قىتايداعى سپورت فەستيۆالىندە قىز قۋۋ ەرەكشە كوزگە ءتۇستى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

وزبەكستان مەن قازاقستان اراسىندا حالىقارالىق جول اشىلدى – ءو ز ا

17- شىلدەدە «بەينەۋ - اقجىگىت - وزبەكستان شەكاراسى» حالىقارالىق اۆتوجولىنىڭ سالتاناتتى اشىلۋ ءراسىمى ءوتتى، دەپ حابارلايدى وزبەكستاننىڭ «ءو ز ا» اقپارات اگەنتتىگى.

بۇل حالىقارالىق اۆتوماگيسترالدىڭ قايتا جوندەۋ جۇمىستارى ەكى ەل پرەزيدەنتتەرى تاراپىنان 2017-جىلدىڭ 23- ناۋرىزىندا نۇر-سۇلتان قالاسىندا قول قويىلعان بولاتىن.

«وتكەن ايدىڭ 21-جۇلدىزىندا قازاقستان رەسپۋبليكاسىنىڭ پرەمەر-ءمينيسترى اسقار مامين تاشكەنت قالاسىندا بولعان كەزىندە وزبەكستان مەن قازاقستان اراسىنداعى ەكىجاقتىق ستراتەگيالىق سەرىكتەستىك بويىنشا كوميسسيا ءماجىلىسى اياسىندا وزبەكستان باسشىلىعىنا «بەينەۋ - اقجىگىت - وزبەكستان شەكاراسى» حالىقارالىق اۆتوجولىنىڭ سالتاناتتى اشىلۋى راسىمىندە ۇكىمەت دەلەگاتتارىنىڭ قاتىسۋى تۋرالى ۇسىنىسىن ايتقان ەدى»، - دەپ جازادى وزبەكستاندىق ب ا ق.

«وزبەكستان پرەزيدەنتى شاۆكات ميرزيەيەۆ تاپسىرماسىمەن بۇگىن وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆ باسشىلىعىنداعى دەلەگاتتار «بەينەۋ - اقجىگىت - وزبەكستان شەكاراسى» حالىقارالىق اۆتوجولىنىڭ سالتاناتتى اشىلۋ راسىمىنە قاتىستى. شارادا ەكى ەل ۇكىمەت باسشىلىعىنداعى دەلەگات وكىلدەرى مەن جول قۇرىلىسىنىڭ ماماندارى جانە دە كوپشىلىك قاۋىم، ب ا ق وكىلدەرى بولدى. اۆتوماگيسترالدىڭ جالپى ۇزىندىعى - 84 شاقىرىم. اتالعان تاسجولدىڭ قۇرىلىس جۇمىستارىنا 108 ميلليون ا ق ش دوللارى جۇمسالعان. «بەينەۋ - اقجىگىت - وزبەكستان شەكاراسى» تاسجولى ەكى ەلدىڭ دە ەكونوميكاسىنىڭ ادىمداۋىنا، تاۋار ايىرباستاۋىنىڭ كولەمى وسۋىنە وڭتايلى قىزمەت ەتەتىن بولادى» دەپ تۇيىندەيدى uza.uz/kz.

«قىز قۋۋ» قىتايداعى سپورت فەستيۆالىندە ەرەكشە كوزگە ءتۇستى - «ورتالىق حالىق راديوسى» (CNR)

وسى اپتادا قىتايدىڭ ىشكى موڭعول اۆتونوميالى ولكەسىنىڭ كوححوت قالاسىنداعى يپپودرومدا ات سپورتىنان جارىستار ءوتتى. جارىس باعدارلاماسى بويىنشا اۋدارىسپاق، تەڭگە ءىلۋ، كوكپار جانە بايگە سىندى ات ويىندارىنا ءار ۇلت وكىلدەرىنىڭ كوماندالارى قاتىسقان، دەپ حابارلايدى قىتايلىق kazakcnr.com سايتى.

اقپارات كوزىنىڭ مالىمەتىنشە، اتالعان مادەني شارا «از ۇلتتاردىڭ XI بۇكىل مەملەكەتتىك ءداستۇرلى سپورت فەستيۆالى» دەپ اتالادى.

«بۇل فەستيۆالگە شىنجاڭنان ارنايى بارعان قازاقتار «قىز قۋۋ» جانە «اۋدارىسپاق» ويىنىن كورسەتتى. «قىز قۋۋ» - قازاق، قىرعىز سياقتى ۇلتتاردىڭ ءداستۇرلى ات ۇستىندەگى كوڭىل اشۋ قيمىلى. ءبىر قىز بەن ءبىر جىگىت جۇپ بولىپ، قىزقۋار سالادى. بۇنداي سپورتتىق ويىن كوبىنەسە توي-تومالاق، مەرەكە-مەيرامداردا وتكىزىلەدى» دەپ جازادى قىتايلىق ب ا ق.

