رينات زايىتوۆتىڭ اكەسى: اناسى الدىرىپ تاستاعىسى كەلگەن، ءبىراق مەن قارسى بولدىم
اكەسىنىڭ ايتۋىنشا، رينات دۇنيەگە كەلەتىن كەزدە اناسى ونى الدىرىپ تاستاعىسى كەلگەن.
«رينات دۇنيەگە كەلەتىن كەزدە دە قىزىق بولدى. ول وتباسىنداعى ءتورتىنشى پەرزەنت. اناسى ءۇش بالادان قينالعان بولار، وسىعان كەلگەندە دۇنيەگە اكەلگىسى كەلمەدى. سودان مەن قارسىلىق تانىتىپ، بالا 1983-جىلى دۇنيە ەسىگىن اشتى. ول كەزدە قيىنشىلىق كەزەڭ باستالعان ءسات. ءبىراق بالانى پەرىشتەسى قاعادى دەيدى عوي، كەز-كەلگەن قيىندىقتان رينات ايتەۋىر جولى بولىپ شىعىپ كەتەتىن»، - دەدى اقىنىڭ اكەسى.
سونداي-اق، ول رينات زايىتوۆتىڭ اناسىمەن اجىراسقانىن دا جاريا ەتتى.
«مەكتەپ وقىپ جۇرگەن كەزدە اناسىمەن اجىراستىق. ەشقانداي ۇرىس بولعان ەمەس. وسىلاي داستارحان باسىندا سويلەسىپ، كەلىسىمگە كەلىپ ءبىر كوستيۋممەن ۇيدەن شىعىپ كەتتىم. ريناتتىڭ الدىنداعى ءۇش بالام قارسى بولدى اجىراسۋىمىزعا، رەنىشتەرىن ايتىپ جاتتى. رينات ءبىر اۋىز قاتتى ءسوز ايتقان ەمەس بەتىمە. سودان ولار سەمەيگە كوشىپ كەتتى. سول جاقتا ونىڭ الدىنان باسقا ادامدار جولىقتى. سەرى، اقىن كىسىلەر وعان جول كورسەتە باستادى. مەن ايتام وعان «وزىممەن قالعاندا مەن ون ءبىر بىتىرتەر ەدىم، مۇمكىن باسقا سالادا اداستىرار ەدىم» ءار زاتتىڭ قايىرى بار، وتباسىنداعى قيىندىق ريناتتى تاربيەلەدى دەپ ويلايمىن. سودان ول بالا كۇنىنەن ايماقتاعى ەلدىڭ اۋزىنا ىلىنە باستادى. ءوزىم جولداستار اراسىندا ءازىل، شارج جازىپ تۇرامىن. ونى رينات جاتتاپ الىپ ەلگە وقيتىن. سودان جولداستار كەيدە رەنجىپ جاتاتىن. ەلگە جايىلادى عوي ەندى. ريناتتىڭ ەستە ساقتاۋ قابىلەتى مىقتى بولاتىن»، - دەيدى اكەسى.
اكەسى الدىڭعى ەكى ۇلىن ۇرىپ تاربيەلەگەنىمەن ريناتقا ۇرىسپاپتى.
«الدىڭعى ەكى ۇلدى ۇرىپ-سوعىپ ءوسىردىم، قاتال بولدىم. ريناتتى ۇرماق تۇرماق، ۇرىسقان ەمەسپىن. وعان اقىندىق، سەرىلىك اتالارىنان كەلگەن. ءوزىمنىڭ بابالارىم كەزىندە تانىمال اقىن بولعان. رياناتتى ساياسيلانىپ كەتكەن دەيتىندەر بار. مەن مەكتەپتە وقۋ ءىسى بويىنشا مەڭگەرۋشىمىن. ۇلىما «كەيدە ديرەكتوردىڭ ءىسى دۇرىس بولمايدى. ءبىراق، مەن وعان ونى بەتىنە ايتا المايمىن» دەيتىنمىن. كەرەك كەزدە شەگىنىس جاساپ، ءبىر ساتى تومەن تۇسۋگە بولاتىنىن ايتقانمىن. ەندى بالا ءوزى شەشىم شىعارادى نە سويلەسە دە. مەن ءوز پارىزىمدى جاسادىم. ءبىراق، كەيدە ريناتپەن سويلەسىپ وتىرساڭ اراسىندا پاتشانى ماقتان تۇتادى. حالىق ءوزى ريناتتان بيلىككە قارسى ادام جاساپ العان سياقتى. رينات نەگىزى بيلىككە ەمەس، بيلىكتىڭ قاتەلىگىنە قارسى ادام. ول قاتەلىكتى نازاربايەۆ ەمەس، اينالاسىنداعىلار جاساپ ءجۇر. سىن ايتپاي، ءمىن تۇزەلۋشى مە ەدى؟ ول دۇرىس ايتقانى»، - دەدى سۇحباتىندا اقىننىڭ اكەسى ريفحات زايىتوۆ.
ايتا كەتەيىك، ايتىسكەر اقىن رينات زايىتوۆ 1983-جىلى 17- قاراشادا شىعىس قازاقستان وبلىسى اياگوزدە دۇنيەگە كەلگەن. وتباسىندا ءتورت اعايىندى. 17 جاسىنان باستاپ ايتىسقا قاتىسىپ، تالاي جۇلدەلى بولعان.