ۋچاسكەلىك ينسپەكتورلارعا باسپانا وتەماقىسى تولەنەدى
بۇل تۋرالى ق ر ىشكى ىستەر ءمينيسترى ەرلان تۇرعىمبايەۆ ەلوردادا قازاقستاننىڭ ۇزدىك ۋچاسكەلىك ينسپەكتورلارىنىڭ سلەتىندە ايتتى.
«ىشكى ىستەر مينيسترلىگى 2020-جىلدى ۋچاسكەلىك پوليتسيا ينسپەكتورلارىنىڭ جىلى دەپ اتادى. بارلىق ءوڭىردىڭ اكىمدەرى ۋچاسكەلىك ينسپەكتورلاردىڭ جۇمىسىنا قولداۋ كورسەتۋگە دايىن. ماسەلەن، ماتەريالدىق-تەحنيكالىق بازا، پاتەر ءبولۋ، ۋچاسكەلىك پوليتسيا بەكەتتەرىمەن قامتاسىز ەتۋ بويىنشا. ەگەر ۋچاسكەلىك پوليتسيانىڭ باسپاناسى بولماسا، جۇمىس ورنى، كولىگى بولماسا، باسقا قىزمەتكە اۋىسىپ كەتۋى بەك مۇمكىن. سوندىقتان، ولاردىڭ جۇمىس ىستەۋىنە جاعداي جاساپ، ەڭ مينيمالدى كريتەريلەردى قۇرۋ كەرەك»، - دەدى ەرلان تۇرعىمبايەۆ.
مينيستر 1-شىلدەدەن باستاپ، پوليتسيانىڭ ءۇش ساناتىنىڭ ەڭبەكاقىسى كوبەيگەنىن ەسكە سالدى. سونىمەن بىرگە، باسپانا بويىنشا وتەماقى تولەۋ قاراستىرىلعان.
«بۇل وتەماقى پاترۋلدىك پوليتسەيلەرگە، بارلىق ۋچاسكەلىك پوليتسيا ينسپەكتورلارىنا جانە كامەلەت جاسقا تولماعانداردىڭ ءىسى بويىنشا ينسپەكتورلارعا بەرىلەدى. ءدال وسى ءۇش ساناتتىڭ الەۋمەتتىك جاعدايىن كوتەرۋ كەرەك. ىشكى ىستەر ورگاندارى ولارعا از كوڭىل ءبولىپ كەلدى. سوندىقتان، مەملەكەت باسشىسى ءبىزدىڭ ۇسىنىستى قابىلدادى. 1- شىلدەدەن باستاپ، ۋچاسكەلىك ينسپەكتورلاردىڭ ەڭبەكاقىسى %25 كوتەرىلدى جانە ەڭ باستىسى باسپانا بويىنشا وتەماقى الادى. وتباسى مۇشەلەرىنىڭ سانىنا قاراي 70 مىڭنان 150 مىڭ تەڭگەگە دەيىن تولەنەدى. بۇل - مەملەكەت پەن قوعام تاراپىنان ۇلكەن قولداۋ»، - دەدى مينيستر.
ەسكە سالا كەتسەك، 2019-جىلدىڭ 1- شىلدەسىنەن باستاپ، ءبىرقاتار ىشكى ىستەر ورگاندارى قىزمەتكەرلەرىنىڭ جالاقىسى كوتەرىلدى. پاترۋلدىك پوليتسيا قىزمەتكەرلەرىنىڭ جالاقىسى 65 پايىزعا، جەدەل-تەرگەۋ قۇرامى قىزمەتكەرلەرىنىڭ جالاقىسى 55 پايىزعا، ۋچاسكەلىك ينسپەكتورلار مەن كامەلەتكە تولماعاندار ءىسى جونىندەگى ينسپەكتورلاردىڭ جالاقىسى 25 پايىزعا، قالعان قىزمەت وكىلدەرىنىڭ جالاقىسى 20 پايىزعا ارتتى.