اسقار مامين ارىس قالاسىن قالپىنا كەلتىرۋ جۇمىستارىمەن تانىستى

ارىس. قازاقپارات – ق ر پرەمەر-ءمينيسترى اسقار مامين ارىس قالاسىنا كەلىپ، جارىلىستان كەيىنگى قالپىنا كەلتىرۋ جۇمىستارىمەن تانىستى.

ۇكىمەت باسشىسى قۇرىلىس جۇمىستارىنا تارتىلعان ءبىرقاتار وبلىس پەن اۋداندارعا قاراستى سەكتورلاردى ارالاپ كوردى، دەپ حابارلايدى قازاقپارات ءتىلشىسى.

ارىستىقتارعا اپتا سايىن كەلۋگە ۋادە بەرگەن ۇكىمەت باسشىسى ماڭعىستاۋ وبلىسى مەن سايرام اۋدانىنا تيەسىلى اۋماقتاعى اتقارىلىپ جاتقان جۇمىستاردى كورىپ شىقتى. جەرگىلىكتى تۇرعىندارمەن كەزدەسىپ، ماسەلەلەرىن تىڭدادى. جەرگىلىكتى حالىق قينالعان ساتتە ءبىر كىسىدەي جۇمىلىپ، قولداۋ بىلدىرگەن بارشا قازاقستاندىقتارعا شەكسىز العىستارىن ءبىلدىردى.

ايتا كەتەيىك، ماڭعىستاۋ وبلىسى مەن سايرام اۋدانىنا بەكىتىلگەن سەكتوردا جالپى سانى 331 تۇرعىن ءۇي بار بولسا، سونىڭ 279 ىنا جوندەۋ جۇمىستارى جۇرگىزىلۋدە. ونىڭ ىشىندە 4 ءۇي جاڭادان سالىنباق. قازىر مۇندا زاقىم كەلگەن ۇيلەردى قالپىنا كەلتىرۋ جۇمىستارىن ۋاقتىلى اياقتاۋ ءۇشىن قۇرىلىسشىلار بارىن سالۋدا. اپتاپ ىستىققا قاراماستان 7 بىردەي قۇرىلىس كومپانياسى مەن 310 جۇمىسشى كۇندىز-ءتۇنى جۇمىس ىستەۋدە. سول جۇمىستاردىڭ ارقاسىندا بۇگىنگە دەيىن 102 باسپانا جوندەۋدەن ءوتىپ، 147 ۇيدە قۇرىلىس جۇمىستارى جۇرگىزىلۋدە.

ۇكىمەت باسشىسى مۇنان سوڭ قوستاناي وبلىسى مەن سارىاعاش اۋداندارىنا بەكىتىلگەن سەكتوردىڭ دا جۇمىسىمەن ارنايى تانىستى. مۇندا ۇكىمەت باسشىسى اپات كەزىندە باسپاناسى جارامسىز كۇيگە تۇسكەن جەرگىلىكتى تۇرعىن رۇستەمبەك قالماحانوۆتىڭ ۇيىنە بارىپ، جاڭادان سالىنىپ جاتقان باسپانانىڭ قۇرىلىسىن كورىپ شىقتى.

ايتا كەتەيىك، بۇگىنگى تاڭدا ارىس قالاسىندا 8408 جەكە تۇرعىن ءۇي مەن 105 كوپ قاباتتى ءۇي بار. جارىلىس سالدارىنان 7171 جەكە تۇرعىن ءۇي مەن 97 كوپ قاباتتى ۇيگە زاقىم كەلسە، 205 جەكە تۇرعىن ءۇي مەن 8 كوپ قاباتتى ءۇي جارامسىز دەپ تانىلدى. ارىس قالاسىن قالپىنا كەلتىرۋ جۇمىستارىن جۇرگىزۋ ءۇشىن 7597 جەكە تۇرعىن ءۇي مەن 98 كوپقاباتتى ۇيگە اقاۋ اكتىلەرى جاسالىپ، 4572 جەكە ءۇي مەن 78 كوپقاباتتى ءۇيدىڭ جوندەۋ جۇمىستارى باستالدى. سونىمەن قاتار، 107 جەكە تۇرعىن ءۇي مەن 1 كوپقاباتتى ءۇيدى قايتا سوعۋ جۇمىستارى جۇرگىزىلۋدە. كۇنى بۇگىنگە دەيىن 1413 ءۇيدىڭ جوندەۋ جۇمىستارى اياقتالىپ، تۇرعىندارعا تاپسىرىلدى. ءاربىر سەكتورداعى جۇمىستاردى جۇرگىزۋ ءۇشىن وبلىس، قالالاردان 6441، وبلىس اۋداندارىنان 349 جۇمىسشى تارتىلعان.

باسپاناسىز قالعان تۇرعىندارعا ورتا مەكتەپتەن 800 ورىن دايىندالىپ، ولار جاتىن ورىنمەن جانە ءۇش مەزگىل تاماقپەن قامتاماسىز ەتىلگەن. بۇگىنگى تاڭدا ءتيىستى ورتالىقتا 106 وتباسىنداعى 371 ادام ورنالاستىرىلعان.

سونداي-اق، اپات بولعان اۋماقتا 66 الەۋمەتتىك نىساندى قالپىنا كەلتىرۋ «سامۇرىق- قازىنا» ءال-اۋقات قورىنا تاپسىرىلعان. ونىڭ 54 ءى ءبىلىم، 8 ءى دەنساۋلىق ساقتاۋ جانە 4 ەۋى سپورت نىساندارى. الەۋمەتتىك ينفراقۇرىلىم بويىنشا 66 نىساندا قۇرىلىس جۇمىستارى جۇرگىزىلۋدە.