ەڭ بايىرعى اشەكەي بۇيىمدارىنىڭ ءبىرى - «ولتۋ تاسى» تۋرالى بىلەسىز بە؟ - TRT

«ەرزۋرۋمدا (تۇركيانىڭ سولتۇستىك-شىعىسىنداعى قالا - اۆت.) شىعارىلاتىن ولتۋ تاسى (قارا ءىنجۋ) الەمدەگى تانىمال ەڭ بايىرعى اشەكەي بۇيىمدارىنىڭ ءبىرى ەكەنىن بىلەتىن بە ەدىڭىز؟» دەپ جازادى تۇركيا راديو تەلەۆيزيا پورتالى.

ادامزاتتىڭ تانىمال ەڭ بايىرعى اشەكەي بۇيىمدارىنىڭ ءبىرى ولتۋ تاسى (قارا ءىنجۋ) - ەرزۋرۋمنىڭ ماڭىزدى سيمۆولدارىنىڭ ءبىرى. ويتكەنى، ەڭ ساپالى ولتۋ تاسى وسى تەرريتوريادان شىعادى. ولتۋدىڭ شيكىزاتىنىڭ تابىلۋى قيىن، الايدا زەرگەرلىگى وڭاي تاس. ءوڭىردىڭ سيمۆولى بولعان اتالعان تاس ايماقتاعى جۇزدەگەن وتباسىنىڭ تىرشىلىك كوزىنە اينالىپ وتىر. كەن بايلىعىنىڭ از بولۋى جانە شىعارىلۋىنىڭ قيىندىعى بۇل زەرگەرلىك بۇيىمنىڭ قۇنىن ارتتىرادى.

تۇركيالىق ب ا ق- تىڭ مالىمەتىنە سۇيەنسەك، توپىراقتان شىققان كەزدە وتە جۇمساق بولعانىنا قاراماستان، اۋامەن توعىسقاندا جانە وڭدەلگەننەن كەيىن قاتايادى. ءتۇسى كوبىنەسە قارا، كەيدە قوڭىرقاي بولىپ كەلگەنىمەن، قولدانعان سايىن جارقىرايدى. شەبەرلەر ءارتۇرلى ەتىپ وڭدەيدى. اسىل تاستار القاعا، سىرعاعا، جۇزىككە، تەمەكى قۇتىسىنا دەيىن كوپتەگەن اشەكەي بۇيىمىنا اينالادى. ادەتتە، اتالمىش تاستان ەڭ كوپ وندىرىلەتىنى جانە تانىمالى - تاسپيىق. ولتۋ تاسىنان جاسالعان تاسپيىقتاردىڭ اتاعى تۇركيادان وزگە كوپتەگەن ەلگە تاراپ كەتكەن دەيدى trt.net.tr باسىلىمى.

ولتۋ تاسى زەرگەرلىگىنىڭ باستالۋ تاريحى 200 جىلعا سوزىلادى.

ورتا ازياداعى ەڭ ۇلكەن جانتاس جەل ەلەكتر ستانساسى - «جەنمين جيباو»

بۇگىنگى تاڭدا جەل ەنەرگياسى بالاما ەنەرگيا كوزدەرىنىڭ اراسىندا الدىڭعى قاتاردا ەكەنى بەلگىلى. «قىتاي حالىقارالىق ەلەكتر كۇشى» ج ش س قارجىلىق قولداۋىمەن قازاقستاننىڭ جامبىل وبلىسىنداعى جانتاس جەل ەلەكتر نىسانىنىڭ جۇمىسى جۋىردا باستالدى، دەپ حابارلايدى قىتايدىڭ People Daily اقپارات پورتالى.

اتالعان جەل ەلەكتر ستانساسىنىڭ اشىلۋ سالتاناتىندا ءسوز العان قىتايلىق كومپانيانىڭ باسشىسى قازاقستانداعى جاڭا ەنەرگيانىڭ بولاشاعىنا قىزىعۋشىلىقتا ەكەندىگىن جەتكىزگەن.

«ءبىزدىڭ «قىتاي حالىقارالىق ەلەكتر كۇشى» ج ش س قازاقستانداعى جاڭا ەنەرگيانىڭ بولاشاعىنا قىزىعىپ وتىر. ءبىز جەرگىلىكتى كومپانيالارمەن بىرلەسىپ، جوعارى كەرنەۋلى ەلەكتر ستانسالارىن سالۋعا نيەتتىمىز. سول ارقىلى قازاقستان مەن قىتايدىڭ ءوندىرىس قۋاتى سەرىكتەستىگىنە، سونداي-اق «ءبىر بەلدەۋ، ءبىر جول» قۇرىلىسىنا بەلسەنە اتسالىسامىز» دەيدى قىتايلىق كومپانيانىڭ باس ديرەكتورى تيان ءجۇن.

اشىلۋ سالتاناتىنا جامبىل وبلىسى اكىمىنىڭ ورىنباسارىمەن بىرگە قىتايدىڭ الماتىداعى باس كونسۋلى مياو حۋنبو دا قاتىسىپ، كومپانيا باسشىسىنىڭ ءسوزىن قۋاتتادى.

