قازاقستان «بەسىنشى بۋىن» بايلانىس جەلىسىن ەنگىزۋدە الەم ەلدەرىنىڭ وندىعىنا كىرەدى

نۇر- سۇلتان. قازاقپارات – ق ر سيفرلىق دامۋ، يننوۆاتسيالار جانە ايەروعارىش ونەركاسىبى ۆيتسە- ءمينيسترى ابىلايحان وسپانوۆ ەلىمىزدە 5G جەلىسىن ەنگىزۋگە قاتىستى تۇسىنىك بەردى، دەپ حابارلايدى قازاقپارات ءتىلشىسى.

ۆيتسە- مينيستر نۇر- سۇلتان، الماتى جانە شىمكەنتتە 5G جەلىسى بويىنشا قاناتقاقتى جوبا قولعا الىنعانىن ەسكە سالدى.

«بۇل جۇمىستار پروۆايدەردەن قانداي رەسۋرستار كەرەكتىگىن ايقىنداپ بەرەدى. وسى شارالاردىڭ ناتيجەسى بويىنشا 5G ەنگىزىلەدى. وزدەرىڭىز بىلەسىزدەر، قازاقستان العاشقىلاردىڭ ءبىرى بولىپ 4G جۇيەسىن ەنگىزۋدى باستاعان ەدى، ەندى بۇگىندە 5G- ءدى ەنگىزۋگە دە ەرتە قامداندىق»، - دەدى ا. وسپانوۆ.

وسى ورايدا، ول اتالعان جاڭا جۇيەنى ەلىمىزدە كەڭىنەن تاراتۋ ءۇشىن 5G جەلىسىمەن جۇمىس ىستەي الاتىن قاجەتتى قۇرىلعىلار، ياعني سمارتفوندار بولۋى ءتيىس ەكەنىن ءتۇسىندىردى.

ايتا كەتەيىك، بيىل كوكتەمدە ق ر پرەمەر- ءمينيسترى اسقار مامين قازاقستاندا «بەسىنشى بۋىن» بايلانىس جەلىسىن ەنگىزۋ ماسەلەلەرى تۋرالى كەڭەس وتكىزدى.

ەل اۋماعىن 5G قامتۋ ءۇشىن ينفراقۇرىلىم جاساۋ بويىنشا جۇمىستار اياسىندا وسى جىلدىڭ سوڭىنا دەيىن نۇر- سۇلتان، الماتى، شىمكەنت قالالارىندا پيلوتتىق جوبانى ىسكە اسىرۋ جوسپارلانعان. جالپى، 5G بايلانىس جەلىسىمەن ادامدار سانى 50 مىڭنان اساتىن بارلىق ەلدى مەكەندەر قامتىلادى دەپ كۇتىلۋدە.

ق ر سيفرلىق دامۋ، قورعانىس جانە ايەروعارىش ونەركاسىبى مينيسترلىگىنىڭ مالىمەتتەرىنشە، قازاقستان ا ق ش، وڭتۇستىك كورەيا، شۆەيساريا، ەستونيا ەلدەرىمەن قاتار جاڭا جەلىنى ەنگىزۋدى پيلوتتاۋعا كوشكەن الەم ەلدەرىنىڭ وندىعىنا كىرەدى.

اۆتور: رۋسلان عابباسوۆ