ايەل قاعاز بولشەكتەيتىن قۇرىلعى ۇساقتاپ تاستاعان اقشاسىن ءبىر اي بويى جابىستىرعان

نۇر-سۇلتان. قازاقپارات - وڭتۇستىك كورەيا تۇرعىنى اڭداۋسىزدا ءبىرشاما اقشاسىن شرەدەرگە سالىپ جىبەرىپ، كەسكىلەپ تاستاعان. الايدا ول اقشانى قايتا جابىستىرىپ، بانكتە الماستىرىپ الدى.

بۇل تۋرالى Asia One پورتالى حابارلايدى.

2 - ماۋسىمدا ايەل ىشىندە 50 مىڭ ۆوندىق 11 بانكنوتتى (178 مىڭ تەڭگەدەن اسا) بولعان كونۆەرتتى اڭداۋسىزدا كەڭسەلىك شرەدەرگە سالىپ جىبەرگەن. ول ءوز ارەكەتىن تۇسىنگەن كەزدە كەش بولعان ەكەن.

مۇنان كەيىن ايەل ينتەرنەت قولدانۋشىلارىنان كومەك سۇراعان. قولدانۋشىلار وعان بانك كەمىندە 80 پايىزى تۇتاس بانكنوتتى قابىلدايتىنىن ايتىپتى.

وسىلايشا، ايەل ءبىر اي بويى بوس ۋاقىتىندا بولشەكتەلگەن قاعاز اقشالاردى جابىستىرىپتى. وعان كۇيەۋى مەن قىزى كومەكتەسكەن.

بانك ۇساق بولشەكتەردەن قۇراستىرىلعان اقشانى قابىلداپ، ولاردى جاڭاسىنا الماستىرىپ بەردى.

ءوز كەزەگىندە باسشىسى ايەلدىڭ تاباندىلىعىنا ءتانتى بولىپ، ىنتالاندىرۋ رەتىندە تۇسكى اس الىپ بەرگەن.