قازاقستان مەكتەپتەرىندە ەكولوگيالىق تاربيە ساباعى ەنگىزىلەدى

نۇر-سۇلتان - قازاقستان مەكتەپتەرى مەن بالاباقشالارىنا ەكولوگيالىق تاربيەگە ارنالعان قوسىمشا ساباق ەنگىزىلەدى.

بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ #birge #TazaQazaqstan ەكولوگيالىق اكسياسىندا ءمالىم ەتتى، دەپ حابارلايدى قازاقپارات ءتىلشىسى.

«ق ر ءبىلىم جانە عىلىم مينيسترلىگىمەن بىرلەسە وتىرىپ، بارلىق مەكتەپتەر مەن بالاباقشالاردا ەكولوگيالىق ساعاتتاردى ىسكە قوسامىز. ويتكەنى تازالىق ۇعىمىن ساناعا بالا جاستان باستاپ ءسىڭىرۋ كەرەك»، - دەدى مينيستر ماعزۇم مىرزاعاليەۆ.

ق ر پارلامەنتى ءماجىلىسىنىڭ دەپۋتاتى زاعيپا بالييەۆانىڭ ايتۋىنشا، «ەكولوگيالىق ساعاتتار» قوسىمشا ساباق رەتىندە ەنگىزىلۋى ءتيىس.

«ەكولوگيا ءمينيسترى مەن ءبىلىم ءمينيسترى ءوزارا كەلىسىپ، جاڭا ءپاندى ەنگىزۋ تەتىكتەرىن ويلاستىرادى دەپ ويلايمىن. بۇل قوسىمشا ساباق تۇرىندە بولۋى كەرەك. قوقىستى سۇرىپتاپ توگۋ، وعان قايتا وڭدەلەتىن شيكىزات رەتىندە قاراۋ مادەنيەتىن قالىپتاستىرۋدى بالالاردان باستاۋ يدەياسى - شىنىمەن دە جاقسى باستاما»، - دەدى دەپۋتات.

ەسكە سالساق، ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ جاريالاعان #Birge #TazaQazaqstan اكسياسىنا نۇر-سۇلتان قالاسىنان 1200 دەن استام ادام قاتىسقان بولاتىن. ونىڭ ىشىندە ۇكىمەت باسشىسى اسقار مامين دە بار.