بالاباقشادان بالاعا قالاي ورىن الۋعا بولادى؟

نۇر-سۇلتان. قازاقپارات - قازىرگى كەزدە «كۇيىپ» تۇرعان وتكىر ماسەلەنىڭ ءبىرى - بالاباقشاعا جولداما الۋ. ەلوردالىق قۇزىرلى باسقارماداعىلار بۇل جۇيەنىڭ جىل بويىنا ءۇزىلىسسىز جۇمىس ىستەيتىنىن ايتادى.

بالاباقشاعا بالاسىن ورنالاستىرا الماعان اتا- انالارعا الداعى ۋاقىتتا تاعى دا مۇمكىندىكتەر بولادى ەكەن. قالالىق ءبىلىم باسقارماسىنىڭ قىزمەتكەرلەرى وسىعان وراي بىرنەشە پايدالى كەڭەس بەردى، دەپ حابارلايدى ەلوردا ينفو.

ءبىلىم بەرۋ باسقارماسى مەكتەپكە دەيىنگى ۇيىمدارعا بالا ىرىكتەۋ ماسەلەلەرى بويىنشا كەڭەس بەرەتىن ورىنداردىڭ جۇمىسىن توقتاتقانىن حابارلادى. مۇنداي ورىندار وقۋشىلار سارايىنىڭ بازاسىندا بالالاردى جاپپاي بالاباقشالارعا ءبولۋ كەزەڭىندە اشىلعانى ءمالىم.

نۇر- سۇلتان قالالىق ءبىلىم باسقارماسىنىڭ ستراتەگيا، تالداۋ جانە سيفرلىق تەحنولوگيالار ءبولىمىنىڭ جەتەكشىسى جازيرا اسانوۆا بالانى بالاباقشاعا ورنالاستىرۋ بويىنشا قانداي دا ءبىر كەڭەس قاجەت بولعان جاعدايدا ونى جۇمىس كۇندەرى كەز كەلگەن مەملەكەتتىك بالاباقشادان الۋعا بولاتىنىن ايتادى.

«ەگەر ءسىز بالاباقشاعا جولداما الىپ، 5 جۇمىس كۇنى ىشىندە بالاباقشاعا بارا المايتىن بولساڭىز، وندا 5-كۇنى «جەكە كابينەتتە» «جولدامانىڭ ۋاقىتىن ۇزارتۋ» دەگەن تەتىك پايدا بولادى»، - دەپ ءتۇسىندىردى ج. اسانوۆا.

قۇزىرلى مەكەمەدەگىلەر 18 - شىلدەدەن باستاپ جولدامالار بەيبىتشىلىك كوشەسى، 11 ءۇي، 119 بولمە مەكەنجايىنداعى ءبىلىم بەرۋ باسقارماسىندا راستالاتىنىن ايتتى. وسى اپتادا 2017، 2016، 2015، 2014 جانە 2013 -جىلى تۋعان بالالارعا جاڭا ورىندار بەرىلۋدە. ءبىراق ولاردىڭ سانى شەكتەۋلى.

«جاڭالىقتاردان قۇر قالماۋ ءۇشىن سىزدەر «رەتتەۋ» دەگەن بولىمدەگى «جەكە كابينەتكە» كەلەتىن حابارلامالاردى مۇقيات وقۋلارىڭىز كەرەك. سىزدەر تاڭداعان بالاباقشادا بوس ورىن بولسا، اقىلدى جۇيە الدىن الا سىزگە حابارلاما جىبەرەدى. الايدا ول سپام- جاشىككە ءتۇسىپ كەتۋى مۇمكىن»، - دەيدى باسقارما وكىلى.

سونىمەن قاتار بالاباقشاداعى جاڭا ورىنداردى بوساعان ورىندار حاتتاماسىنان دا كورۋگە بولادى. ءار اتا- انانىڭ ەسىندە ۇستايتىن ءبىر جايت، بارلىق بوس ورىندار 3 جۇمىس كۇنىنەن كەيىن جۇرتتىڭ ەرىكتى تاڭداۋىنا شىعارىلادى. ياعني حابارلاما ەڭ الدىمەن باسىمدىق بەرىلگەن ادامدارعا كەلەدى.

مىسالى، ءبىر بالاباقشاعا كەزەكتە 3 ادام تۇرسا، ياعني جاڭادان بوساعان ءۇش ورىن سولارعا بەرىلەدى. وندا دا كەزەك ساقتالادى. ال كەزەكتە تۇرعاندار الىپ بولعاندا، قالعاندارعا ۇلەستىرىلەدى. باسقارما ماماندارى ءبىر ادامنىڭ ءبىر مەزگىلدە بىرنەشە جەرگە ءوتىنىش بەرگەنىن، ءبىر لوگينمەن 2-3 ادامنىڭ كىرگەنىن انىقتاعان جاعدايدا بۇعاتتاپ تاستايدى.

ۇسىنىلعان بالاباقشاعا جولداما الىپ، ءبىراق بەلگىلى ءبىر جاعدايلارعا بايلانىستى بالاباقشانى اۋىستىرۋ مۇمكىندىگى دە بار. باسقارما قىزمەتكەرلەرى ەلوردامىزداعى بارلىق بالاباقشالارعا بالالاردى ىرىكتەۋ شارالارى اياقتالعاننان كەيىن عانا باسقا جەرگە ورىن اۋىستىرۋعا بولاتىنىن ايتادى. بالاباقشا مەڭگەرۋشىلەرى مۇنداي ءوتىنىشتى ناقتى مۇددەلىلىك تانىتقان اتا- انالار بەرگەنىن، ەشقانداي الاياقتىق ەمەس ەكەنىنە كوزىن جەتكىزۋى ءتيىس.

«ەگەر ءسىز وزىڭىزگە ۇسىنىلعان بالاباقشاداعى ورىن ۇناماعاندىقتان نەمەسە بالاڭىزدىڭ جاسى سايكەس كەلمەگەندىكتەن ورىن الماعان بولساڭىز، ۋايىمداۋدىڭ قاجەتى جوق. ويتكەنى ءارقاشان مۇمكىندىك بار. سەبەبى اۆتوماتتاندىرىلعان جۇيە جىل بويى جۇمىس ىستەيدى جانە جاڭا ورىندار بولعان كەزدە بالاباقشالارعا جولدامالار ۋاقىتىندا بەرىلەدى»، - دەپ سەندىردى جازيرا اسانوۆا.

www.24.kz