اسقار مامين ارىسقا ساپارىن قورىتىندىلادى

ارىس. قازاقپارات - ق ر پرەمەر-ءمينيسترى اسقار مامين ارىس قالاسىنداعى جۇمىس ساپارىن قورىتىندىلادى، دەپ حابارلايدى قازاقپارات ءتىلشىسى.

ارىستاعى جارىلىستان بۇلىنگەن نىسانداردى تەكسەرۋ قورىتىندىسى بويىنشا ۇكىمەت باسشىسىنىڭ توراعالىعىمەن كەڭەس ءوتتى. كەڭەس بارىسىندا ق ر يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى قايىربەك وسكەنبايەۆ تىندىرىلعان شارۋالار تۋرالى اقپارات بەردى.

«قازىر بارلىق سەكتوردا جوندەۋ جۇمىستارى قىزعان. بارلىعى 676 ءۇي قولدانىسقا بەرىلدى. وڭىرلەر بويىنشا ايتساق، اقتوبە - 236، ب ق و - 162، نۇر-سۇلتان - 80، س ق و - 47،  قىزىلوردا - 41، شىمكەنت - 31، جامبىل - 21، اقمولا - 18، ماڭعىستاۋ - 12، قوستاناي - 12، الماتى - 9، قاراعاندى - 5، اتىراۋ - 2 ۇيدە جوندەۋ جۇمىستارىن اياقتادى. ءالى 3040 ۇيدە جوندەۋ جۇمىستارى ءجۇرىپ جاتىر. نىسانداردا 190 قۇرىلىس كومپانياسىنان 4699 قىزمەتكەر مەن 207 ارنايى تەحنيكا جۇمىلدىرىلعان»، - دەدى قايىربەك وسكەنبايەۆ.

ۆيتسە-مينيستر الەۋمەتتىك نىسانداردىڭ جاعدايىنا دا توقتالدى. جالپى قالادا 66 الەۋمەتتىك نىسان بار. ونىڭ 54 ءى ءبىلىم بەرۋ، 8 ءى دەنساۋلىق ساقتاۋ، تورتەۋى سپورت مەكەمەلەرى.

«الەۋمەتتىك نىسانداردىڭ بارلىعى بۇلىنگەن بولاتىن. ولاردىڭ 62 ءسى كۇردەلى جوندەۋدەن ءوتىپ، تورتەۋى «سامۇرىق-قازىنا» ا ق- نىڭ قاراجاتىمەن تولىق قالپىنا كەلتىرىلەدى.

قازىردىڭ وزىندە 62 نىساندى قالپىنا كەلتىرۋ جۇمىستارى ءجۇرىپ جاتىر. 53 ءبىلىم بەرۋ، 6 دەنساۋلىق، 3 سپورت نىسانىن جوندەۋگە 30 كومپانيادان 1372 قۇرىلىسشى مەن 57 ارنايى تەحنيكا تارتىلعان»، - دەدى قايىربەك وسكەنبايەۆ.

الداعى اپتادا ولاردىڭ قاتارىن تاعى 600-700 جۇمىسشى تولىقتىرماق.

ەسكە سالساق، بۇگىن ق ر پرەمەر-ءمينيسترى اسقار مامين ارىس قالاسىنداعى 300 ورىندىق مەكتەپكە بارعان بولاتىن. ارىستىقتارمەن كەزدەسۋ بارىسىندا ۇكىمەت باسشىسى اپتا سايىن ارىسقا كەلىپ، جوندەۋ جۇمىستارىن تەكسەرىپ تۇراتىنىن ايتقان.

كەزدەسۋلەردىڭ بىرىندە ءۇيى، دۇكەنى جانە ءۇش كولىگى ورتەنىپ كەتكەن تۇرعىن ۇكىمەت باسشىسىنان كومەك سۇرادى.