اۋعانستان مەملەكەتتىك قورعا قازاقستاننىڭ بيدايىن ساتىپ الماق

   پەتروپاۆل. قازاقپارات - سولتۇستىك قازاقستان وبلىسىنىڭ اكىمى قۇمار اقساقالوۆ اۋعانستان ەلشىسى مۇحامماد فارحات ازيميمەن كەزدەسىپ، ەكى جاقتى كەزدەسۋ بارىسىندا ءوزارا ىنتىماقتاستىق اڭگىمە ارقاۋىنا اينالدى، دەپ حابارلايدى قازاقپارات ءتىلشىسى.

 س ق و اكىمى باسپا ءسوز قىزمەتىنىڭ حابارلاۋىنشا، سولتۇستىك قازاقستانمەن اۋعانستان ەلى اراسىندا تىعىز قارىم- قاتىناس ورناعان. بيىلعى 6 ايدا وبلىس شەت مەملەكەتكە 13 ميلليون دوللارعا باعالاناتىن 60 مىڭ توننا ءونىم جونەلتتى. قۇمار اقساقالوۆتىڭ پىكىرىنشە، الدا ەكى جاقتى ءتيىمدى ارىپتەستىكتى دامىتۋعا بار مۇمكىندىك جاسالعان. «ءبىزدىڭ وبلىس ءۇشىن اۋعانستان ەكسپورت بويىنشا باستى سەرىكتەس. س ق و ەكسپورتىنىڭ %28  وسى اۋعانستانعا تيەسىلى. ءبىز سىزدەرگە بيداي جانە مايلى داقىلداردى، ۇندى جانە ەكولوگيالىق تازا ءونىم - بيوەتانولدى جەتكىزۋگە دايىنبىز» ، - دەدى قۇمار اقساقالوۆ.

 
كەزدەسۋدە ءسوز العان اۋعانستان ەلشىسىنىڭ ايتۋىنشا، ولار مەملەكەتتىك قوردى قامتاماسىز ەتۋ ءۇشىن قازاقستاننىڭ سولتۇستىگىنەن بيداي الۋعا ءازىر. «بىزگە مەملەكەتتىك قوردى 4 جىلعا قامتاماسىز ەتۋىمىز كەرەك. ول ءۇشىن سولتۇستىكقازاقستاندىق بيداي مەن ۇندى كوپتەپ الۋعا دايىنبىز. قازىر ءبىز جىلىنا 1,6 ميلليون توننا ساتىپ الا الامىز. سىزدەرمەن مەموراندۋم جاسايىق. ناتيجەسىندە پەتروپاۆلعا كوكونىس، جەمىس- جيدەك جانە باسقا دا تاۋارلاردى جەتكىزەتىن بولامىز» ، - دەدى مۇحامماد فارحات ازيمي.

سولتۇستىك وڭىرگە قىسقى ۋاقىتتا اۋعانستاننان كوكونىس، جەمىس- جيدەك جەتكىزۋ - وبلىستىڭ ازىق- تۇلىك قاۋىپسىزدىگىن قامتاماسىز ەتپەك. ەكى تاراپتىڭ پىكىرى بۇل كەزدەسۋ ارىپتەستىكتى ودان ءارى دامىتۋعا زور ىقپال ەتەدى دەگەنگە سايدى.