ۋكراينالىقتار بۇرىنعى پرەزيدەنت پوروشەنكونى ميتينگتەن قۋىپ جىبەردى

 نۇر-سۇلتان. قازاقپارات - ۋكراينادا سۆالياۆا قالاسىنىڭ تۇرعىندارى بۇرىنعى پرەزيدەنت پەتر پوروشەنكونى سايلاۋالدى ميتينگتەن قۋىپ جىبەردى.

بۇل تۋرالى Lenta.ru سايتى حابارلايدى.

بەينەجازبادان «ۇيات» دەگەن ايعايلار ەستىلەدى. ال ادامدار پوروشەنكونى قولىنان، كۇرتەسىنەن ۇستاپ العان. ءتىپتى، تۇرعىنداردىڭ ءبىرى ەكس-پرەزيدەنت «اسكەردى دە، بارلىعىن تونادى» دەگەن پىكىر دە ايتىپ قالعان.

8- شىلدە كۇنى مەملەكەتتىڭ بۇرىنعى باسشىسىن ءوز ميتينگىنەن حمەلنيتسكي قالاسىنىڭ تۇرعىندارى قۋىپ جىبەرگەن. سول كەزدە دە پوروشەنكو ءىس-شارانى تاستاپ كەتۋگە ءماجبۇر بولعان.

كيەۆ حالىقارالىق الەۋمەتتانۋ ينستيتۋتى جۇرگىزگەن ساۋالنامانىڭ ناتيجەسى بويىنشا پوروشەنكو ۋكرايندىقتاردىڭ انتيپاتيا رەيتينگىن باسقاردى. رەسپوندەنتتەردىڭ 70,9 پايىزى ونى تەرىس باعالاپ وتىر. سۇرالعانداردىڭ 12,7 پايىزى عانا بۇرىنعى پرەزيدەنتتى قولداپ وتىر.

پوروشەنكو 21- شىلدەدە وتەتىن جوعارعى راداعا سايلاۋ الدىندا «ەۋروپالىق ىنتىماقتاستىق» پارتياسىمەن ەل بويىنشا تۋر وتكىزىپ جاتىر.