شاحماتتىڭ ومىرگە باۋليتىن تۇستارى

نۇر-سۇلتان. قازاقپارات - شاحماتتان الەم چەمپيونى گارري كاسپاروۆقا «ءسىز قانشا قادام العا جوسپارلايسىز؟» دەگەن سۇراق قويعان كەزدە، كوپشىلىك ول كوپ ساندى اتايتىنىنا سەنىمدى بولعان ەدى.

گارريدىڭ جاۋابىنان، ادامدار نەلىكتەن ءدال كاسپاروۆتاي شاحماتتىڭ قۇلاعىندا وينامايتىنىن تۇسىنگەندەي بولدى: «شاحماتتا ءسىزدىڭ قانشا قادام العا جوسپارلاعانىڭىز ماڭىزدى ەمەس، ەڭ باستىسى، ءسىزدىڭ اعىمداعى جاعدايدى دۇرىس باعالاي ءبىلۋىڭىز».

بۇل ءادىستىڭ ءمانى مىنادا: ەگەر ادام قادامدارىن الدىن الا جوسپارلاپ، سونى عانا ۇستانىپ وتىرسا، ول اعىمداعى جاعدايدىڭ ءوزى ويلاعاننان وزگە بولۋى مۇمكىن ەكەنىن ەسكەرمەيدى. بارلىعىن ءدال انىقتاپ قويۋ مۇمكىن ەمەس. سوندىقتان، ادام ءوزى قاراستىرعان قادامداردىڭ ەڭ ۇتىمدىسىن تاڭدايدى، ال، ول قادام ويداعىداي ءتيىمدى بولىپ شىقپايدى. وسى قاتەلىكتى ءبىز كۇندەلىكتى ومىرىمىزدە دە ەسكەرمەي جاتامىز. سەبەبى، ءبىزدىڭ الدىن الا قابىلداپ قويعان شەشىمىمىز اعىمداعى جاعدايدىڭ وزگەرۋىنە بايلانىستى ۇتىمسىز بولىپ قانا قويماي، ءتىپتى، كەرى قادام جاساعانمەن تەڭ بولىپ جاتادى. ەندەشە، گارري كاسپاروۆ شاحمات ويىنىندا قولداناتىن بۇل ءادىستى ۇستانۋ جەتىستىككە جەتەلەرى حاق.

ەگەر ول ۇسىنعان ءتاسىل نەگىزسىز بولسا، كاسپاروۆ شاحماتتان حالىقارالىق دارەجەدەگى گروسسمەيستەر بولار ما ەدى؟ ال، XX عاسىردىڭ ەڭ مىقتى شاحمات ويىنشىسى، 11- الەم چەمپيونى بوببي (روبەرت) فيشەر «شاحمات - ءومىر» دەگەن ەكەن.