىڭ شەكتەلۋىنە قاتىستى پىكىر ءبىلدىردى

نۇر-سۇلتان. قازاقپارات – ق ر پرەزيدەنتى قاسىم-جومارت توقايەۆ ينتەرنەتتىڭ شەكتەلۋىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«31- ارنادا» كورسەتىلگەن «پرەزيدەنت 2.0» دەرەكتى فيلمىندە رەسەيلىك ءتىلشى الەكسەي پيۆوۆاروۆ پرەزيدەنتتەن ينتەرنەتتى مولشەرمەن تاراتۋعا قاتىستى پىكىرىن سۇرادى.

«قيىن سۇراق. ءبىراق، ۇلۋ سەكىلدى تۇيىقتالۋ قازىرگى الەمدە مۇمكىن ەمەس. ءبارى ءبىر اينالما جول ارقىلى ۇلكەن جەلىگە شىعۋدىڭ امالدارى بار. ايتار شىندىعىڭ بولسا، ونى الەۋمەتتىك جەلى ارقىلى جەتكىزىپ جاتساڭ، ءبىر باسقا. مىسالى مەن ءۇشىن Twitter جەكە تەلگراف اگەنتتىگىم سياقتى. Twitter تۇرعاندا جۋرناليستەردى شاقىرىپ، سۇحبات بەرۋدىڭ قاجەتى قانشا ماعان؟ پرەزيدەنتتىككە دەيىن مەن Instagram-دا جازبايتىنمىن. قازىر Instagram پاراقشام تۇراقتى جاڭارىپ تۇرادى»، - دەدى ول.

ايتا كەتسەك، «پرەزيدەنت 2.0» دەرەكتى فيلمىندە ق ر پرەزيدەنتى قاسىم-جومارت توقايەۆ جەمقورلىق ءۇشىن ءولىم جازاسىنا كەسىلگەندەردى ءوز كوزىمەن كورگەنىن ەسكە العان بولاتىن. سونداي-اق، مەملەكەت باسشىسى سااكاشۆيليدىڭ مىسالى قازاقستانعا نەلىكتەن كەلمەيتىنىن ايتتى.