ءبىر تاۋلىكتە ءۇش شىڭدى باعىندىرعان ءۇش جاسار بالاقاي الەمدى تاڭعالدىردى

 نۇر-سۇلتان. قازاقپارات - ۇلى بريتانيانىڭ دجەكسون كرجيسيك ەسىمدى ءۇش جاسار تۇرعىنى نەبارى ءبىر تاۋلىكتە ءۇش شىڭدى باعىندىردى.

ول «ءۇش شىڭ» چەللەندجىنىڭ ەڭ جاس قاتىسۋشىسى اتانىپ، رەكورد ورناتتى. بالاقاي ءوز جەڭىسىن كوز جۇمعان دوسىنا ارناعان دەپ حابارلايدى TengriMIX- كە سىلتەمە جاساعان KAZ. NUR. KZ.

دجەكسون كرجيسيك نەبارى ءۇش جاستا. كىشكەنتاي ءبۇلدىرشىن جاسىنا قاراماستان ءبىر تاۋلىكتە ۇلى بريتانيانىڭ ءۇش بىردەي شىڭىن: ۋەلستەگى سنوۋدون تاۋىن (1085 مەتر)، انگلياداعى سكافەلل-پايكتى (978 مەتر)، شوتلاندياداعى بەن-نيەۆيستى (1345 مەتر) باعىندىردى.

نەبارى 20 ساعاتتا ءبۇلدىرشىن 37 شاقىرىم تاۋ جولدارىنان ءوتىپ، 3064 مەتر بيىكتىككە كوتەرىلدى. ول «ءۇش شىڭ» چەللەندجىنىڭ ەڭ جاس قاتىسۋشىسى بولدى.

«ءۇش شىڭ» چەللەندجىنىڭ ءمانى - ءبىر كۇن ىشىندە ءۇش تاۋ شىڭىن باعىندىرۋ. بۇعان دەيىن بۇل رەكورد ماۋسىم ايىندا ءبىر تاۋلىك ىشىندە سىناقتان وتە العان التى جاسار لۋكاس لوۋرەنسونعا تيەسىلى بولاتىن.

دجەكسون سىناقتان ەشكىمنىڭ كومەگىنسىز ءوتتى. ونىڭ اكەسى وعان جولسەرىك بولدى. كىشكەنتاي الپينيست جەڭىسىن 2017-جىلى ەكى جاسىندا كوز جۇمعان رالف ەسىمدى دوسىنا ارنادى.

«رالفتىڭ اناسىنىڭ تولعاعى اۋىر بولدى. وكىنىشكە وراي، ول مي زاقىمىمەن دۇنيەگە كەلدى. ەكىنشى اپتادا نارەستەدەن تسەرەبرالدى سال اۋرۋى انىقتالدى. بالا سويلەپ، قوزعالا المادى. سوعان قاراماستان، بالالار دوستاسا الدى. ۇلىم رالف ءۇشىن تاۋعا شىعامىز دەپ ايتتى»، - دەيدى دجەكسوننىڭ اكەسى كەل.

العاش رەت بالاقاي ەكى جاسىندا كولدى ولكەدەگى جانە يوركشيردەگى شىڭعا شىققان. اكەسىنىڭ ايتۋىنشا، ۇلى تاۋعا شىعۋدى ۇزاق سەرۋەن رەتىندە قابىلداپ، ءار ساتىنەن شاتتانا بىلگەن.

«ەڭ كۇردەلى شىڭداردىڭ ءبىرى سكافەلل-پايك بولىپ شىقتى. ۇلىمنىڭ كىشكەنتاي اياقتارىنا شىڭعا شىعۋ ءۇشىن كوبىرەك ۋاقىت قاجەت بولدى. ءبىراق، ول ونى ەش قيىندىقسىز، راحاتتانا باعىندىردى. ۇلىم تابيعاتتا سەرۋەندەگەندى جاقسى كورەدى. ارينە، مەن ونىڭ ءجۇرىسىن قاداعالاپ تۇرامىن. سەبەبى تاۋدىڭ قانشالىقتى قاۋىپتى ەكەنى بارشاعا ءمالىم»، - دەيدى كەل.

مارقۇم رالفتىڭ اناسى دجەكسوننىڭ بۇل ارەكەتى ونى تەبىرەنتكەنىن جاسىرمادى.

«دجەكسوننىڭ رالف ءۇشىن نە ىستەگەنىن ەستىگەندە كوزىمە جاس كەلدى. مۇنى راسىمەن دە ەرلىك دەپ بىلەمىن. وعان قوسا بۇل مەنىڭ ۇلىمدى ەسكە الۋدىڭ ەڭ ۇزدىك ءتاسىلى. كەڭ جۇرەكتى كىشكەنتاي بالاعا تامسانامىن»، - دەيدى دجەيد.

بۇدان بولەك، بالاقاي Cerebra قايىرىمدىلىق قورىنا مي زاقىمى بار بالالارعا 1000 فۋنت كولەمىندەگى قاجەتتى قاراجاتتى جيناۋعا كومەكتەسكەن.

مۇنىڭ ءبارى ونىڭ اتا-اناسىنىڭ كراۋدفاندينگ كومپانياسىن ىسكە قوسىپ، كىشكەنتاي الپينيست ونىڭ امباسادورى بولعانىنىڭ ارقاسىندا ورىن الدى.