پرەزيدەنت جەڭىل رەلستى ترانسپورت قۇرىلىسىن سىنعا الدى
پرەزيدەنتتىڭ ايتۋىنشا. جوبانى باستار كەزدە ارحيتەكتورلاردىڭ پىكىرى ەسكەرىلمەگەن. كۇنى ەرتەڭ ول ءوزىن- ءوزى قالاي اقتاماق؟ سەبەبى، الدىن الا جاسالعان بولجام بويىنشا، جەڭىل رەلستى ترانسپورتپەن قاتىنايتىنداردىڭ سانى قازىردىڭ وزىندە جەتكىلىكسىز.
«بۇل ورايدا تاعى بيۋدجەت قاراجاتىن ءتيىمسىز يگەرۋ بايقالادى»، - دەدى مەملەكەت باسشىسى. قاسىم- جومارت توقايەۆ، قازاقستان رەسپۋبليكاسىنىڭ پرەزيدەنتى:
- حالىق ءۇشىن ىڭعايلى ءارى ۇنەمدى كولىك جۇيەسىن سالۋدىڭ ورنىنا اسا قىمبات جوبا ۇسىنىلدى. ول - جەڭىل رەلستى ترانسپورت قۇرىلىسى. ساۋلەتشىلەر مەن مامانداردىڭ پىكىرى ەسكەرىلگەن جوق. اكىمدىكتىڭ مالىمەتىنە سايكەس، جەڭىل رەلستى كولىك جۇيەسىمەن ءبىر تاۋلىكتە جۇرەتىن جولاۋشىلاردىڭ سانى 146000 ادام بولادى. بۇل - بولجام. الايدا قازىر ءدال وسى باعىتتا، ياعني اۋەجايدان جاڭا تەمىرجول ۆوكزالىنا دەيىن تەك 2000 ادام عانا قاتىنايدى. مەن سىزدەردىڭ جولاۋشىلار سانىن قالايشا 70 ەسەگە ارتتىراتىندارىڭىزدى تۇسىنبەي وتىرمىن.
www.24.kz