بۇزاقىلاردىڭ سازايىن بەرگەن جىگىت وقيعانىڭ ءمان-جايىن ايتتى
دوسى كامەراعا ءتۇسىرىپ تۇرعان ۋاقىتتا ول ءبىر ءوزى ءۇش ادامعا قارسى تۇرىپ، ۇرىلاردىڭ ويلاعان ءىسىن جۇزەگە اسىرۋىن توقتاتتى. رۋسلان سول كۇنى قانداي جاعداي بولعانىن ايتىپ بەردى، - دەپ حابارلايدى Tengrinews.kz ءتىلشىسى.
رۋسلان مۇحانبەتقاليەۆ ارەكەتى جەلى قولدانۋشىلارىن ءتانتى ەتتى. وقيعانىڭ ۆيدەوسى Instagram جەلىسىندەگى كوپتەگەن پابليكتەردە جاريالاندى. وندا ول ءۇش ادام ءبىر جىگىتكە جابىلىپ جاتقان جەرىنەن ارالاسىپ، قاسكويلەردىڭ قاشۋىنا دەيىن اپارعان.
رۋسلان دوسىمەن بىرگە وتىرعان ۋاقىتتا جانجالداسقان ادامداردىڭ داۋىسىن ەستىگەنىن ايتادى. «دوسىمىز ەكەۋىمىز ۇيدە وتىرعانبىز. سىرتتا بىردەمەنىڭ بولىپ جاتقانىن ەستىدىك. ءۇيدىڭ بالكونىنا شىققانىمىزدا توبەلەس بولىپ جاتقانىن كوردىك. دوسىما تومەنگە ءتۇسىپ، جىگىتكە كومەكتەسەيىك دەپ ۇسىنىس تاستادىم. ءبىراق ءوزىم بارۋدى شەشتىم، ال دوسىم بولسا ۆيدەوعا ءتۇسىرىپ وتىردى»، - دەيدى رۋسلان مۇحانبەتقاليەۆ ول وسى جاعدايدا باسقا ارەكەتكە بارا المايتىنىن ايتتى.
«بىرنەشە ادامنىڭ جالعىزدى تەپكىلەپ جاتقانىنا قاراپ تۇرا المادىم. كىرىپ باردىم دا، قولىمنان كەلگەندى ىستەدىم. جاعىمنان سوققى الىپ تا ۇلگەردىم، ءبىراق كومەكتەسە الدىم. تاياق جەگەن جىگىتتىڭ ايتۋىنشا، ونىڭ قالتاسىندا تەلەفون مەن قوماقتى قاراجات بولعان، قاسكويلەر سونى تارتىپ الماقشى بولسا كەرەك»، - دەدى اتىشۋلى ۆيدەونىڭ كەيىپكەرى.
رۋسلان سول كۇنى كەشكى ۋاقىتتا (2-ىقشاماۋدانىندا) ءۇيىنىڭ الدىندا بەلگىسىز ادامدار اينالشىقتاپ جۇرگەنىن ايتادى.
«كەك الۋعا كەلگەن بولار دەپ ويلادىم. سىرتقا شىعىپ جان-جاعىما قارادىم، بارلىعى دۇرىس ەكەن، ەشكىم دە كەلىپ تيىسپەدى. مەن بۇل جولى دا ولارعا سازايىن بەرەر ەدىم، ءبىراق ءبىر توپ ادامنىڭ جالعىزعا جابىلعانى دۇرىس ەمەس. سول كەزدە مەن ءبىر جىگىتتىڭ ارتىنان قۋالاپ كەتتىم، پوليتسەيدى كورىپ قالىپ، وقيعا جايلى ايتتىم. ولار ۇستالادى دەپ ۇمىتتەنەمىن»، - دەدى رۋسلان.
جىگىت بۇرىندارى ايكيدو مەن ستريت-ۆوركاۋتپەن اينالىسقانىن ايتادى.
سوڭعى ۋاقىتتا برۋسيادا جاتتىعىپ، تۋرنيككە تارتىلادى ەكەن. وسىلار وعان ايتارلىقتاي كومەكتەسكەن.
«مۇنداي وقيعالار بۇرىندارى دا بولعان، ءبىراق «جۇلدىز» بولعان ەمەسپىن. مەن قاراپايىم جۇمىسشىمىن، كولىككە گاز قوندىرۋمەن اينالىسامىن. ءار كىم جۇرەك قالاۋىمەن جۇرگەنى دۇرىس دەپ ويلايمىن. سول سەبەپتى دە مەن شەتتە تۇرىپ قالمادىم»، - دەپ اياقتادى رۋسلان. ماڭعىستاۋ وبلىستىق پوليتسيا دەپارتامەنتى ۆيدەونىڭ تەكسەرىلىپ جاتقانىن جانە كىنالىلەر جاۋاپقا تارتىلاتىنىن ايتقان.