قاراعاندىلىقتار ايماقتارعا جاس مامانداردى تارتۋدىڭ جاڭا ءادىسىن ويلاپ تاپتى

قاراعاندى. قازاقپارات - قاراعاندىلىق شەنەۋنىكتەر جاس دارىگەرلەردى ايماقتارعا تارتۋدىڭ جاڭا ءادىسىن ويلاپ تاپتى.

وڭىرگە «ديپلوممەن اۋىلعا» باعدارلاماسى بويىنشا كەلەتىن مەديتسينالىق جوعارى وقۋ ورىندارىنىڭ تۇلەكتەرىنە مەملەكەتتەن بولاشاقتا الاتىن پاتەرلەرىنىڭ ديزاينى مەن جوباسىن تاڭداۋ مۇمكىندىگى بەرىلەدى، دەپ حابارلايدى قازاقپارات ءتىلشىسى.

بولاشاق دارىگەرلەردىڭ تاڭداۋىنا 3 ۇيدەگى 100 پاتەر ۇسىنىلادى. ولار قارقارالى، تەمىرتاۋ جانە قاراجالدا ورنالاسقان. وتىنىشتەر بارلىق مامانداردان قابىلدانادى. الايدا باسىمدىق اكۋشەر-گينەكولوگتارعا، نەوناتولوگتارعا، ينفەكتسيونيستەرگە جانە جالپى تاجىريبە دارىگەرلەرىنە بەرىلەدى.

«بيىلعى جىل - جاستار جىلى دەپ جاريالانعان سوڭ ءبىز بولاشاق دارىگەرلەرگە ىڭعايلى بولۋ ءۇشىن بارلىق مۇمكىندىكتەردى جاساپ وتىرمىز. تۇراقتى جۇمىسپەن قوسا تۇلەكتەرگە 100 ا ە ك كولەمىندە الەۋمەتتىك قولداۋ كورسەتىلەدى. جانە دە تاعى ءبىر بونۋس - ولار بولاشاق پاتەرلەرىنىڭ جوبالاۋىن وزدەرى تاڭدايدى»، - دەپ اتاپ ءوتتى قاراعاندى وبلىسىنىڭ دەنساۋلىق ساقتاۋ باسقارماسىنىڭ جەتەكشىسى ەرجان نۇرلىبايەۆ.

دەنساۋلىق ساقتاۋ باسقارماسىنان اتاپ وتكەندەي، پاتەرلەرىندەگى جوندەۋ جۇمىستارى كەزىندە اۋىلدىق دارىگەرلەرگە ۋاقىتشا باسپانا جالعا بەرىلەدى. ءوتىنىش بەرۋ ءۇشىن اۋداندىق اكىمدىككە بارىپ، بارلىق قاجەتتى قۇجاتتاردى جيناۋ كەرەك.

وتىنىشتەر قارالعان سوڭ بولاشاق دارىگەرلەر پاتەر ديزاينى مەن جوباسىن اقىلداسۋ ءۇشىن اڭگىمەلەسۋگە شاقىرىلادى. مۇنداي نيەت بىلدىرگەن جاس ماماندارعا اسىعۋ كەرەك، سەبەبى جاڭا باسپاناعا قول جەتكىزگىسى كەلەتىندەر سانى كۇن ساناپ ارتۋدا.