اقمولا وبلىسىندا «كوكشەتاۋ-نۇر-سۇلتان» تاس جولى بويىندا بەس تاريحي تۇلعانىڭ ەسكەرتكىشى ورناتىلدى
كوكشەتاۋ قالاسىنان شىعا بەرىستە ورىن تەپكەن قازاق حالقىنىڭ ۇلى تاريحي تۇلعالارى اقان سەرى، ءبىرجان سال، كەنەسارى حان، ۇكىلى ىبىراي جانە بالۋان شولاق ەسكەرتكىشتەرى كوكشەتاۋ قالاسىنىڭ 195 جىلدىعى قارساڭىندا «رۋحاني جاڭعىرۋ» باعدارلاماسىن جۇزەگە اسىرۋ شەڭبەرىندە ورناتىلعان.
«تاريحتىڭ شيىر-شيىر جولدارىندا، جىلداردىڭ اۋدارىلعان پاراعىندا تالاي بوزداقتاردىڭ ەسىمى بار. اقمولا وبلىسىنىڭ عانا ەمەس، ءيىسى قازاق جۇرتىنىڭ مەرەيىن كوتەرىپ، رۋحىن اسقاقتاتقان ايبىندى دا دارابوز ەرلەردىڭ قۇرمەتىنە ءتورت اۋداندى قامتيتىن «كوكشەتاۋ -نۇر-سۇلتان» تاس جولى بويىندا، كوكشەگە كەلە جاتقان ادامدى ءسان-سالتاناتىمەن قارسى الاتىن 5 تۇلعانىڭ ەسكەرتكىشى بوي كوتەردى. ولار: كەنەسارى حان، ءبىرجان سال، اقان سەرى، ۇكىلى ىبىراي، بالۋان شولاق. قاسيەتتى كوكشە توپىراعىندا تاربيە العان، ءوزىنىڭ سانالى عۇمىرىن كۇرەسپەن وتكىزگەن ەرلەر - حالىقتىڭ جۇرەگىندە. عاسىرلار اۋىسىپ، زامان اۋسا دا، ەلىم دەپ ەڭىرەگەن ەرلەردىڭ اتتارى ۇمىتىلماق ەمەس. سالقار كوشتىڭ باسىن باستاعان، جاڭا تۋعان شولپانداي باعىت-باعدار بەرگەن ۇلتتىڭ كوش باستاۋشىلارى ەسكەرىلىپ-ەلەنسە، دەمەك، تۇتاس ەلدىڭ مەرەيى ۇستەم، ەڭسەسى بيىك»، - دەيدى «رۋحاني جاڭعىرۋ» جوبالىق كەڭسەنىڭ باسشىسى قايرات سەيتقازين.
