قىتايدا جەتى قۇربى قارتايعاندا بىرگە تۇرۋ ءۇشىن ءزاۋلىم ساراي تۇرعىزدى

نۇر-سۇلتان. قازاقپارات - قىتايلىق گۋانجوۋ قالاسىنان شىققان قۇربىلار كارىلىك شاعىن بىرگە وتكىزۋ ءۇشىن بىرىگىپ، ءۇش قاباتتى ءۇيدى ساتىپ العان.

جوندەۋ جۇمىستارىن بىتىرگەن ايەلدەر بۇل ۇيگە 60 جاسقا كەلگەندە كوشىپ كەلمەك دەپ حابارلايدى bigpicture.ru سايتى.

قىتايدان شىققان جەتى قۇربى ءبىرىن-ءبىرى 20 جىلعا جۋىق ۋاقىت تانيدى ەكەن. ولار گۋانجوۋدان 70 شاقىرىم جەردە ورنالاسقان جالپى اۋدانى 700 شارشى مەتردى قۇرايتىن سالىنىپ بىتپەگەن ءۇش قاباتتى ءۇيدى تاۋىپ، ونى بىرەگەي ۇيگە اينالدىرۋ ءۇشىن ساتىپ الدى.

جىلجىمايتىن مۇلىكتى ساتىپ الۋعا جانە قايتا قۇرۋعا حانىمداردىڭ 4 ميلليون يۋانى كەتتى. بۇل قىتايداعى ەڭ قىمبات ءۇي ەمەس، ءبىراق زەينەتكەرلەرگە قاجەتتىنىڭ ءبارىن تابۋعا بولادى.

ايەل ادامدار شىعارماشىلىققا ىڭعايلى بولاتىن كەڭ ءارى جارىق ءۇي سالعىسى كەلدى. سول سەبەپتى ۇيدەگى بولمەلەردىڭ ءبىرى تۇگەلدەي دەرلىك شىنىمەن قاپتالعان.

ءۇيدىڭ ءبىرىنشى قاباتى قۇربىلاردىڭ جينالىپ، بىرگە ۋاقىت وتكىزۋىنە قولايلى ەتىپ جاسالعان. ول جەردە كەڭەيتىلگەن اس بولمەمەن قوناق بولمەلەرى بار.

ەكىنشى جانە ءۇشىنشى قاباتتا قۇربىلاردىڭ جەكە بولمەلەرى بار. وندا توبەدەن ەدەنگە دەيىن شىنى قابىرعا تۇر.

ايەل ادامدار وزدەرىنە تيەسىلى بولمەلەردىڭ ءستيلى مەن ديزاينىن وزدەرى تاڭدادى. ۇيدەگى بارلىق جيھاز اعاشتان جاسالعان.

ءۇيدىڭ اۋلاسىندا ءداستۇرلى قىتايلىق كۇركە تۇرعىزىلعان. ول جەردە قۇربىلار باس قوسىپ، شاي ىشەتىن بولادى.

ازىرگە كەلىنشەكتەر باسپانالارىندا تۇرمايدى. ولار بۇل جەرگە 60 جاستا، ياعني، زەينەتكە شىعا سالا كوشىپ كەلمەك.