جامبىلدا پەرزەنتحانادان ۇرلانعان نارەستە قوناق ۇيدەن تابىلدى
ايتا كەتەيىك، اعىمداعى جىلدىڭ 8 -شىلدەسىندە تاراز قالالىق پوليتسيا باسقارماسىنىڭ جەدەل باسقارۋ ورتالىعىنا ايەل ادام حابارلاسىپ، وبلىستىق پەريناتالدىق ورتالىقتان ونىڭ جاڭا تۋعان نارەستەسىن الىپ كەتكەنىن مالىمدەدى. بۇل تۋرالى وبلىستىق پوليتسيا دەپارتامەنتىنىڭ باسپا ءسوز قىزمەتى حابارلادى.
«بالانى ىزدەستىرۋ وپەراتسياسىن تاراز قالالىق پوليتسيا باسقارماسىنىڭ باستىعى پوليتسيا پولكوۆنيگى ارداق ماديماروۆ باسقاردى. قىلمىستىڭ اشىلۋىنا وبلىس ورتالىعىنىڭ پاترۋلدىك پوليتسيا باتالونىنىڭ قىزمەتكەرلەرى بەلسەندى قاتىستى، ولاردىڭ كۇشتەرىمەن بەينەكامەرالارداعى ماتەريالدار زەرتتەلدى. جاقىن ماڭداعى بارلىق تۇرعىن ءۇي سەكتورى، قوناق ءۇيدىڭ بارلىق نومىرلەرى تەكسەرىلدى. ناتيجەسىندە نارەستە قوناق ۇيلەردىڭ بىرىنەن تابىلدى»، - دەلىنگەن ۆەدومستۆو حابارلاماسىندا.
پوليتسيا دەپارتامەنتى باسپا ءسوز قىزمەتىنىڭ جەتەكشىسى گۇلسارا مۇحتارقۇلوۆانىڭ ايتۋىنشا، اۋىر قىلمىس ەكى ساعات ىشىندە اشىلىپ، بالا اناسىنا قايتارىلعان. بالانى الىپ كەتتى دەگەن كۇدىكپەن جامبىل وبلىسى جامبىل اۋدانى قاراكەمەر اۋىلىنىڭ 22 جاسار تۇرعىنى ۇستالىپتى.
«كۇدىكتىگە قاتىستى قىلمىستىق كودەكستىڭ 135-بابى 2-بولىگى 1-تارماعى بويىنشا سوتقا دەيىنگى تەرگەۋ امالدارى باستالدى. ونىڭ سانكسياسى مۇلكىن تاركىلەۋمەن 10 جىلعا دەيىن باس بوستاندىعىنان ايىرۋدى كوزدەيدى. قازىرگى ۋاقىتتا كۇدىكتىنىڭ ءوزىنىڭ كىشكەنتاي ءسابيى بار ەكەنى ەسكەرىلە وتىرىپ، بۇلتارتپاۋ شاراسى قاراستىرىلۋدا»، - دەيدى گۇلسارا مۇحتارقۇلوۆا.