سوۆەت كەزىندە باتىپ كەتكەن سۇڭگۋىر قايىقتان رادياتسيا تاراعانى حابارلاندى
دەگەنمەن عالىمداردىڭ سوزىنشە، باتىپ كەتكەن كەمەدەگى رادياتسيانىڭ قورشاعان ورتاعا قاۋپى جوق. ويتكەنى كەمە وتە تەرەڭدە - 1680 مەتردە جاتىر، ال ودان شىعىپ جاتقان رادياتسيانى نورۆەگيا تەڭىزىنىڭ مۇزداي سۋى جىلدام جويىپ وتىرادى.
1989-جىلى «ك-278» اتوم سۋ استى كەمەسىندە بولعان ورتتەن بورتتاعى 69 ادامنىڭ 42 ءسى قازا تاپقان. كەمەدەگى يادرولىق وتىن قورىمەن بىرگە ەكى يادرولىق تورپەدو دا سۋعا باتىپ كەتكەن. «ك-278» اتوم كەمەسى - 1985-جىلى ەڭ تەرەڭ قاشىقتىق - 1027 مەترگە سۇڭگىپ، رەكورد ورناتقان.
اقپاراتقا قاراعاندا، رەسەيلىك جانە نورۆەگيالىق عالىمدار ەكسپەديتسياسى باتىپ كەتكەن كەمەدەن شىققان رادياتسيا شىعىپ جاتقانىن 1990-جىلدارى جانە 2007-جىلى بايقاعان. ءبىراق بيىل 7- شىلدەدە نورۆەگيالىقتار ءبىرىنشى رەت سۋ استى روبوتىن پايدالانىپ، رادياتسيا مولشەرىن عانا ەمەس، كەمە كورپۋسىن دا ءتۇسىرىپ قايتقان.
نورۆەگيا مەن رەسەي اپات بولعان جەردە ۇنەمى مونيتورينگ جاساپ وتىرادى. ماماندار كەمە سۋ بەتىنە شىقسا، ونداعى وتە كوپ مولشەردەگى راديواكتيۆتى ماتەريال قورشاعان ورتاعا تاراپ كەتەدى، سوندىقتان ونى جاتقان جەرىنەن قوزعاماۋ قاجەت دەگەندى ايتادى.
«ازاتتىق»