«سوڭعى ەكى جىلدان بەرى قىتاي مەن قازاقستاننىڭ ءوندىرىس سەرىكتەستىگى جوعارى قارقىنمەن دامىدى. جانتاس جەل ەلەكتر ستانساسى - ورتا ازياداعى سىيىمدىلىعى ەڭ ۇلكەن جەل ەلەكتر نىسانى. بۇل - قىتاي مەن قازاقستاننىڭ ستراتەگيالىق سەرىكتەستىكتەگى ەڭ جاڭا جەمىسى»، - دەيدى باس كونسۋل مياو حۋنبو.

«جانتاس جەل ەلەكتر ستانساسى 2018-جىلى قىتاي مەن قازاقستاننىڭ ءوندىرىس قۋاتى بىرلەستىكتەرى تىزىمندەگى نەگىزگى نىساندارعا ەنگىزىلگەن. جالپى، جۇمسالعان قارجى - 160 ميلليون دوللار. نىسان جوباسىندا 2.5 مەگاۆاتتىق 40 جەل ەلەكتر اگرەگاتى سالىنادى. جالپى، اگرەگات سىيىمدىلىعى 100 مەگاۆاتقا جەتىپ، وندىرىسكە قوسىلعاننان كەيىن جىلىنا 350 ميلليون كيلوۆات ساعات توك تاراتادى» دەپ تۇيىندەيدى قىتايلىق ب ا ق.

يران: سيرەك كەزدەسەتىن اعاش اۋىل - «فارس» اقپارات اگەنتتىگى

جەرگىلىكتى اعاش اۋىل يراننىڭ حوراسان- ە رازاۆي وبلىسىنىڭ نيشاپۋر قالاسىنا جاقىن ماڭدا ورنالاسقان.

«بۇل - يراندا سيرەك كەزدەسەتىن تەڭدەسسىز اۋىل. ول ينجەنەر حاميد مودجاحەديدىڭ ارقاسىندا تولىعىمەن اعاشتان سالىنعان. بۇل اۋىلدىڭ كورنەكتى جەرلەرىنە اعاش مەشىت، مۇراجاي، كىتاپحانا، مەيرامحانا، دۇكەن، ناۋبايحانا، كۇركە، جالعا بەرىلەتىن شاعىن بولمەلەر مەن جاسىل كەڭىستىك جاتادى»، - دەپ جازادى parstoday اقپارات اگەنتتىگى.

ۇلى جىبەك جولى بويىندا زاماناۋي كەرۋەن سارايلار سالىنادى – ءو ز ا

وزبەكستان رەسپۋبليكاسىنىڭ تۋريزمدى دامىتۋ كوميتەتىندە قىتايدىڭ BES Cultural Tourism Group كومپانياسى وكىلدەرىمەن تۋريزم يندۋسترياسىنىڭ ينۆەستيتسيالىق الەۋەتىنە بايلانىستى كەزدەسۋ ءوتتى.

بۇل تۋرالى وسى اپتادا وزبەكستاننىڭ «ءو ز ا» اقپارات اگەنتتىگى حابارلاعان بولاتىن.

كەزدەسۋدە قىتايلىق دەلەگاتتار ۇلى جىبەك جولىنىڭ تۋريستىك ءدالىزى بويىندا زاماناۋي كەرۋەن سارايلار سالۋ جوباسىنا ينۆەستيتسيا تارتۋ نيەتى بار ەكەنىن جەتكىزگەن.

بۇل ساۋلەت قۇرىلىسىنىڭ جوباسىندا قىتاي مەن ورتالىق ازيا قالالارىنداعى تۋريزمنىڭ دامىعان ورتالارىندا (بارلىعى - 30) بىرىگىپ ينۆەستيتسيا قورىن قۇرۋ كوزدەلگەن.

«قىتايدىڭ BES Cultural Tourism Group كومپانياسى وكىلدەرى اتالعان جوبانى جۇزەگە اسىرۋ مەن مەموراندۋمعا قول قويۋ ماقساتىندا وزبەكستان رەسپۋبليكاسىنىڭ تۋريزمدى دامىتۋ كوميتەتى وكىلدەرىن 10-12- قىركۇيەك ارالىعىندا قىتايدىڭ تسيان قالاسىندا وتەتىن حالىقارالىق ەكونوميكالىق فورۋمعا شاقىردى. سونداي-اق قىتايلىق كومپانيا سامارقاندا تۋريستەر ءۇشىن بارلىق قولايلى جاعداي جاسالعان زاماناۋي كەرۋەن ساراي سالۋدى العا تارتىپ، ونداعى رەستوران، قوناق ءۇي جانە ساۋدا ورىندارى مەن اقپاراتتىق دۇڭگىرشەكتەردىڭ جوباسىنا 100 ميلليون دوللار ينۆەستيتسيا سالۋ نيەتىندە ەكەنىندە جەتكىزدى» دەپ جازادى وزبەكستاندىق ب ا ق.

ءوز كەزەگىندە تۋريزمدى دامىتۋ كوميتەتى وكىلدەر قىتايلىقتاردى 29-30- تامىزدا جىززاق قالاسىندا وتەتىن حالىقارالىق ينۆەستيتسيالىق فورۋمعا شاقىرعان.

اۆتور: بەيسەن سۇلتان