ءتۇسىرىلىم بارىسىندا جازاتايىم قازا بولعان اكتەرلەر جايلى نە بىلەمىز؟

 نۇر-سۇلتان. قازاقپارات - ءتۇسىرىلىم بارىسىندا وقىستان قازا تاپقان اتاقتى اكتەر مەن اكتريسالاردى بىلەسىز بە؟

ولاردىڭ ءبىرىنىڭ قازاسى وتتان بولسا، ەكىنشىسى بيىكتەن بايقاۋسىزدا قۇلاپ كەتكەن. ءومىرىنىڭ سوڭعى ءساتىن ءتۇسىرىلىم الاڭىندا وتكىزگەن تانىمال تۇلعالار جايلى ofigenno.com سايتىنا سىلتەمە جاساعان KAZ. NUR. KZ حابارلايدى.

ەۆگەني ۋربانسكي (1932-1965)

اكتەر ءوز ءومىرىن تەاترسىز ەلەستەتە الماعان. ءتىپتى ونىڭ ءبىر ايدا 20 قويىلىمدا ويناعان ۋاقىتتارى دا بولعان. الايدا وعان اتاق-ابىرويدى «كوممۋنيست» فيلمى الىپ كەلگەن.

«ديرەكتور» فيلمىنىڭ كەزەكتى تۇسىرىلىمىندە ەۆگەني ۋربانسكي كولىگىمەن قۇمنىڭ اراسىنان اۆتوكولوننانى قۋىپ جەتۋى كەرەك بولعان.

ءتۇسىرىلىمنىڭ ءبىرىنشىسى ءساتسىز ءوتىپ، كادردى قايتالاعاندا كولىك اۋدارىلىپ قالادى. ال اكتەردىڭ ءوزى اۋىر دەنە جاراقاتىن الىپ، اۋرۋحاناعا دەيىن كوز جۇمعان.

يننا بۋردۋچەنكو (1939-1960)

«تسۆەتوك نا كامنە» فيلمىنىڭ جەلىسى بويىنشا اكتريسا جانىپ جاتقان تۇراقتىڭ ىشىنەن جالاۋدى الىپ شىعۋى كەرەك بولعان. الايدا اعاشتان جاسالعان تۇراق شىداماي، قۇلاپ تۇسەدى.

قاراپايىم جۇمىسشى اياعى اۋىر اكتريسانى وتتان الىپ شىققان.

الايدا يننا بۋردۋچەنكونى اۋرۋحاناعا جەتكىزگەنىمەن، اكتريسانى دا، ىشىندەگى بالاسىن دا امان الىپ قالۋ مۇمكىن بولماعان.

يۋري گۋسيەۆ (1936-1991)

يۋري گۋسەيەۆ ءوزىن اكتەر رەتىندە باعالاماي، باسقا ماماندىقتى تاڭداعان. الايدا جىلدار وتە كەلە ول ءوز قىزمەتىن اۋىستىرۋعا نيەت ءبىلدىرىپتى.

تاشكەنت قالاسىنداعى ءتۇسىرىلىم كەزىندە اكتەر ابايسىزدا قۇلاپ، باس-سۇيەك جاراقاتىن العان.

وسىدان سوڭ گۋسەيەۆ ومىردەن وتەدى.

ميكاەلا دروزدوۆسكايا (1937-1978)

ءوز ۋاقىتىندا اكتريسانى بارلىعى قۇرمەتتەپ، جاقسى كورگەن. كوپشىلىك ونىڭ بولاشاعىنىڭ زور ەكەنىنە دە سەنىمدى بولعان.

الايدا ول كۇزگى ءتۇسىرىلىم كەزىندە ۇيدەن شىققان ورتتەن قازا تاپقان.

اكتريسا كۇزدىڭ سۋىعىندا جىلۋى جوق ءۇيدى مەكەن ەتكەن. ءارتۇرلى پريبورلارمەن ءۇيىن جىلىتپاق بولعاندا، ونىڭ توسەگى ورتەنىپ، ونەر يەسى يىسكە ۋلانىپ قالادى.

ميكاەلانى اۋرۋحاناعا جەتكىزگەنمەن، ونى امان الىپ قالا الماعان.

الەكساندر چەكايەۆسكي (1905-1963)

اكتەر «گاملەت» فيلمىنىڭ تۇسىرىلىمىندە پويىز استىنا ءتۇسىپ قازا تاپقان.

اندرەي روستوتسكي (1957-2002)

ءوزى اكتەر ءارى كاسكادەر اندرەي روستوتسكيدى ءتۇسىرىلىم الاڭىندا قازا تابادى دەپ ويلاماعان.

بيىكتىكتەن سەكىرەتىن ءتۇرلى تريۋكتى ورىنداپ جۇرگەن ونەر يەسى «مويا گرانيتسا» فيلمىنىڭ تۇسىرىلىمىندە 30 مەترلىك بيىكتىكتەن قۇلاپ، قايتىس بولعان.

سەرگەي بودروۆ-ملادشي (1971-2002)

2002-جىلى 20- قىركۇيەكتە تاڭ اتا، بودروۆ باستى رولدە ويناعان «سۆيازنوي» فيلمىنىڭ ءتۇسىرىلىم توبى ۆلاديكاۆكازدان تاۋ جاققا قاراي جول تارتقان بولاتىن.

ءتۇسىرىلىم كۇنى-بويى ءوتىپ، كەش باتا ءتۇسىرىلىم توبى قالاعا قاراي قايتا جول تارتادى.

ساعات 20:08 دە كەنەتتەن مۇز قۇلاپ، بىرنەشە مينۋتتىڭ ىشىندە 300 مەترلىك قالىڭدىقتى مۇزدىق پەن تاستار جاۋادى.

قۇتقارۋ جۇمىستارى بىرنەشە اي جۇرگىزىلگەنىمەن، ءتۇسىرىلىم توبى سول كۇيى تابىلماعان. اكتەرمەن بىرگە 125 ادام قايتىس بولعان.