ق ر پرەزيدەنتى بيۋدجەتتى تۇبەگەيلى قايتا قۇرۋدى تاپسىردى

نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ مەملەكەتتىك بيۋدجەتتەن قاجەتسىز باعدارلامالاردى الىپ تاستاۋدى ۇسىندى، دەپ حابارلايدى قازاقپارات ءتىلشىسى.

«ساپاسىز جانە بىلىكسىز جوسپارلاۋعا قاتىستى مىسال كوپ. قارجىنى ءتيىمسىز قولدانعانى ءۇشىن مەملەكەتتىك ورگاندار قاتارداعى ورىنداۋشىلارعا ەسكەرتۋ بەرىپ قۇتىلادى. تارتىپتىك ءوندىرىپ الۋ سانى انىقتالعان قۇقىقبۇزۋشىلىقتىڭ كولەمىنە سايكەس كەلمەيدى. 2018 -جىلى 155 قىزمەتكەر جاۋاپقا تارتىلدى، ونىڭ% 7 عانا - 11 ادام باسشىلىق قىزمەتتە بولعان. ۇكىمەتكە ەسەپ كوميتەتىمەن بىرلەسىپ، مەملەكەتتىك جانە كۆازيمەملەكەتتىك سەكتوردا بيۋدجەت قاراجاتىن ءتيىمسىز قولدانعاندارعا، ءتيىمسىز جوسپارلاعاندارعا جاۋاپكەرشىلىك شارالارىن كۇشەيتۋدى تاپسىرامىن. كۆازيمەملەكەتتىك سەكتور «ساۋىن سيىر» بولماۋى كەرەك. بۇل ماسەلە زاڭنامالىق تۇرعىدا شەشىلۋى ءتيىس. بۇل باستامانى پارلامەنت قولدايدى دەپ ۇمىتتەنەمىن» ، - دەدى قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا.

سونىمەن بىرگە، مەملەكەت باسشىسى ۇكىمەتكە كەيىنگە قالدىرىلعان مەملەكەتتىك قارجىنىڭ الەۋمەتتىك جانە ەكونوميكالىق قايتارىمىن باقىلاۋدى كۇشەيتۋ جونىندە ۇسىنىستار ەنگىزۋدى تاپسىردى. ءوز كەزەگىندە قارجى ءمينيسترى ءاليحان سمايىلوۆ بۇل باعىتتاعى جۇمىستار جونىندە باياندادى.

«مەملەكەتتىك شىعىستاردىڭ ۇلعايۋى ماسەلەسى ءبىزدىڭ جۇمىسىمىزداعى باسىمدىقتاردىڭ ءبىرى بولىپ وتىر. بىلتىرعى بيۋدجەتتىڭ ورىندالۋى مەن ۇكىمەتتىڭ پارلامەنتتەگى ەسەبىن قورىتىندىلاي كەلە ءبىز جول كارتاسىن قابىلدادىق، وندا ەسەپ كوميتەتىنىڭ، پارلامەنت مۇشەلەرىنىڭ بارلىق ەسكەرتۋلەرىن نازارعا الدىق. جول كارتاسى اياسىندا ماڭىزدى شارالار كەشەنىن ازىرلەۋدەمىز. ەڭ الدىمەن بيۋدجەت شىعىندارىن جوسپارلاۋ بويىنشا بيۋدجەت زاڭناماسىنا وزگەرىستەر ەنگىزۋ، مەملەكەتتىك باعدارلامالار اياسىنداعى بارلىق مەملەكەتتىك قولداۋ شارالارىن قايتا قاراۋ، باعا پارامەترلەرى شىندىققا جاناسۋ ءۇشىن بيۋدجەتتىك جوسپارلاۋدى ساتىپ الۋ بويىنشا اقپاراتتىق جۇيەلەرگە جالعاپ، اۆتوماتتاندىرۋ» ، - دەدى ءاليحان سمايىلوۆ.

ءوز كەزەگىندە مەملەكەت باسشىسى بيۋدجەتتى تۇبەگەيلى قايتا قۇرۋدى تاپسىردى. «مەنىڭ تاپسىرمالارىما جاقسىلاپ ءمان بەردىڭىزدەر مە؟ بيۋدجەتتى تۇبەگەيلى قايتا قۇرۋ كەرەك. قازىر بيۋدجەتتى مۇقيات قارار بولساق، قويىلعان تاپسىرماعا سايكەس كەلمەيتىن باعدارلامالىق ماقالالار بار» ، - دەپ اتاپ ءوتتى قاسىم- جومارت توقايەۆ.