قازاقستاندىق دزيۋدوشىلار ازيا كۋبوگىن ءتورت التىن مەدالمەن قورىتىندىلادى

نۇر-سۇلتان. قازاقپارات - اقتاۋ قالاسىندا دزيۋدودان تۇرار جولدىبايەۆتى ەسكە الۋعا ارنالعان اشىق ازيا كۋبوگى مارەگە جەتتى، دەپ حابارلايدى قازاقپارات ءتىلشىسى.

قازاقستان دزيۋدو فەدەراتسياسى ءمالىم ەتكەنىندەي، قازاقستان قۇراماسى جارىس قورىتىندىسىندا 4 التىن، 2 كۇمىس، 10 قولا مەدالدى جەڭىپ الدى.

جالپى كوماندالىق ەسەپتە 7 التىن، 8 كۇمىس جانە 10 قولا جۇلدەمەن رەسەي قۇراماسى كوش باستاسا، قازاقستاندىقتار ەكىنشى ورىندا. وڭتۇستىك كورەيا 2 التىن، 3 قولامەن ءۇشىنشى ورىنعا ىلىكتى.

تۋرنيرگە ازەربايجان، گونكونگ، يران، قازاقستان، وڭتۇستىك كورەيا، قىرعىزستان، موڭعوليا، رەسەي، يسپانيا، تاجىكستان جانە وزبەكستان، بارلىعى 11 ەلدەن 175 تاتامي شەبەرى قاتىسىپ، باق سىنادى.

جارىستىڭ ەكىنشى كۇنى قازاقستان قۇراماسىنان ۆيكتور دەميانەنكو (100 كەلى) چەمپيون اتاندى. سونداي-اق زارينا رايفوۆا (78 كەلى) مەن ايبول نىسانالي (81 كەلى) كۇمىس جۇلدەنى ەنشىلەدى. ال زەرە بەكتاس قىزى (70 كەلى)، نازگۇل ماراتوۆا (+78)، سۇڭعات زاكاريايەۆ (90 كەلى)، نۇرلىحان شارحان (100 كەلى) جانە نۇرداۋلەت جارىلعاپوۆ (+100 كەلى) ءۇشىنشى ورىنعا كوتەرىلدى.

ەسكە سالا كەتەيىك، بۇدان بۇرىن قازاقستان قۇراماسى جارىستىڭ العاشقى كۇنى ءۇش التىن العانىن جازعان بولاتىن.

تۋرنير جەڭىمپازدارىنا 100، كۇمىس جۇلدەگەرگە 60، قولا مەدال يەگەرىنە 40 ۇپاي بەرىلەدى.