قازاقتىڭ سالت-ءداستۇرى تۋرالى كورسەتىلىم پولشادا ارنايى جۇلدەگە يە بولدى
وسى تۇستا بايقاۋعا قاتىسۋعا ءوتىنىم بەرىپ، ەلىمىزدىڭ اتىنان بارعان كوماندانى ۇيىمداستىرۋشى اقبوتا قاليەۆامەن قازاقپارات ءتىلشىسى سۇحباتتاسقان بولاتىن.
«اتالعان بايقاۋ پولشانىڭ باتىس ايماعىنداعى زەلەنا-گۋرا قالاسىندا جارتى عاسىردان استام ۋاقىت تۇراقتى تۇردە ءوتىپ كەلەدى.
«Faces of Traditions» بايقاۋىندا ءاربىر قاتىسۋشى مەملەكەت ءوزىنىڭ ۇلتتىق سالت-ءداستۇرى مەن قۇندىلىقتارىن قويىلىم، ونەر جانە ۇلتتىق تاعامدار مەن ويىن ارقىلى كورسەتەدى. قازاقستان ءوز كەزەگىندە بۇل بايقاۋعا العاش رەت قاتىستى.
جالپى بايقاۋعا الەمنىڭ 70 كە جۋىق ەلىنەن ءوتىنىم كەلىپ تۇسكەن. ءادىلقازىلار القاسى سونىڭ ىشىنەن تەك 6 ەلدى (ليتۆا، سلوۆاكيا، ۋكراينا، پولشا، رۋمىنيا جانە قازاقستان) اقتىق سىنعا تاڭداپ الدى. ونىڭ ىشىندە قازاقستان دا بار. بايقاۋعا ءوتىنىم بەرىپ الىپ، ءبىراز ۋاقىت دەمەۋشى ىزدەدىك. ناتيجەسىندە الماتى وبلىستىق تۋريزم باسقارماسى قولداۋ ءبىلدىردى»، - دەدى «سارباز رۋحى» تاريحي-پاتريوتتىڭ كلۋبىنىڭ وكىلى، بايقاۋعا قازاقستان كومانداسىنىڭ قاتىسۋىنا ۇيىتقى بولعان اقبوتا قاليەۆا.
ونىڭ ايتۋىنشا، اسىرەسە ەۋروپالىقتار ۇلى دالانىڭ ماحاببات حيكاياسى قويىلىمىن ەرەكشە ىقىلاسپەن قابىل العان. وندا ايسۇلۋ مەن مەدەتتىڭ سەزىمدەرى جايلى باياندالادى. جانە حيكايا «بالقاش» ەپوسىنىڭ نەگىزىندە جازىلعان.
«بايقاۋدىڭ العاشقى كۇنى ۇلتتىق تاعامدار شەبەرلىگى ۇيىمداستىرىلدى، وندا ءبىز باۋىرساق، جەنت جانە ىرىمشىكتى ۇسىندىق. قازاقتىڭ ەت تاعامى نەگە بولمادى دەسەڭىز، سەبەبى بىزگە شەكتەۋلى ۋاقىت بەردى، سوندىقتان ونى دايىنداۋعا مۇمكىندىك بولمادى. ودان سوڭ ۇلتتىق ويىندارعا كەزەك كەلدى، وندا ءبىز ارقان تارتۋ، اسىق اتۋ جانە قازاق كۇرەسىن كورسەتتىك. ودان بولەك، ءوزىمىزدىڭ بەسىككە سالۋ مەن تۇساۋكەسەر ءداستۇرىمىزدى ورتاعا سالدىق. بايقاۋداعى باستى قويىلىم ول ايسۇلۋ مەن مەدەتتىڭ سەزىمىنىڭ نەگىزىندە قۇرالعان ۇلى دالانىڭ ماحاببات حيكاياسى تۋرالى قويىلىم بولدى. ءبىر اپتاعا سوزىلعان بايقاۋ ناتيجەسىندە قازاقستان كومانداسى ارنايى جۇلدە يەلەندى. كوماندا قۇرامىندا بارلىعى 15 ادام بولدى»، - دەدى ول.
ا. قاليەۆانىڭ سوزىنە سەنسەك «سارباز رۋحى» تاريحي-پاتريوتتىڭ كلۋبى بۇعان دەيىن دە قازاقستاننىڭ اتىنان بىرنەشە حالىقارالىق بايقاۋ، فەستيۆالگە قاتىسىپ، ۇلتتىق قۇندىلىقتارىمىزدى دارىپتەپ ءجۇر.
