گولليۆۋد قازاقستاندا كينو تۇسىرمەكشى

نۇر-سۇلتان. قازاقپارات - ۇلتتىق كينونى مەملەكەتتىك قولداۋ ورتالىعى باسقارما ءتوراعاسىنىڭ ستراتەگيالىق دامىتۋ جونىندەگى ورىنباسارى يگور تساي لوس-انجەلەستە امەريكالىق پروديۋسەرلەرمەن كەلىسسوز وتكىزدى، دەپ حابارلايدى قازاقپارات ءتىلشىسى.

ۇلتتىق كينونى مەملەكەتتىك قولداۋ ورتالىعى باسپا ءسوز قىزمەتىنىڭ حابارلاۋىنشا، كەزدەسۋگە LIONSGATE, NBC Universal, Warner Horizon, The Discovery, Global Film Solutions جانە كينو كومپانيالارىنىڭ باسشىلارى مەن وكىلدەرى قاتىسقان. پروديۋسەرلەر قازاقستانداعى كينو ءوندىرىسى تۋرالى جان-جاقتى اقپارات العان.

«امەريكالىق كينووندىرۋشىلەردىڭ قازاقستانداعى بىرەگەي وپەراتورى بولعاندىقتان، كينو ماماندارى بىزبەن تىعىز ىنتىماق ورناتۋعا نيەتتى ەكەنىن اتاپ ءوتتى. كەلەسى كەزدەسۋ تامىز ايىنىڭ سوڭىنا جوسپارلانىپ وتىر. قازاقستاندا بىرنەشە امەريكالىق جوبالاردىڭ ءتۇسىرىلىم بويىنشا تالىقلاۋ جۇرگىزەمىز»، - دەيدى يگور تساي.

ونىڭ ايتۋىنشا، بۇل كەلىسسوزگە قاتىسقان پروديۋسەرلەر وسىنىڭ الدىندا عانا قازاقستان تۋرالى سۇراستىرىپ، مول اقپارات جيناعان.

«ءبىز نۇر-سۇلتان، الماتى جانە ماڭعىستاۋ قالالارى تۋرالى، قازاقتىڭ تاريحى پەن مادەنيەتى تۋرالى كوپ مالىمەت الدىق. قازىردىڭ وزىندە بىرنەشە ناقتى جوبا جوسپارلانعان. ارينە، بارلىق ماسەلەلەردى پىسىقتاۋ ءۇشىن ۋاقىت قاجەت. ءبىر انىعى، قازاقستاندا كينو تۇسىرۋگە مۇددەلىمىز. قازاقستان كينوسى تۋرالى جاڭا زاڭ قابىلدانباقشى. بۇل دا اۋقىمدى جوبالاردىڭ ءساتتى ۇيىمداستىرىلۋىنا نەگىز بولادى. قازىر كينەماتوگرافيا سالاسىنداعى سۋبسيديالاردىڭ ەرەكشەلىگىن ناقتىلاپ جاتىرمىز»، - دەيدى «جاھاندىق ساياسات باستامالارى» كومپانياسىنىڭ پرەزيدەنتى دجەي فۋتليك.

كەلىسسوز بارىسىندا قازاقستانداعى گولليۆۋد ءوندىرىسىن تاريحي، مادەني جانە عىلىمي تاقىرىپتار بويىنشا دامىتۋعا، قازاقستان كينويندۋسترياسىن قالىپتاستىرۋعا، گولليۆۋد كينوكومپانيالارىمەن تاجىريبە الماسۋ ەسەبىنەن وتاندىق كادرلاردىڭ بىلىكتىلىگىن ارتتىرۋعا قاتىستى پىكىرتالاس وربىگەن. جيىندا گولليۆۋد الاڭىندا «قازاقستان كينوسىنىڭ اپتالىعىن» ۇيىمداستىرۋ ماسەلەلەرى دە تالقىلاندى.