تاۋەلسىزدىك جىلدارىندا قانشا ادام قاجى اتاندى
«جالپى، ستاتيستيكالىق مالىمەتتەرگە كەلسەك، جىل ساناپ قاجىلىققا نيەت ەتۋشىلەر سانى ارتىپ كەلەدى. 1990 -2019 -جىلدار ارالىعىندا قازاقستان ازاماتتارىنا ساۋد ارابياسى تاراپىنان 56635 قاجىلىق كۆوتا بولىنگەن»، - دەدى ول.
كوميتەت وكىلى تاۋەلسىزدىكتىڭ العاشقى جىلدارى ءبىزدىڭ ەل ازاماتتارىنا ونداعان كۆوتا عانا بولىنگەنىن، كەيىن ونىڭ كوبەيە تۇسكەنىن ايتادى.
«1990 -جىلى ساۋد ارابياسى قازاقستاندىقتارعا 50 كۆوتا بولسە، 1991 -جىلى 74 كۆوتا بولگەن. وسىلاي وسە كەلە، بيىل 3200-گە جەتىپ وتىر»، - دەدى ەرجان نۇكەجانوۆ.
قازاقستان مۇسىلماندارى ءدىني باسقارماسى ءتوراعاسىنىڭ ءبىرىنشى ورىنباسارى، نايب ءمۇفتي ناۋرىزباي وتپەنوۆتىڭ ايتۋىنشا، قازاقستان ازاماتتارىن قاجىلىق ساپارعا اپارۋمەن 18 كومپانيا اينالىسپاق.
«قاجىلىققا بارۋشىلاردىڭ قاۋىپسىزدىگىنە جاۋاپ بەرەتىن ارنايى ميسسيا قۇرىلدى. ول ميسسيا 12 ادامنان تۇرادى. ولاردىڭ قاتارىندا نايب ءمۇفتيدىڭ جەتەكشىلىگىمەن قازاقستان مۇسىلماندارى ءدىني باسقارماسىنىڭ 8 وكىلى، ءدىن ىستەرى كوميتەتىنىڭ وكىلى جانە 3 دارىگەر بار. ودان بولەك قازاقستاندىقتاردىڭ قاجىلىققا بارۋىنا 18 فيرما جاۋاپتى. وسى ءار فيرماعا ءبىر ءدىني قىزمەتكەر جانە بەكىتىلگەن»، - دەدى ءمۇفتيات وكىلى.
ەسكە سالساق، جىل باسىندا قازاقستاندىقتاردى قاجىلىققا اپاراتىن ەكى اۋە كومپانياسى بەكىتىلگەن بولاتىن. بيىل وڭىرلەر اراسىندا تۇركىستان وبلىسىنان قاجىلىققا بارۋعا نيەت بىلدىرۋشىلەر سانى كوپ.
ورتالىق كوممۋنيكاتسيالار قىزمەتىندە وتكەن بريفينگتە قازاقستان مۇسىلماندارى ءدىني باسقارماسى ءتوراعاسىنىڭ ءبىرىنشى ورىنباسارى، ناۋرىزباي وتپەنوۆ قاجىلىق ۆيزا كىمدەرگە بەرىلمەيتىنىن ءتۇسىندىردى.
«ۆيزا بويىنشا ارنايى شەكتەۋ جوق. ءبىزدىڭ تاجىريبەمىزدە ساۋد ارابياسى تاراپىنان قاجىلىق ۆيزاعا بەرگەن ءوتىنىشتى قايتارعان جاعداي بولىپ كورگەن جوق. ەڭ اۋەلى، قاجىلىققا بارعىسى كەلگەن ادام مۇسىلمان بولۋى كەرەك. تەك ايەل ادامدار جالعىز بارعىسى كەلسە، ۆيزا سولارعا عانا بەرىلمەيدى. ياعني، ونىڭ جانىندا ەرتىپ جۇرەتىن تۋىسقان ەر ادام نەمەسە كۇيەۋى بولۋى شارت»، - دەدى ءمۇفتيات وكىلى.
ونىڭ ايتۋىنشا، قاجىلىققا بارعىسى كەلەتىن وتانداستارىمىز كوپ بولعانىمەن، ناقتى مۇمكىندىگى بار ادامداردىڭ سانى شەكتەۋلى.
«نەگىزى ساۋد ارابياسى ەل تۇرعىندارىنىڭ 10 پايىزدىق كورسەتكىشىنە دەيىن رۇقسات كۆوتا بولەدى. ازىرگە ءبىزدىڭ ەلدە نيەتىنە مۇمكىندىگى ساي ادامداردىڭ سانى 3200 بولىپ وتىر»، - دەدى ناۋرىزباي وتپەنوۆ.
اۆتور: ەسىمجان ناقتىباي